Tarazda alty keli tartatyn alyp sábı týyldy. Qalalyq perınataldyq ortalyqta dúnıege kelgen náresteniń salmaǵy 6 keli 300 gram, al, boıy 67 santımetr. Sıpattap aıtsaq, ol qalypty baladan eki ese úlken. Oǵan otbasy Olga dep at qoıdy. Anasy Alena Premýshko jańa bosanǵan qyzyn otbasyndaǵy úshinshi perzent ekenin aıtady. Ekinshi balasymen arasyndaǵy úzilis 9 jyl bolǵanyna qaramastan, 29 jastaǵy jas ana esh qıyndyqsyz ári otasyz bosanǵan. «Áldıimizdiń salmaǵyn estigende tegis qýandyq», - deıdi. Qazir kelinshektiń kúıeýi is saparmen Qyrǵyzstanda júrgendikten, qyzyn áli kórmegen eken, dep habarlaıdy Qamshy.kz aqparat agenttigi Astana arnasyna silteme jasap.
Alena Premýshko, anasy:
"Óte qatty tolqyp turmyn. Shattyǵymyzda shek joq. Qyzymnyń salmaǵy 6 keli 300 gramǵa jýyq degende, talyp túse jazdadym. Aldyńǵy balalarym 3 keliden asa týylǵan. Bul qyzymnyń salmaǵy biz úshin rekord endi. Balapanymdy bosanar aldynda ÝDZ apparatyna tekserildik. Sol kezde sábıimniń salmaǵy 4 keli 200 gramdy kórsetti. Oǵan birese tańyrqap, birese qınalyp qalam ba dep qorqaqtaǵanym ras. Alaıda, dárigerlerdiń arqasynda bári jaqsy ótti".
6 keli náresteniń týǵanyn qala halqy lezde estip qoıǵan. Kútpegen jańalyqqa kúlli Taraz qýanyp qana qoımaı, balanyń túrin kórgisi kelip perzenthanaǵa aǵylǵan. Shahar halqyn shattyqqa bólegen shaqalaq qazir anasymen birge qalpyna keltirý, ońaltý palatasynda. Qazir analar úıi aldynda alyp sábıdiń anasyn quttyqtaýǵa asyqqan adamdardyń qarasy qalyń. Tipti, kelinshekti bosandyrǵan aq halattylardyń ózi «6 keli Alpamys týyldy» dep jurttan súıinshi suraǵan. Dárigerler balanyń densaýlyǵy jaqsy ári esh aqaýsyz dúnıege keldi deıdi.
Elvıra Atabaeva, Taraz qalalyq perenataldyq ortalyǵynyń akýsher-gınekology:
"Bosandyrýǵa bar-joǵy jarty saǵat ýaqyt jumsadyq. Bul bizdegi birinshi jaǵdaı emes. Osy ortalyqta osydan 7 jyl buryn salmaǵy 6 keli 500 gram bolatyn sábı týylǵan. Ol kóp bosanýshy áıel bolǵan soń, kesir tiligimen bosandyrǵan edik. Al, Alena óz kúshimen tabıǵı jolmen dúnıege ákeldi".
