Berlınde Ibn-Rýshd pen Geteniń atyndaǵy meshit ashyldy, dep jazady Qamshy aqparattyq agenttigi.

Meshittiń ımamy germandyq femınıst jáne quqyq qorǵaýshy, túrik týmasy Seıran Ates esimdi áıel. Ǵımarattyń ereksheligi er adamdar men áıel adamdar bir bólmede namaz oqıdy, onyń ústine meshitke kelýshilerge hıdjap kıý mindettelmegen. Bul týraly EurAsia Daily habarlaıdy. 

Orta ǵasyrdaǵy arab fılosofy men nemis aqynynyń esimi berilgen meshit qasıetti Iogan atyndaǵy Evangel shirkeýiniń 3-qabatynda ornalasqan.

Seıran Atestiń aıtýynsha, «jańa dindi jasap jatqan joq, kerisinshe ıslamdaǵy mezgili jetken reformany qaıta jandandyrmaq» eken. «Hrıstıan jáne býdda áıelderi teńdikke qol jetkizý úshin birneshe ǵasyr jumsady, endi musylman áıelderiniń kezegi keldi», - deıdi ol. Onyń ústine, engizgen taǵy bir jańalyǵy bar eken – «lıberaldy meshitke» geıler men lesbılerge de oryn tabylatyn kórinedi. «Islamnyń túrli denomınasıalarymen, sheıitter, sýfıler, sáláfıtter, súnnettermen birge qudaıǵa qulshylyq jasaýda, bárimizdiń bir bólmede bolǵanymyz mańyzdy», dep qostady quqyq qorǵaýshy-ımam.

Erekshe musylman ǵımaratynyń ashylý rásimine shveısarıalyq quqyq qorǵaýshy jáne femınıst Saıda Keller-Messahlı qatysty. Ol Seıran Atestiń bastamasyn qoldap otyr. Aıtýynsha, búgingi tańda ıslam radıkalızm men fýndamentalızmdi basynan keshýde.

«Lıberaldy meshitti» qurý úshin Seıran Atestiń 8 jyl ýaqyty ketipti, onyń bastamasyn qoldaǵan birneshe musylman áıeldi ashyq qoldaýdan júreksinip, alǵashqy namazǵa kelmegen kórinedi.

Berlınniń ózge musylmandarynyń ne oılaıtyny áli belgisiz, olar qandaı da bir pikir berýden bas tartyp otyr. Alaıda, Iogan shirkeýi ornalasqan aýdannyń turǵyndary ıslam fýndamentalızmi tarapynan shabýyldar jasala ma degen qaýipterin ashyq aıtty. Oǵan Seıran Atestiń jaýaby daıyn boldy. Ol árdaıym memlekettik organdarmen, sondaı-aq polıseı qyzmetkerlerimen úzdiksiz baılanysta bolatynyn aıtyp sendirdi. Jaqyn arada qaýipsizdik sharasy kúsheıtiletinin aıtty.

Quqyq qorǵaýshy ózin demokrat sanaıdy jáne «demokratıa árkimge senimmen ómir súrýge múmkindik beredi» deıdi. 

Sholýshy: Gúlim Jaqan