Óskemen qalasyndaǵy SHQO balalar jáne jasóspirimder kitaphanasynda Qazaqstan Jazýshylar jáne Jýrnalıser odaǵynyń múshesi, balalar jazýshysy Tolymbek Ábdiraıymnyń «Aǵyl-tegil» atty kitabynyń tusaýkeser rásimi ótti.

Tusaýkeserge kitap avtory Astanadan arnaıy kelip qatysyp, balalarmen kezdesti. Tusaýkeser rásimine kelgen qala mektepteriniń oqýshylary avtordy suraqtyń astyna aldy. «Bilsem, kórsem, uqsam» deıtin quımaqulaq balalar jazýshynyń shyǵarmalary jaıynda kóńilderinde júrgen suraqtardyń jaýabyn Tolymbek Ábdiraıymnyń óz aýzynan estip, qanyqty. Qaladaǵy №16 mekteptiń oqýshylary jazýshynyń «Ine men jip» ertegisiniń jelisinde qoıylym qoıdy. Osy shara úshin elordadan arnaıy at terletip kelip, kitaphananyń kishkentaı oqyrmandarymen syr shertisken jazýshyǵa kitaphana dırektory Gúlzada Karchalova alǵysyn bildirdi. Tolymbek Ábdiraıym - Aıagózdiń týmasy. Eńbek jolyn burynǵy Shubartaý aýdanynyń «Jańa ómir» gazetinen bastaǵan. Odan keıin Alataýǵa at basyn burǵan jýrnalıs «Alataý juldyzy», «Jetisý», «Qazaq ádebıeti» syndy basylymdarda, Kókshetaý teleradıo komıtetinde eńbek etken. 2006 jyldan beri Mádenıet jáne aqparat mınıstrligine qarasty «Jas órken» JSHS‑niń Astanadaǵy ókili. Búginge deıin balalarǵa arnalǵan 117 áńgime, úsh hıkaıa, 25 ertegi jazǵan.