QR Bilim jáne ǵylym mınıstrligi Balalardyń quqyqtaryn qorǵaý komıtetiniń jańa oqý jylyna arnalǵan jalpyrespýblıkalyq «Mektepke jol» qaıyrymdylyq aksıasy bastaldy. 1 tamyz ben 30 qyrkúıek aralyǵynda ótetin dástúrli sharada respýblıka boıynsha 3000 oqýshyǵa kómek kórsetilip, oqý-quralymen qamtamasyz etiledi. Olar - kóp balaly otbasylar, jetim balalar men ata-anasynyń qamqorlyǵynsyz qalǵan mektep oqýshylary dep habarlaıdy Qamshy.kz aqparat agenttigi. 

Búgin Ortalyq komýnıkasıalar qyzmeti alańynda «Mektepke jol» jalpyrespýblıkalyq aksıasynyń bastalýyna oraı baspasóz-konferensıasy ótti. «Mektepke jol» aksıasy 10 jyldan beri elimizde úzbeı ótkiziletin shara. Aksıa aıasynda oqýshylardy jańa oqý jylyna daıyndap, áleýmettik sebep-saldarynan mektepke bara almaı qalǵan balaǵa kásipkerler men eriktiler kómek kórsete alady.

«Bizdiń maqsat,  az qamtylǵan jáne kóp balaly otbasylar, jetim balalar men ata-anasynyń qamqorlyǵynsyz qalǵan balalar ishinen oqýshylarǵa jańa oqý jylyna daıyndyq kezeńinde jáne áleýmettik sebepter boıynsha balalardyń mektepke barmaýyn aldyn alý úshin kómek kórsetý bolyp tabylady. Aıtalyq, byltyr respýblıka boıynsha 320 000 balaǵa 2 mlrd. astam qarjyǵa oqýǵa kerekti qural jabdyqtaryn alyp berdik»,-dedi QR Bilim jáne ǵylym mınıstriligi Balalardyń quqyqtaryn qorǵaý komıteti tóraǵasynyń orynbasary Mánshúk Ábdikárim.

Sondaı-aq, baspasóz konferensıaǵa QR Bilim jáne ǵylym mınıstriligi Mektepke deıingi jáne orta bilim departamentiniń dırektory  Zeınep Maqsutova, QR İİM Ákimshilik polısıa komıteti Iývınaldy polısıa bóliminiń basshysy Áset Ospanov, Áleýmettik kómek departamenti azamattardyń jekelegen sanattaryn áleýmettik qorǵaý isteri basqarmasynyń basshysy  Maksım Charkın jáne «Nur Otan» partıasynyń ortalyq apparaty Saıası jumys departamentiniń dırektory Marat Ábsáttarov qatysty.

QR İİM Ákimshilik polısıa komıteti Iývınaldy polısıa bóliminiń basshysy Áset Ospanov baspasóz konferensıada mektepke barmaıtyn balalardy reıdtik is-sharalar, páterlerdi aralaý arqyly anyqtaýǵa, mektepke daıyndaý boıynsha áleýmettik qorǵalmaǵan otbasydan shyqqan balalarǵa kómek kórsetýge asa kóńil aýdarylmaıtynyn aıtty.