Týǵan jerimizdiń tórinde búgingi tańda ótip jatqan EKSPO-2017 halyqaralyq mamandandyrylǵan kórme adamzattyń damý tarıhyndaǵy, dúnıejúzilik órkenıettiń órleý tarıhyndaǵy mańyzdy oqıǵa. Kıeli qazaq jerinde dúnıejúzilik kórmeniń ótýi – «Alyp jatqan jarty dúnıe álemin, Qazaqstan deıtin meniń bar elim» dep aqyn Qasym Amanjolov maqtanysh etken halqymyzǵa úlken abyroı. Ortalyq Azıa elderinde, TMD keńistiginde tuńǵysh ret ótkizilip jatqan jahandyq joba Qazaqstandy álemdik qaýymdastyqtyń bir bólshegi retinde dúnıe júzine taǵy bir ret tanyta túsedi. Álemdik órkenıet qazynasyn toltyratyn ulttyq qundylyqtardy jurtshy­lyqqa pash etetin halyqaralyq kórme táýelsiz el retinde irgesin bekitken Qazaq­stannyń álemdik saıasat sahnasynda qanatyn keń jaıyp keletinin kórsetedi. Asqaqtaǵan Astanadaǵy dúnıejúzilik saltanatty sharanyń ótýine úlken úles qosyp júrgen eriktilerdiń eńbegi erekshe ekeni sózsiz. Aıta keterligi, úsh aı boıy izgi sharaǵa atsalysatyn 4500 eriktilerdiń arasynda 900 almatylyq erikti  bar. Maǵjan aqyn sengen bul jalyndy jastar týǵan eline qyzmet etýde ózgeshe ónege kórsetýde. Biz osy oraıda, dúnıejúzilik tarıhı oqıǵany tamashalaý úshin álemniń ár túkpirinen kelgen qonaqtarǵa ár túrli baǵyt boıynsha qyzmet kórsetken almatylyq eriktilermen áńgimelesken edik.

Erasyl QUMARIOLDANOV,

Eýrazıalyq tehnologıa­lyq ýnıversıteti

elektroenergetıka fakúltetiniń 2-kýrs stýdenti:

Bul kórme álemdegi  myń san mádenıetti Astana tórinde toǵystyrdy

– Eńseli Elordamyzda ótip jatqan EKSPO-2017 kórmesi Qazaq elin kúlli álemge pash etti. Dúnıe júzindegi alpaýyt memlekettermen qarym-qatynasymyzdy nyǵaıtýda bul kórmeniń mańyzy zor. Kórmedegi ár túrli mádenı sharalar sheteldik qonaqtardy túp-tamyry tereńde jatqan ulttyq ónerimizdiń qazynalarymen sýsyndatady. İshki mazmunymen, biregeı sáýletimen kórermenderdi tamsandyratyn «Nur Álem» sferasy da, jalpy búginde álemge tanylǵan aıbarly Astanamyz da  árbir qazaqstandyqtyń júreginde maqtanysh sezimin laýlatady. Bul kórme ǵalamat ǵalamdaǵy myń san mádenıetti Astana tórinde toǵystyrdy. Maǵan Germanıanyń pavılonyndaǵy aqyldy úı men elektrkólikteri óte unady. Bul tabıǵatty taza saqtap qalýǵa septigin tıgizetin tıimdi tásil eken. Sondaı-aq, energıany qarapaıym júgeriden jáne ár túrli ósimdikterden óndirýge bolatynyn pash etetin Taıland pavılonyn da qyzyǵa tamashaladym. Eriktiler únemi táýelsiz elimizdiń tarıhynda mańyzdy oryn alatyn jarqyn oqıǵalardyń ortasynda júredi. Erikti atanǵan azamat qyzmet barysynda ómirlik tájirıbe jınaqtap, qoǵamdaǵy adamdarmen til tabysa bilýdiń ár túrli tásilderin meńgeredi. Sondyqtan eriktilik elimizdiń erteńin jalǵaıtyn, keleshegi­mizdiń kirpishin qalaıtyn jastar úshin óte mańyzdy ómirlik tájirıbe bolyp tabylady.

Qymbat NURDÁÝLET,

Abylaı han atyndaǵy Qazaq halyqaralyq qatynastar jáne álem tilderi ýnıversıteti aýdarma jáne fılologıa fakúltetiniń 4-kýrs stýdenti:

Sheteldik qonaqtardy elimizdiń tarıhymen tanystyrdyq

– EKSPO-2017 halyqaralyq maman­dandyrylǵan kórme – álemdik keńistikke shyqqan táýelsiz qazaq eliniń tarıhyndaǵy eleýli oqıǵa. Astana qalasyndaǵy dúnıe­júzilik kórmede Almatydan aı saıyn 300 erikti, al úsh aıda 900 erikti kelip qyzmet kórsetpek. 2015–2017jyldary «Eriktiler lıgasynyń» jetekshisi Azız Kajdenbek pen atqarýshy dırektor Meıram Baıgý­jekov kastıng ótkizip, EKSPO-2017 kórmesinde qyzmet kórsetetin eriktilerdi irikteý jumystaryn júrgizdi. Bul álemdik kórmede men maýsym aıynda eriktilik baǵytyndaǵy tım lıder (Team leader) qyzmetin atqardym. Almatyda ótken Dúnıejúzilik Qysqy Ýnıversıadadaǵy koordınatorlar sekildi, bul kórmede de eriktilerdiń jaǵdaıyn jasaıtyn, olardyń qyzmetterin bólip berip, topty uıymdastyryp turatyn sýpervaızerler bar. Olarǵa berilgen belgili bir aýmaqtyń jartysyn sýpervaızerler basqarsa, al teń jartysyn basqarý mindeti tım lıderlerge júkteledi. Bul halyqaralyq shara barysynda otandyq telearnalar sheteldik qonaqtardan suhbat alǵan sátterde aǵylshyn tilinde aýdarma jaǵynan kómek kórsettim. Álemdik kórmede biz barynsha sheteldik qonaqtardy egemen elimizdiń taǵylymdy tarıhymen tanystyrýǵa tyrystyq. Muhıttyń arǵy jaǵynan kórmeni kórýge kelgen meımandardy halqymyzdyń qanyna sińgen qonaqjaı qasıeti erekshe tańǵaldyrdy. Bul jahandyq jobada aǵylshyn tilinen aýdarmashy retinde sheteldik azamattarmen aralasýym bolashaq mamandyǵym boıynsha tájirıbe jınaqtaýyma septigin tıgizdi.

Darhan QURMANBAEV,

T.Rysqulov atyndaǵy Qazaq ekonomıkalyq ýnıversıteti qarjy fakúltetiniń 2-kýrs stýdenti:

Eriktilik – ómir mektebi

– Búgingi tańda dúnıe júziniń qyzyǵýshylyǵyn týdyrǵan EKSPO-2017 kórmesin kórý úshin álemniń ár túkpirinen Astanaǵa asyqqan adamdardyń sany kún saıyn kóbeıip keletini biz úshin úlken qýanysh, ári zor maqtanysh. Kúlli álemniń nazaryn aýdarǵan bul kórmeden esten ketpes erekshe áser alǵan kórermenderdiń jadyraǵan júzderi júregińizdi jylytady. Elimizde ótip jatqan bul aýqymdy sharada biz barynsha kórermen ýaqytyn tıimdi paıdalanýǵa kómektesýge tyrystyq. Mysaly,  keıbir pavılondardyń aldynda kezekte turǵan kórermenniń qatary qalyń bolsa, keıbirinde adam sany aıtarlyqtaı az bolýy múmkin. Kórmege kelgen qonaqtar kezekte turyp, altyn ýaqytyn bosqa joǵaltyp almaýy úshin biz olarǵa adam az pavılon­dardy tamashalaýǵa keńes berip, kórermen kezegin rettep otyrdyq. Halyqaralyq kórmede tım lıder retinde qyzmet atqarǵan maǵan eriktilerdiń eńbegine baılanysty jaýapkershilik júkteldi. Tım lıderler kórmede kórer­menderge qyzmet kórsetetin eriktilerdiń bir jaǵadan  bas,  bir  jeńnen  qol shyǵaryp, qyzmet etýine barynsha jaǵdaı jasaıdy. Kórme barysynda eriktiler belgilengen jerde aýysymmen kezektesip qyzmet kórsetedi. Bir aýysym ýaqyty 8 saǵatqa jalǵasady. Aıta keterligi, gúlzarlarda 8 saǵat boıy jazdaǵy aptap ystyqta kúnniń astynda turý ońaı sharýa emes. Sondyqtan, gúlzarda turǵan eriktini eki saǵattan keıin pavılondarǵa aýystyryp otyrdyq. Eriktilik joly jaqsylyqqa jetelep, jastardyń júreginde meıirimin molaıtady, týǵan eline, týǵan jerine degen súıispenshiligin oıatady. Oılap qarasam, Almatydaǵy «Eriktiler Lıgasynda», 28-Dúnıejúzilik Qysqy Ýnıversıadada jáne EKSPO-2017 kórmesinde eriktiler qatarynda qyzmet etýim, naǵyz ónegeli ómir mektebi tárizdi meni ómirde kóp nársege úıretti.

Áıgerim BÁZİLJAN,

Halyqaralyq bıznes ýnıversıteti qarjy fakúltetiniń

2-kýrs stýdenti:

Astanada eriktilerge barlyq jaǵdaı jasalǵan

– EKSPO-2017 kórmesinde eriktilerdiń qataryna qosylýyma Almatydaǵy 28-Dúnıejúzilik Qysqy Ýnıversıadada jınaqtaǵan tájirıbem yqpal etti. Jastardyń jahandyq jarysynan keıin eriktilikke qyzyǵýshylyǵym burynǵydan da arta tústi. Sebebi, eriktilik qyzmeti bolashaqtyń kirpishin qalaıtyn jastardyń qoǵam ómirine belsendi aralasýyna, ómirlik tájirıbe jınaqtaýyna úlken jol ashady. Eriktilik jastardyń qanatyn qataıtyp, olarǵa óz jumysyna jaýapkershilikpen qaraýdy, adamdarmen til tabysýdy, kómek kórsetýdi, qıyndyqtarmen kúresýdi úıretedi. Biz  eriktilerge barlyq jaǵdaı jasalǵan L.Gýmılev  atyndaǵy  Eýrazıa  ulttyq ýnıversıtetiniń jataqhanasynda almatylyq alty qyz bolyp turdyq. EKSPO-2017 kórmesinde eki aýysym boıynsha eńbek ettik. Birinshi aýysym tańǵy saǵat 9:00-dan keshki saǵat 16:00-ge deıin bolsa, al ekinshi aýysym keshki 16:00-den túngi saǵat 24:00-ge deıin jalǵasty. Araıly Astana ajarymen adamdy qanattandyrady ári shabyttandyrady. Aınalaǵa aq nuryn shashqan arý qalada ýaqyttyń qalaı ótkenin kóbinese baıqamaı qalatynbyz. Adamdarmen aralasqan saıyn janymyz jadyrap, aınaladaǵy keremet kórinisten kóńilimiz kókke órledi. Biz Elordamyzǵa kelgen qonaqtar men sheteldik týrıserdi qýana qarsy alyp, olardyń Astana qalasyndaǵy saıahatynyń qyzyqty ótýine atsalystyq.

Erkin MÁJITOV,

Abylaı han atyndaǵy Qazaq halyqaralyq qatynastar jáne álem tilderi ýnıversıteti halyqaralyq qatynastar fakúltetiniń 3-kýrs stýdenti:

Jastardyń kóńil kókjıegin keńeıtetin kórme

– Kúlli álem kún sanap kútken osynaý tarıhı oqıǵanyń ortasynda bolyp, ony óz kózimmen kórgenime baqyttymyn. «Myń ret estigennen, bir ret kórgen artyq» degendeı, Astana tórindegi bul dúrkiregen dýmandy árbir qazaqstandyq óz kózimen kórse, kóńili qýanyshqa tolatyn edi. Ásirese, bolashaqqa qadam basqan jastar týǵan jer topyraǵynda ótip jatqan EKSPO-2017 kórmesin kórýge asyqqandary abzal. Sebebi, jastar – týǵan jerdiń tiregi. Bul halyqaralyq kórmede árbir jas kóńil kókjıegin keńeıtip, rýhanı qorjynyn baıytyp, óziniń bolashaq mamandyǵyna baılanysty mol mańyzdy aqparat alatyny aqıqat. Bilim – ómirdegi rýhanı qymbat qazyna. Bul álemdik kórme jastardy bilimniń bıigine umtyldyrady, ǵylym-bilimge degen súıispenshiligin arttyrady. Sebebi, bilim ǵana adamdy ómirdiń bıik  shyńyna qanat qaqtyrady. «Bar izgilik tek bilimnen alynar, bilimmenen aspanǵa jol salynar» dep Júsip Balasaǵun óte ádemi aıtqan! Men bala kezimnen álemdik arenalarda ánuranymyzdy áýeletip, egemen elimizdiń kók týyn jelbiretýdi armandaımyn. Jarqyn bolashaqta memleketimizdiń mereıin tasytýǵa óz úlesimdi qosyp, dúnıejúzilik EKSPO kórmelerinde elimizdiń abyroıyn asqaqtatatyn paıdaly dúnıeler oılap tapsam dep ishteı nıettenip, úzdiksiz izdenip júrmin.

Daıyndaǵan – Balnur AHMET.