«Qazkommersbank» AQ Dırektorlar keńesiniń jańa quramy DK tóraǵasyn saılady. Bul qyzmetke biraýyzdan táýelsiz dırektor Arman Dýnaev laıyq dep tanyldy, dep habarlaıdy Qamshy.kz aqparat agenttigi QazAqparatqa silteme jasap.

«Men úshin bul úlken qurmet. Jańadan damý kezeńinde eldegi júıequraýshy bankterdiń birinde Dırektorlar keńesin basqarý úlken kásibı sheberlikti talap etedi. Memlekettiń qoldaýy men banktiń negizgi aksıonerin almastyrý sharalary jınaqtalǵan kóptegen máselelerdi sheshýge múmkindik beredi. Qazirgi ýaqytta bizdiń aldymyzda mańyzdy maqsat tur. Ol - Qazkommersbanktiń korporatıvtik basqarý júıesin halyqaralyq úzdik tájirıbeler men Halyk Group qaǵıdattaryna sáıkes keltirý jáne qarjy ınstıtýty damýynyń jańa strategıasyn jasaý», - dedi A. Dýnaev.

Arman Ǵalıasqaruly Dýnaev - tájirıbeli ári kásibı qarjyger, ekonomıka ǵylymdarynyń kandıdaty. Memlekettik jáne jeke sektorda, sondaı-aq qarjy naryǵynda jumys tájirıbesi mol. Táýelsiz dırektor retinde Halyk Group tobynyń birqatar kompanıalarynyń Dırektorlar keńesiniń quramyna kiredi: «Qazaqstannyń Halyq Banki» AQ, «Halyk Finance» AQ jáne «Halyk-Life» AQ. «Altyn Bank» AQ («Qazaqstannyń Halyq Banki» AQ EB) Dırektorlar keńesin basqarady.

Aıta ketý kerek, 31 shilde kúni ótken alǵashqy jınalysta banktiń Dırektorlar keńesiniń jańa quramy saılanǵan bolatyn.

Arman Dýnaevpen birge banktiń basqarý organyna Sáýle Kishkimbaeva, bas aksıonerdiń ókili - Álıa Qarpykova, táýelsiz dırektorlar - Azamat Joldasbekov pen Asqar Elemesov, sondaı-aq QKB-nyń basqarma tóraǵasy laýazymyndaǵy Ýlf Vokýrka kirdi.