Ortalyq komýnıkasıalar qyzmetinde QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» joldaýyn iske asyrý turǵysynan «Bolashaq» stıpendıasyn jańǵyrtýǵa arnalǵan baspasóz konferensıa ótti.

İs-sharaǵa «Halyqaralyq baǵdarlamalar ortalyǵy» AQ vıse-prezıdenti Meıirjan Alpysbaı, «Halyqaralyq baǵdarlamalar ortalyǵy» AQ vıse-prezıdenti Zýlfıa Tórebekova jáne Konkýrstyq rásimderdi uıymdastyrý departamentiniń dırektory Aıman Áýbakirova qatysty.

Meıirjan Alpysbaı atap ótkendeı, jańa ekonomıkalyq saıasat pen memleketti jańǵyrtý basymdyqtary jaǵdaıynda Qazaqstan úshin eldiń sapaly áleýetin arttyrý jáne tıimdi kásibı resýrsty qalyptastyrý erekshe mańyzǵa ıe. Osyǵan baılanysty, «Bolashaq» halyqaralyq stıpendıasy arqyly ozyq tájirıbe men úzdik úlgi alý respýblıkada bastalǵan Jańǵyrtýdyń úshinshi tolqyny turǵysynan da basym bolyp qalatynyn mekeme basshysy atap ótti. 

 «Bolashaq» halyqaralyq stıpendıasy bilim berý salysyndaǵy qazaqstandyq alǵashqy serpilisti jobalardyń biri bolyp, kásibı mamandardy daıarlaý júıesi retinde eldiń kadrlardaǵy ósip kele jatqan qajettilikterine tolyq beıimdelýge umtylýda. Baǵdarlama mańyzy «100 naqty qadam» Ult josparynyń ınstıtýttyq reformalary, eldiń  ındýstrıaldy-ınnovasıalyq damýy jáne Memleket basshysynyń «Jańǵyrtý 3.0» joldaýynda belgilengen «adamı kapıtal sapasyn jaqsartý» boıynsha mindetter aıasynda nyǵaıady, – dep atap ótti «Halyqaralyq baǵdarlamalar ortalyǵy» AQ vıse-prezıdenti Meıirjan Alpysbaı. 

«Halyqaralyq baǵdarlamalar ortalyǵy» AQ vıse-prezıdenti Zýlfıa Tórebekova 23 mamyrda Qazaqstan Respýblıkasy Úkimetiniń Qaýlysymen «Bolashaq» stıpendıasyna úmitkerlerdi irikteýdiń jańa qaǵıdalary qabyldanyp, sondaı-aq konkýrstyq irikteý rásimine ózgerister engizilgendigin tilge tıek etti.

«Birinshi. IELTS 6.5 jáne odan joǵary sertıfıkaty, sondaı-aq GPA 3.3 jáne odan joǵary dıplomy bar tulǵalar úshin «jalpy konkýrs» jańa sanaty engizildi. Úmitkerlerdiń osy sanaty úshin jumys ótili men jumys berýshi ótiniminiń bolýyna talap qoıylmaıdy. Osy sanat magıstr dárejesin alý úshin stıpendıattardyń basqa sanattarymen qatar, 2 aıǵa deıingi merzimde oqý aldyndaǵy daıarlyqtan (pre-master's) ótý múmkindigin beredi. Ekinshi. Akademıalyq baǵdarlamalar (magıstratýra, doktorantýra, rezıdentýra) úshin úmitkerlerdiń barlyq sanattaryna bakalavr nemese maman dıplomynyń ortasha balyna qoıylatyn talaptar 3.0-den 3.3 (4.0/4.33-ten) GPA deńgeıine deıin ózgertildi. Úshinshi. «Magıstratýra» baǵdarlamasy boıynsha úmitkerlerdiń barlyq úlestik sanattary úshin aǵylshyn tilin meńgerý deńgeıiniń ólshemsharttary IELTS júıesi boıynsha 5.0 baldan 5.5 balǵa deıin kóterildi. Sonymen, «ınjenerlik-tehnıkalyq mamandyq» sanaty boıynsha úmitkerlerge qoıylatyn talaptar burynǵy deńgeıde – IELTS 5.0 qalady», - dedi ol.

Sonymen qatar spıker, Stıpendıa taǵaıyndaý úshin 2017 jyldan bastap konkýrs 6 kezeńnen turatynyn jetkizdi.