Bizdiń anyqtama:
TALAPBEK TYNYSBEKULY 1982 JYLY 17 QAZANDA ALTAIDYŃ QABASYNDA TÝǴAN. ÁL-FARABI ATYNDAǴY QAZUÝ-DİŃ MAGISTRANTY. AQYN, HALYQARALYQ JAZÝSHYLAR ODAǴYNYŃ MÚSHESİ. ÓLEŃDERİ RESPÝBLIKALYQ BASYLYMDARDA JIİ JARIALANYP JÚR. «JEZBUIDA» JASTAR QOǴAMDYQ BİRLESTİGİNİŃ TÓRAǴASY.
–Talapbek myrza, Qazaq eliniń táýelsizdigi men tutastyǵyn saqtaý úshin soltústik óńirge kóshý qajet degen uran kóterilse, siz ol jaqqa barar ma edińiz?
– Árıne! Qazaqstan ısi qazaqtyń jalǵyz otany ekenin eskersek, onyń táýelsizdigin kózdiń qarashyǵyndaı qorǵaý – ár qazaqtyń buljymas boryshy. Sondyqtan bul suraǵyńyzǵa oılanbastan osylaı jaýap berýge týra keledi.
– Bul suraqty sizden surap otyrǵan sebebimiz: jýyqta Qazaqstan ókimeti eldiń soltústik óńirin qazaqylandyrý maqsatynda ońtústikten kóship baratyn jurtty yntalandyrýdy qamtamasyz etetin zań qujatyn daıyndaýǵa kiristi. Al siz atamekenge burynyraq oralǵan azamat retinde Qytaı elinen bizge qaraı bet burmaq baýyrlarǵa osy jaǵdaıdy aıan etseńiz, bul bastamanyń baıandy bolýyna úles qossańyz degen oı ǵoı...
– Qazaqta «Bos jatqan jer jaý shaqyrady» degen sóz bar. Sondyqtan elimizdiń ishki kóshi-qonyn jandandyryp, ultymyzdyń upaıy ketken soltústik aımaqtardy qazaqtandyrý – eldik maqsattaǵy bútin sharalardyń biregeıi bolýy kerek. Bul turǵydan bıliktiń naqtyly is-qadamdarǵa baryp, júıeli zań jobalaryn daıyndaýy bárimizdi qýantady. Búginde jalpy astyqtyń 30 paıyzy, anyǵyraq aıtsaq, 5 mıllıon tonnadan artyq astyq túsip otyrǵan, jeri shuraıly soltústik oblystarǵa tek elimiz qazaqtaryn ǵana emes, shetelden keletin qandas aǵaıyndardy da júıeli túrde ornalastyrýdy qolǵa alyp, naqtyly is-sharalar atqarylýy qajet. Sonda ǵana sanaýly jyldarda-aq qonystanǵan halyq qońdanyp, búginnen beter beıimdelip keteri anyq. Bul turǵyda ótimdi úgit-nasıhatpen qosa, shynaıy is-sharalar uıymdastyra bilý kerek. Halyqty jańa qonysqa ornalastyrý at ústinen bılik aıtyp, qol ushymen jasaıtyn jumys emes.
– Shynaıy is-shara dedińiz be? Bul sózdi qozǵaǵanda, siz sebepker bolǵan bir oqıǵa sanamyzda qylt beredi. Ótken jyly siz Qytaıdaǵy Altaı óńiri qazaq jastary arasynda ulttyq qozǵalys týdyrdy degen alyp-qashpa sózdi ınternet jelisinen oqyǵan edik. Osy jaǵdaıdyń jaı-japsary qalaı bolǵan?
– Iá, mundaı qaýesetterdiń bolǵany ras! Sebebi ondaǵy qazaqtardyń Qytaı bıliginen kórgen teperishine qarsy azat oıyna kórsetken qoldaýymnan bolsa kerek. Sońǵy jyldary Qytaıdaǵy qandastarymyz qonystarynan aıyrylyp, qanattarynan qaıyrylyp jatqandyqtan, jer daýy jıilep, sonyń saldarynan jeıtin taıaqtary da kóbeıdi. «Qazanshynyń erki bar – qaıdan qulaq shyǵarsa» degen sóz bar ǵoı, Qytaı bıligi úshin bul túk te ábestik emes. Jazylmaǵan zań boıynsha da el ıesi óz óktemdigin júrgizýge quqyly. Degenmen, qazaq – otansyz bosqyn, ıesiz – jetim, suraýsyz – sorly emes. Onyń ıesi de, kıesi de – Táýelsiz Qazaqstan, qaýqarly Qazaqıa! Sol úshin de Qytaı saıasaty qansha ozbyrlyqqa barsa da, ondaǵy qazaqpen sanaspaı bolmaıdy. Sondyqtan bul taqyryptardaǵy kózqarasymdy ashyq bildirip, ondaǵy qandastarymyzdyń kórgen qorlyq, tartqan azabyn elimiz aqparat quraldarynda der kezinde kóterip, tıisti oń sheshimin tabýyna yqpal etken bolatynmyn. Ári Qytaıdaǵy ultshyl azamattardy attanysqa keltirip, arashaǵa shyǵarǵanym ras. Bul táýelsiz eldegi bizdiń azamattyq boryshymyz! Qytaıdyń qol astyndaǵy qazaqtarǵa ǵana emes, táýelsizdik alǵan jyldardan bastap elimizge túrli sebeptermen dendeı kirip, ańqaýlyǵymyzdy ańǵaryp, jerimizdi jalǵa alyp, baılyǵymyzdy maldanyp, ozbyrlyqpen jan baǵyp, qymqyrýǵa qamdanyp jatqanyn ashyq aıtyp, jazǵannyń biri bolǵanymdy jasyrmaımyn. «Qazaq endi qytaıǵa qul bola ma?» atty derekti zertteý maqalam tóńireginde kezinde kóp sóz bolyp, talaı oıdyń muryndyǵyna aınalǵan.
– Árıne, mundaı qoǵamdyq deńgeıdegi másele bizdiń qylt etkendi qyrǵısha baqqan qyraǵy bıliktiń nazarynan qaǵys qala qoımasa kerek. Sonda bizdiń bılik tarapynan áldeqandaı emeýrinmen bolsa da arasha túsý nıeti bolǵan joq pa?
– Men eshqashan elden enshi dámetken pende emespin, bılikten de solaı. Táýelsizdikke qaryzdar urpaq retinde qıyrdaǵy qandastarymyzdyń qulaǵanyn súıep, jylaǵanyn ýata alsaq, bostandyqtan alǵan enshimiz sol bolmaq. Al bizdiń táýelsiz qazaq elindegi ult úshin urandatqan aıqaıdan eshkimniń shekesi qyza qoıǵanyn kórgem joq, men de solardyń birimin desem, artyq aıtqanym emes.
– Munyń nesin aıtasyz, artyq aıtpaǵanyńyzǵa barlyq qazaqı BAQ kýá deýge bolady. Sebebi sizben suhbattasýǵa daıyndyq barysynda ınternette jarıalanǵan bir maqalańyzdy oqydym: onda qazaqstandyq úkimetke bes talap aıtypsyz. Sonyń biri – elge oralǵan qandastardyń eseli eńbegi men jetken jetistigin baǵalaý maqsatynda ulttyq arnadan jarty saǵattyq baǵdarlama ashý jaıy bolǵan eken. Osy talap-tilegińizdiń ázirge oryndalatyn túri bar ma?
– Men ózim atamekenge at arytyp, ton tozdyryp kelgen sol bir kúnderden bastap kóshi-qon saıasatymen tike aralasyp kettim. Shynyn aıtsam, aralasýǵa májbúrledi. 2002 jyly Qazaqstanǵa óz aıaǵymen kelgen 2100 talapkerdi ornalastyra almaı, jarty jyl sandaltqan bizdiń bılik áý bastan-aq bul saladaǵy tájirıbesizdigin meniń sanama uıalatty. Sol kezde Almatyda qańǵyp qalǵan 1500 balanyń biri men bolatynmyn. Odan burynǵysyn bilmeımin, bir biletinim – sodan beri bul sala ońalǵan emes. Al endi «Egemen Qazaqstan» gazetinde 2010 jylǵy Dúnıe júzi qazaqtarynyń tórtinshi quryltaıyna oraı jarıalanǵan «Bizde de bar bir tilek» atty maqalamda elimiz kóshi-qon saıasaty tarapyndaǵy kórineý kemshilikterdi asha kórsetip, óz usynys-pikirimdi aıtqan bolatynmyn. Ókinishtisi – bılik baıaǵy jartas qalpynda qala berdi. «Túıe ústinen gúl tergish» kókeler, salaq basshylyq umtylmaı-aq keledi.
Elimizdiń yqpaldy telearnalarynyń birinen jarty saǵattyq arnaıy baǵdarlama daıyndap, kelgen aǵaıynnyń jetistikterin kórsetip, olardy zańdyq bilimdermen saýattandyryp, baǵyt-baǵdar kórsetsek degenmin. Sol arqyly sheteldegi qandastarymyzdyń elge kelýine jol ashsam degen arman bolatyn. Biraq telearnalardyń tańnan keshke deıingi mánsiz shoý, maǵynasyz serıaldarynan qandastarymyzǵa oryn bolmady. Sondyqtan «Jezbuıda» tóńiregindegi jastar toptasyp, kásipker aǵalarymyzdyń qoldaýymen, Bilál Qýanyshuly deıtin jýrnalıs azamattyń bas bolýymen «Qamshy» aqparattyq portalyn ashqan bolatynbyz. Bir qýanarlyǵy – búgingi qandastarymyzdyń kóz-qulaǵy, qazaqtyń úni osy saıt bolyp otyr.
– Ony aıtasyz-aý, jýyqtaǵy jańalyqty sol «Qamshy» saıty da súıinshilep jazǵan edi. Súıinshili aqparatqa súıensek, shetten kelgen qandastarymyzǵa azamattyq berý máselesin qaıta kóterip, budan keıin azamattyq qujat 6 aı merzim ishinde beriletin bolatyn kórinedi. Ári birqatar jeńildikter qarastyrylǵan eken. Alaıda bul kezekti jobanyń jyl sońyna deıin áldeneshe ret qaıtalap qaraýdan ótetinin, sonan soń baryp parlamentke zań jobasy retinde engiziletinin eskersek, onyń áli de kemshin tusyn aıtýǵa múmkindik bar degen sóz. Osy oraıda shetten kelgen aǵaıyn máselesine sizdiń qandaı alyp-qosaryńyz bar?
– Bul suraqtyń jaýabyn ult kósemi Álıhan Bókeıhanovtyń: «Túbi telim bolǵan qazaqtar basyn qospaı, qazaq – qazaq bolmaıdy», – degen ataly sózimen bastaǵym keledi. Shynyn aıtý kerek, Qazaqstan qazaqqa tolmaı, táýelsizdik baıandy bolmaıdy. Kóshi-qon saıasatyn retke keltirmeı, elimiz eshqashan ulttyq saltanat qura almaıdy. Sebebi úsh qazaqtyń biri shetelde tentirep júrgen eldiń joǵalǵan joǵy túgendele me?! Sol úshin de qazaq kóshi-qony kesheýildetýdi keshirmeıdi. Qazaqıa esh qazaqtyń jeke menshigi emes, ortaq otany! Ári taǵdyry tálkekke túsip, jat topyraqqa tarydaı shashylǵan álem qazaǵy da qara shańyraqtan enshi alýǵa quqyly. Osy turǵyda bılik oılanyp, oıanatyn kúnge jetti dep oılaımyn. Al endi jaqynda shyqqan zań jobasynyń jarnamasy jap-jaqsy. Bul joba talqylaýdan ótip, halyq ıgiligine jetkenshe, tozǵan aǵaıynnyń tózimi taýsylyp, «tekeni ańdyǵan qasqyrdyń» kúıin keshpese bolǵany.
Kóshi-qon salasyndaǵy buryn aıtylǵan oılarymdy qaıtalamaı-aq qoıaıyn. Atamyz qazaqta sóz bar: «Qonaqqa tamaǵyńdy berme, qabaǵyńdy ber» degen, qandastarymyzǵa da osy kerek. Búginge deıin kóshi-qon salasynda ultqa jany ashymaıtyn, halyqpen, naqtyraq aıtsaq, qandastarymyzben qalaı jumys isteýdi bilmeıtin; olardyń mentalıtetin túsinbeıtin shala saýatty, shúldir tildi mamandar jumys istep kelgentuǵyn. Sonyń saldarynan eldiń búgingi kóshi-qony kemtar kúıge tústi. Mine, osy sebepti elge kelgen mıllıonnan asqan qandastarymyzdyń ishinde de esi barlar bar shyǵar, solardyń bilim-qabiletin nege paıdalanbasqa? «Balyqtyń tilin baqa túsinedi» demeı me? Menińshe, jumys ónimdiligin arttyrýdyń bir joly osynda bolsa kerek.
Taǵy bir sheshim kútken másele – tirkeý jaıy. Shetel asyp keletin aǵaıyndardy sendeltpeı, ýaqytsha tirkeý men turaqty tirkeýdi jergilikti oryndardan arnaıy meken-jaı belgilep, bir ortalyqqa shoǵyrlandyrý qajet. Óıtkeni azyp-tozyp, aryp-ashyp áreń jetken qazaqtyń mańdaıynan sıpap, úıine túsiretin qonaqjaılyq qazaqtan ketkeli qashan.
– Ol aıtqanyńyz ras! Atam qazaq sol úshin «Sýdy da sińetin jerine sep» dep aıtqan bolar. Siz kezinde stýdentter máselesin kóterýimen-aq ataǵy shyqqan «Jezbuıda» jastar qoǵamdyq birlestigin qurdyńyz. Sol arqyly qoǵamdaǵy kóptegen qordalanǵan máselelerdi kóterdińizder. Tek keıingi kezderi osy uıymnyń úni estilmeı ketkendeı. Buǵan ne sebep?
– Jasyratyny joq, bir kezde shetelden kelgen qandastarymyz Qazaqstan qoǵamynan beıtarap kúı keshti. Sol úshin de belsendi stýdent jastardyń basyn qosyp, ortaq pikir negizinde quralǵan uıym quryp, bılik pen qandastarymyz arasynda dáneker bolýdy oıladyq. «Jezbuıda» jastar qoǵamdyq birlestigi shetelden kelgen stýdent jastardyń qoǵamǵa belsene aralasýyna, joǵary oqý oryndaryna túsýine, jumysqa ornalasýyna aıtarlyqtaı úlesin qosty. Sondaı-aq kóshi-qon saıasatyna da belsene aralasyp, kóptegen is-sharalardyń oń sheshimin tabýyna yqpal etti. Óz kezinde bıik minberlerden kórinip, bılik sanasatyndaı deńgeıge jetkeni jasyryn emes. Jastar uıymynyń bir tarmaǵy retinde shetelden kelgen ónerpaz jastardyń basyn qosyp, birlestik janynan «Qara jorǵa» óner ujymyn qurdyq.
Sóıtip, ónerpazdardyń ónerin nasıhattaýǵa, halyqqa tanylýyna jol ashtyq. Sonyń nátıjesinde kúlli Qazaqstan jurtshylyǵyna «Qara jorǵa» bılettik desek te bolady. Jáne de Qytaıdan kelgen talapker jastardyń ýnıversıtetke túsýi úshin «dıplom rastatý» degen jeleýmen Bilim jáne ǵylym mınıstrligi tarapynan jınalǵan qarjyǵa birlestik jetekshisi retinde «Jas Alash» gazetine «Oralman stýdentterdi oılandyrǵan on myń teńge» atty maqala jarıalap, alǵash toıtarys bergenim esimde. Sol kezde kóptegen stýdentter «bir joldyq shákirtaqymyzdy sizge beremiz» dep jınalyp, jataǵyma kelgeni áli kóz aldymda. Qazaq qoǵamyndaǵy kez kelgen ulttyq, qoǵamdyq mańyzdy sharalardan birlestik músheleri beıtarap qalǵan emes.
Jasyratyny joq, 2010 jyly 8 jeltoqsan kúni áldebir teksiz kirmeniń, atyn aıtyp, abyroıyn ashpaı-aq qoıaıyn, qastandyǵymen jabylǵan top meni soqqyǵa jyǵyp, bir jarym jyldan astam ýaqyt sonyń álegimen boldym. Árıne, az ýaqyt emes, osy aralyqta qanshama energıa joǵalttym. Qudaıǵa shúkir, kórer jaryǵym bar eken, tiri qaldym!
Taǵy da Álekeńniń, Álıhannyń sózimen aıtsam, «tiri bolsam qazaqqa qyzmet qylmaı qoımaımyn». «Jezbuıda» jumystary munymen toqtap qalǵan joq, bul shetelden kelgen zıaly jastardan quram tapqan alǵashqy qurylǵan birlestik bolǵandyqtan, alda atqarylar jumys-josparlar da az emes, búgingi toqyraǵan qazaq kóshiniń buıdasyn óz qolyna alar dep senemin.
– Stýdent jyryn aıtamyz-aý, bıylǵy jyly elimizdiń joǵary oqý ornyna túsýge nıettenip, shetten kelgen qandas baýyrlarymyzdyń qarasy mol desedi. Sonymen qatar syrttan kelgen shákirtter qatarynda Úrimshidegi at tóbelindeı qazaq zıaly azamattarynyń uly-qyzy kóptep jolyǵatyn kórinedi. Osy jastardyń búgingi jaı-kúıi qalaı ekenin bile aldyńyz ba? Olar óz atamekeninde ógeılik kórip júrgen joq pa?
– Durys aıtasyz, bıylǵy kelgen talapker túlekterdi kórip, araǵa biraz jyldar salyp toqtap qaldy deýge aýyz barmaıdy, toqyrap qalǵan aǵaıynnyń kóshi qaıta jandanǵandaı kúı keshtim. Shynyn aıtý kerek, bul jastardy bizdiń kezdegi kelgendermen múlde salystyrýǵa kelmeıdi. Bular – 90-jyldardan keıingi bir úıdiń kenjesi, bir shańyraqtyń tuńǵyshy, bireýdiń jalǵyzy bolǵan túgel erkeler men serkeler. Sondaı-aq qytaı mentalıteti boılaryna sińe bastaǵan múlde jańa urpaq. Olardyń elge kelip, oqyp, beıimdelip, kirigip ketýi óte qıyn. Sol sebepti de bul urpaqpen jan-jaqtyly kóp jumys jasaýǵa týra keledi. Sońǵy jyldary siz aıtqan Úrimshidegi aqjaǵalylar balalaryn osynda ákelip, oqýǵa bere bastady. Bul ol jaqtaǵy aǵaıyndarǵa bir tyqyrdyń taıaǵanynan habar beredi. Qytaıda júrgenimde «Qazaqstanǵa barý úshin oryssha úırenbeseń bolmaıdy eken» dep, jınalyp muǵalim jaldap, jantalasyp oryssha úırenip júrgen jastardy kórip, jaǵamdy ustaǵan edim. Áli de sol qasiret. Qaıda barsa, aldynan shyǵatyn orys tildi saqaý qazaqtar. Bul – tek oqýǵa kelgen talapker jastarǵa ǵana emes, jalpy qazaq kóshine kedergi bolyp otyrǵan máselelerdiń mańyzdysy.
– Jýyqta otandyq «Kazakh TV» arnasynda syr-suhbatta bolǵanyńyzdy bilemiz. Sol arada aqyn retinde jas urpaqty naǵyz otansúıgishtikke baýlıtyn jalyndy jyrlaryńyzdy estidik. Jalpy, siz syrttan kelgen aqyn retinde mundaǵy ádebı ortada shetqaqpaı kórip júrgen joqsyz ba? Bolmasa ekiniń biriniń aty atalatyn el aýzyndaǵy «aqyndar tiziminde» Talapbek aqyn nege atalmaı júr?
– Rahmet! Bul jobany qolǵa alyp, ár qıyrdan kelgen qandastarymyzdyń qazaq elindegi óz eńbegimen oıyp turyp alǵan ornyn kórsetip, nasıhattap júrgen Erbol baýyrymyzǵa kóp alǵys aıtamyn. Bul da shettegi aǵaıyndy elge shaqyrýdyń utymdy tásilderiniń biri. Men eshqashan tanylý men kórinýge talpynǵan emespin. Jalǵan jarnamany janym súımeıdi. Mundaǵy úlken ádebı ortaǵa stýdent kezimnen aralastym. Eshqandaı shetqaqpaı kórgen joqpyn. Qaıta kóptegen gazet-jýrnal, radıolarda shyǵarmalarym jarıalanyp, arnaıy tanystyrýlar boldy. Birqatar respýblıkalyq, halyqaralyq músháıralarda júlde aldym. Jekelegen álmanahtarda shyǵarmalarym toptastyryldy.
Jasyrmaımyn, jaǵympazdyq jaılap, top pen jiktiń jarapazanyna aınalǵan jalǵan ádebı ortaǵa arymdy bylǵaǵan emespin. Olaı ýaqytymdy da ótkizgim kelmeıdi. «Aqyn bolý óz isiń, azamat bolý boryshyń» deıdi halyq danalyǵy. Óleń – táńirden alǵan ómirlik enshim, eshkimniń talasy joq menshigim. Qashan bolsa da jazylar, jarıalanar. Ádebı ortamen sarań aralastym. Jalǵan ataq, arzan abyroı izdegen joqpyn. Al endi sizge unaǵan óleńder ózgeni de beıjaı qaldyrmas. Tek jarnamasy jetpeı jatqan bolar. Sebebi óz qatarymdaǵylar arasynda kitaby memlekettik tapsyryspen shyqpaǵan – men ǵana ekenmin. Buıyrtsa, ol da bolar. Osy rette bir nárseni basa aıta ketýimiz kerek. Biz táýelsiz Qazaq eli aldynda arttaǵy bes mıllıon qandastarymyzdyń taǵdyryna qaryzdarmyz. Sol úshin jumys jasaýymyz kerek!
– Óleń degennen shyǵady. Osydan birer kún buryn Qazaqstan Jazýshylar odaǵynda «Qulmanbettiń qulyny» atanǵan aıtýly aıtysker aqyn, marqum Orazáli Dosbosynovty eske alý keshi ótti. Aıtpaǵymyz, sol keshte bir aǵamyz jazba aqyndardy jerden alyp, jerge saldy. Ol kisiniń aıtýynsha, aıtysker aqyndar ǵana shyndyqty shyrqyratyp aıtyp júrgen kórinedi. Aqyn retinde buǵan aıtar ýájińiz qandaı?
– Abyz halyq «Bıtke ókpelep, tonyńdy otqa tastama» degen ǵoı. Bir shal «shyndyq aıtpadyńdar» dedi eken dep búkil jazba aqyndarǵa topyraq shashýǵa kelmes. Degenmen, jetkize almaı jatqan jerimiz de bar. Biraq keıde «hannyń sózin qara da aıtady – aýzynyń dýasy joq» degendi umytpaýymyz kerek. Aıtys sahnalyq, jarnamalyq, halyqtyq sıpat alatyndyqtan, aıtylǵan sózder áserli, ári taralymdy bolady. Sondyqtan bar shyndyqty aıtyskerler aıtyp jatqan syńaıly bolyp kóriner. Áıtpese sol shalyńyz keshegi Alash aqyndarynyń, búgingi táýelsiz jas býynnyń jyrlaryn tolyǵymen oqyp kórsin: qaıta shyndyqtyń ne ekenin, qalaı aıtý kerektigin sezinetin bolar. Mundaıda «kózáınek deseń, soqyrǵa tıedi» degendeı, aqyndardyń qaı tıpi bolsyn aıtpaı, jazbaı jatqan joq. Tek saralap, saraptaı bilýde ǵoı áńgime!
– Áńgime degende, salmaqty áńgimemizdiń altyn tarazydaǵy ýaqyty túgesilýge shaq qalypty-aý! Endi sirge jıar sońǵy suraǵymyzǵa kóshsek: bıyl bir jyl boıy Er Jánibek batyrdyń 300 jyldyǵyna oraı as berip, túrli mádenı shara uıymdastyrdyńyzdar. Árıne, buǵan muryndyq bolǵan «Er Jánibek» halyqaralyq qoǵamdyq qory ekenin aıryqsha ataı ketkenimiz jón bolar. Sol atalmysh Qordyń qazanynda qaınap júrgen azamat retinde aldaǵy josparlaryńyzben bólise otyrsańyzdar.
– «Er Jánibek» Halyqaralyq qoǵamdyq qory bıylǵy 300 jyldyq jumys baǵdarlamasy aıasynda biraz aýqymdy is-sharalardy halyqaralyq, memlekettik deńgeıde atap ótip keledi. Bul jerde Qordyń jumysy tek Er Jánibek batyrdy nasıhattaý nemese bir rýdyń tulǵalaryn tanytý degen túsinik bolmaý kerek. Bul Qordyń da eń úlken jumystarynyń biri – qandastarymyzdyń elge oralýyna, qonystanýyna, jumyspen qamtylýyna jol ashý. Sol turǵydan bıylǵy astyń keń aýqymda atalyp ótýi shetelden kelgen aǵaıynnyń eńsesin tiktep, keler aǵaıynǵa rýh syılady desek bolady. Osy keler jyly elimiz kóleminde atalyp ótkeli otyrǵan Qazaq handyǵynyń qurylǵandyǵynyń 550 jyldyǵyna oraı «Qamshy» aqparattyq portalynyń uıymdastyrýymen jarıalanǵan halyqaralyq poezıa, proza, maqalalar báıgesiniń bas júldesin de atalǵan Qordyń tigýi – alda isteler keń aýqymdy jumystardyń biri.
– Endeshe sáttilik bolsyn, Talapbek myrza!
Suhbattasqan –
Qozybaı QURMAN,
«D»
