Aqtóbelik dárigerler aýrýhanada qaıtys bolǵan jigittiń ishki aǵzasyn týystarynyń ruqsatynsyz alǵan  dep jazady ktk.kz. Qos búıregin sol boıda eki naýqasqa salyp beripti. Al marqumnyń jaqyndary muny máıithanadan súıekti alar kezde bir-aq bilgen. Endi olar súıekti suraýsyz qoldandy dep dárigerlerdi sotqa berip jatyr. Oblystyń Densaýlyq saqtaý basqarmasynyń da óz ýáji bar.  Tóbelesten basynan soqqy alǵan 22 jastaǵy Serikbolsyn Kósherbaı osydan eki apta buryn esin jımastan aýrýhanada kóz jumǵan. Ol oblys ortalyǵyna Baıǵanın aýdanynan eken.

Degenmen, esh qaıran bolmapty. Keıin qyrshynnyń qazasyna qaıǵyrǵan jaqyndaryna máıithana qyzmetkerleri jetkizgen habar tóbelerinen jaı túsirgendeı boldy. Óıtkeni marqumnyń týystarynyń ruqsatynsyz dárigerler mıy ólip, essiz jatqan jigittiń ishki aǵzasyn soıyp alǵan. Muny estigen Serikbolsynnyń anasy qazir tósek tartyp qalypty. Al týystary ony soıyp tastaıyndaı suraýy joq pa edi dep dárigerlerge ashynyp otyr. Aqtóbelik aq halattylar bolsa, jigittiń qos búıregin basqa naýqastarǵa salyp úlgergen.  "Týmalary bar ǵoı qasynda. Eń bolmasa bireýine aıtyp, suraý kerek edi. Ondaı eshteńe aıtpaǵan. Syrttan estip otyr ǵoı bular", - dedi marqumnyń naǵashy apasy Gúlaıym Esenbaeva. Dárigerler Serikbolsyn es-tússiz aýrýhanada jatqan kezinde mıynyń ólgenin týystaryna aıtqan eken. Biraq ony aparattan ajyratarda aǵzasyn bireýge beretinderi týraly aýyz ashpapty. Sondyqtan advokattar da muny óreskel zań buzýshylyq dep otyr.

"Halyqtyń densaýlyǵy jáne densaýlyq saqtaý týraly" zańnyń 169 babynda kórsetilgen: "Máıittiń ishki organdaryn alý úshin onyń jaqyndarynyń, zańdy ókilderiniń ruqsaty qajet". Bul jerde endi densaýlyq saqtaý mamandary menińshe durys jasamaǵan dep oılaımyn", - dep pikir bildirdi bul jaǵdaıǵa advokat Qatarbaı Raısov. Al densaýlyq saqtaý basqarmasyndaǵylar basqa dáıek keltirdi. Aıtýlarynsha, máıitten aǵzany alýǵa eshkimniń ruqsaty qajet emes. Óıtkeni, bıyldan bastap kúshine engen jańa zańda solaı jazylypty. "Kóz jumǵan marqum  tiri kezinde men donor bolmaımyn dep qaǵaz qaldyrmasa  da, biz zańdy túrde kez kelgen adamnan kesip alamyz.  Eger múshesi saý bolsa árıne.  Suraýsyz alyp muqtaj adamdarǵa berip  operasıa jasaımyz", - dedi Aqtóbe oblystyq densaýlyq saqtaý basqarmasynyń basshysy Áset Qalıev. 

Qazir osy oqıǵaǵa baılanysty qaraly otbasy prokýratýra men ishki ister departamentine aryz jazǵan. Sondaı-aq týystarynan ruqsat alǵany týraly habar taratqan jergilikti gazetti de sotqa beripti. Eske salsaıy, transplantologıany damytýǵa qatysty zań jobasyn ázirleýge belgili dáriger, burynǵy Densaýlyq saqtaý mınıstri Jaqsylyq Dosqalıev jetekshilik etken bolatyn. Endi osy daýdan soń onyń ózi Aqtóbege arnaıy kelip, túsindirý jumystaryn júrgizbekshi.

Sholýshy: Nazerke MUSA