Brıtandyq Pol Heımen ózgeniń júregimen eń uzaq ómir súrip jatqan adam retinde Gınnestiń rekordtar kitabyna engisi keledi. 1987 jyly 19 jastaǵy Heımen Brıtanıada alǵashqylardyń biri bolyp transplantasıa boıynsha operasıa jasatty. Ol ýaqytta adam aǵzasyn aýystyrý qazirgideı ońaı bolmaǵan.

15 jasynda Poldyń kardıomegalıa aýrýyna shaldyqqany belgili bolady. Ol dene shynyqtyrý sabaǵynda talyp qalǵannan keıin atalmysh derttiń bar ekeni anyqtalǵan. Birneshe jyldan keıin ol júrek aýystyrýǵa kezekke turdy.

Jańa júrek salynǵannan keıin dárigerler Pol tek on jyl ǵana ómir súredi dep boljady. Alaıda Pol barlyq boljamdy joqqa shyǵardy. Qazir onyń jasy 49-da. Pol Heımen ózin jaqsy sezinetinin aıtady. Ol artyq ýaıymdamaýǵa tyrysady.  Dárigerler oǵan fýtbol machtaryn da kórýge tyıym salǵan.  

«Jańa júrek maǵan berilgen eń úlken syı. Meniń jolym boldy. Áli de tiri ekenimdi, áli de jer basyp júrgenimdi seziný men úshin baqyt» deıdi Pol.

Eń qyzyǵy, brıtandyq er adam  júrek qana emes, búıregin de aýystyrǵan eken. Ol bul operasıany jańa júregimen jasatqan. Dárigerler úlken qaýipke qaramastan Polǵa operasıa jasady. Pol Haımen sekildi emdelýshilerge ota jasaý bul  qaýipti eki esege arttyrǵan edi.

Eki kúrdeli operasıa er adamnyń jeke ómirine eshqandaı kedergisin keltirmedi. Pol Haımen úılendi. Onyń eki qyzy bar. Úlkeni ákesine qarap, medısınanyń jetistikterine tańqalyp, ózi de dáriger bolýdy sheshti. Ol qazir medısınalyq ýnıversıtette oqıdy.

«Men qyzdarymnyń qalaı ósip kele jatqanyn kóremin dep oılamadym. Jyldar zyrǵyp ótip jatqanyna qaramastan ózimdi jaqsy sezinemin» deıdi Pol.

Ol ómir boıy elektrık bolyp jumys istegen. Áıelimen ajyrasqannan keıin ata-anasynyń úıinde turyp jatyr. Ózgeniń júregimen eń uzaq ómir súrip, Gınnestiń rekordtar kitabyna kirgen 73 jastaǵy Djon Makkafertı qaıtys boldy. Ol jańa júrekpen 33 jyl ómir súrgen. Alaıda dárigerler Polǵa aıtqandaı  oǵan da 10 jyl ǵana ómir súredi dep boljaǵan.

Sholýshy: Ásem Álmuhanbet