Búgin Astanada eki el arasyndaǵy dıplomatıalyq qarym-qatynastyń ornaýyna 25 jyl tolýyna oraı joǵary deńgeıdegi «AQSH – Qazaqstan» halyqaralyq konferensıasy ótti. Uzaq jylǵy Qazaqstan-amerıkandyq qarym-qatynastyń nátıjesinde ashyq dıplomatıa ornaǵan.
Konferensıa aıasynda ekonomıka men saýda, sondaı-aq, adamı kapıtaldy damytý salalarynda jahandyq jáne aımaqtyq deńgeıdegi eki jaqty seriktestik máseleleri qarastyryldy.
- Eki jaqty qarym-qatynastyń turaqtylyǵy men dınamıkasy memlekettik pragmatıkalyq múddelermen tikeleı baılanysty. Qazaqstan úshin álemdik ekonomıkalyq kóshbasshymen seriktes bolý – bul jahandyq ekonomıkaǵa degen ıntegrasıa. 25 jyl boıy ózara nátıjeli yntymaqtastyq negizi is júzinde de kórinis tapty, - dedi óz sózinde Qazaqstan Respýblıkasynyń Tuńǵysh Prezıdenti – Elbasy Qory janyndaǵy Álemdik ekonomıka jáne saıasat ınstıtýtynyń dırektory Erjan Saltybaev.
Konferensıaǵa qatysýshylar talqylaǵan eki jaqty seriktestiktiń negizgi tustary retinde Qazaqstan men AQSH arasyndaǵy jahandyq ıadrolyq qaýipsizdik prosesin nyǵaıtýdaǵy yqpaldastyqty ataýǵa bolady.
- Biz erikti túrde qýatty ıadrolyq arsenaldan bas tartqan bolatynbyz. Álemde eń alǵashqylar bolyp Semeı ıadrolyq polıgonyn máńgige japtyq. Kórshiles eldermen birge ıadrolyq qarýdan azat Orta Azıalyq aımaqty qurdyq. Óz kezeginde, AQSH Nann-Lýgara baǵdarlamasy arqyly Nursultan Nazarbaevtyń bastamasymen qurylǵan antıadrolyq qozǵalysty nasıhattaýǵa súbeli úles qosty. Sonymen qatar, biz Qazaqstan kóshbasshysynyń antıadrolyq strategıasynyń jahandyq sabaqtastyǵy týraly da aıta alamyz. Sebebi, ıadrolyq qaýipsizdik Samıtin ótkizýde AQSH quryltaıshy boldy, - dedi E. Saltybaev.
ÁESI dırektorynyń aıtýynsha, AQSH-tyń Orta Azıadaǵy «S5+1» atty jańa strategıasy aımaqtyq qaýipsizdik, Orta Azıada ekonomıkalyq seriktestikti damytý, sonyń ishinde aımaqtyń kóliktik ál-aýqatyn arttyrý boıynsha eki el arasyndaǵy qarym-qatynasty nyǵaıtýda mańyzdy serpin bolmaq.
Konferensıa jumysyna amerıkalyq taraptan AQSH-tyń QR elshisi Djordj Krol, AQSH-tyń QR eks-elshileri Djon Ordveı, Elızabet Djons, Rıchard Hoýgland qatysty. Qazaqstan tarapynan Memlekettik hatshy Gúlshara Ábdiqalyqova, Syrtqy ister mınıstriniń orynbasary Erjan Ashyqbaev, Ulttyq ekonomıka vıse-mınıstri Madına Ábilqasymova jáne ózge de memleket jáne qoǵam qaıratkerleri, ǵalymdar men sarapshylar qatysty.
Anyqtama: Sharany uıymdastyrýshy QR Tuńǵysh Prezıdenti – Elbasy kitaphanasynyń taldaý ortalyǵy, AQSH-tyń Qazaqstandaǵy elshiligi jáne QR Syrtqy ister mınıstrliginiń qoldaýymen QR Tuńǵysh Prezıdenti – Elbasy Qory janyndaǵy Álemdik ekonomıka jáne saıasat ınstıtýty bolyp tabylady.
ÁESI Qazaqstan Respýblıkasy Tuńǵysh Prezıdentiniń memlekettilikti qalyptastyrý men nyǵaıtý, halyqaralyq yntymaqtastyqty damytý men beıbitshilik pen turaqtylyqty qamtamasyz etýge qosqan úlesin zertteıdi. ÁESI pikirtalas alańy Ult Kóshbasshysynyń strategıalyq bastamalaryn jan-jaqty nasıhattaý aıasynda jáne olardy júzege asyrý joldaryn qalyptastyrý boıynsha jumys isteıdi.
