Qazaq eli Táýelsizdigin alǵannan beri qýatty memleket retinde qalyptasyp, álemniń aldyńǵy qatarly eline aınalý jolynda talaı belesterdi baǵyndyrdy, tamyry tereńde jatqan tól tarıhymyzdyń jańa betteri ashyldy. Osy qysqa ǵana ýaqyt ishinde ekonomıkalyq jáne áleýmettik mańyzy zor jobalardy qolǵa alyp, álemdik deńgeıdegi is-sharalardyń ótýine uıytqy bola bildik. Jahandyq máseleler talqyǵa túsken keshegi EQYU-nyń samıti, Astana ekonomıkalyq forýmy, Investısıalyq forým, Dúnıejúzilik ıslam ekonomıkalyq forýmy jas memleketimizdiń mereıin ústem etip, abyroıyn asqaqtatty. Eń bastysy, damý baǵytyn aıqyndap berdi. Osyndaı kósheli isterdiń jalǵasy retinde Qazaqstan EXPO-2017 kórmesin ótkizý quqyǵyna ıe boldyq.

EXPO-2017 halyqaralyq kórmesin ótkizýge nıetti Qazaqstan álemdik qaýymdastyqqa «Bolashaq energıasy» taqyrybyn usyndy. Qalaı degende de, EXPO sıaqty halyqaralyq kórmelerge qatysý qaı eldiń bolsa da áleýetin dúnıejúzine pash etýge berilgen tamasha múmkindik deýge bolady. Onyń ústine, álem aldynda ózińniń damý deńgeıińdi is júzinde dáleldeı otyryp, sharany joǵary jaýapkershilikpen ótkizý – óte zor qurmet. Óıtkeni elderdi dostastyrý, aýyzbirlikke shaqyrý, ınfraqurylymdardy laıyqty deńgeıde damytý – joǵary dárejede ótetin kez kelgen is-sharanyń maqtanyshy. Astanada EXPO ótkizýge arnalǵan taqyryp kezdeısoq tańdap alynǵan joq. Jerinde tabıǵı baılyqtyń mol qory bola tura Qazaqstan balamaly energetıka máselesin qozǵaýy tegin emes. Óıtkeni, shıkizat kózine aınalyp otyrǵan elimiz onyń túbinde bir túgesiletinin jaqsy túsinedi. Sondyqtan da turaqty energıany, balamaly energetıkany paıdalaný jáne tabıǵı resýrstardy saqtaý barlyq energetıkalyq salany damytýdyń basym baǵytynyń biri bolyp tabylady. «Bolashaq energıasy» – jel, kún, sý, ǵarysh balamaly energetıka, bıomassa energıasy, atmosferaǵa SO2 qaldyqtaryn tómendetý máselelerin tereń qozǵaıtyn óte aýqymdy túsinik. 

«Bolashaq energıasy» taqyrybyna EKSPO-2017 halyqaralyq mamandandyrylǵan kórmesi Qazaqstan elordasynda 2017 jyldyń 10 maýsymy men 10 qyrkúıegi arasynda ótedi. Kórmege búkil álemnen 5 mıllıonnan astam adam keledi dep kútilýde.

Orasan zor oqıǵaǵa 100-den astam el, 10 halyqaralyq uıym men ınovasıalyq tehnologıalar salasyndaǵy aldyńǵy qatarly kompanıalar qatysady. Kórme sheńberinde búgingi kúngi ózekti energıanyń balamaly kózderi men «jasyl tehnologıalar» suraǵyndaǵy asa jańa sheshimderdi kórsetý kútiledi.

«Bolashaq energıasy» EKSPO-2017 kórmesi turaqty energıa kózderin damytýǵa, energıa únemdeý senimdiligi men tıimdiligin arttyrýǵa baǵyttalǵan strategıalardy, baǵdarlamalar men tehnologıalardy zertteýge beıimdelgen. Onyń maqsaty – jańarmaly energıa kózderin paıdalanýdy jáne energetıkalyq resýrstardy tıimdi tutynýdy yntalandyrý.

Búgingi kúni bizge qol jetimdi energoresýrstar adamzattyń ajyratylmas murasy bolyp tabylady, ony jaýapty jáne utymdy paıdalaný qajet. Bul jahandyq is-sharanyń mindeti – energıa tutynýdy josparlaý men baqylaý, sondaı-aq bolashaq urpaqtardyń ómiri úshin qajetti turaqty energıa kózderi men bizdiń ǵalamsharymyzdaǵy búkil jandyny saqtap qalý úshin halyqaralyq qoǵamastyqty jaýapkershilik sezimine shaqyrý.

Memleket basshysy elimizdiń «EKSPO-2017» kórmesin ótkizýdegi maqsaty Qazaqstannyń tabystaryn áıgileýdi, álemdik qoǵamdastyqqa onyń múmkindikterin pash etýdi kózdeıtinin atap ótti. – Bizdiń respýblıkamyzdy kóptegen aspektiler boıynsha – iri energetıkalyq memleket, ýran kenin óndiretin jetekshi el, astyq eksporttaýshy, baı tabıǵı resýrstarǵa ıe memleket retinde biledi. Endi bolashaqqa umtylǵan jańa eldi kórsetý qajet. Ulttyq pavılon tujyrymdamasynyń ózi de Qazaqstan jetken jetistigimen toqtalyp qalmaıtynyn, árdaıym ári qaraı ilgerileýdi maqsat tutatynyn kórsetedi, - dedi Elbasymyz. Sondaı-aq, Qazaqstan Prezıdenti joba Astananyń bedelin budan da nyǵaıtýǵa septigin tıgizetinine nazar aýdardy. – Kórme elordamyzdy múlde ózge qyrynan kórsetedi, ony keńeıte jáne kórkeıte túsedi. Búgingi tańda Astanada mańyzdy nysandar az salynǵan joq. Alaıda, EKSPO kesheni – múlde basqa sapadaǵy, XXI ǵasyr talaptaryna tolyqtaı saı keletin tehnologıalar qoldanylatyn joba. Elorda turǵyndary men meımandary úshin energetıka salasyndaǵy bolashaqpen qaýyshýdyń, ǵylymı jetistikterdi kórýdiń jáne boı kótergen nysandardyń kórkin tamashalaýdyń tamasha múmkindigi týady, - dedi Memleket basshysy.

Astana EKSPO-2017 búkilálemdik arenada Qazaqstannyń tanylýy men týrısik tartymdylyǵyn arttyrýǵa, bizdiń halqymyzdyń qonaqjaılylyǵyn kórsetýge baǵyttalǵan. Kórme ótkizý, sonymen qatar elordanyń, tutastaı elimizdiń ekonomıkalyq jáne ınfraqurylymdyq damýy úshin qosymsha stımýl bolady. EKSPO ótkizý ornynda salynatyn obektiler bolashaqta Qazaqstan men onyń elordasyn iri halyqaralyq, kórmelik jáne aqparattyq- prezentasıalyq alań retinde qarastyrýǵa múmkindik beredi.

Qoryta kelgende, kúnnen kúnge damyp jatqan zamanaýı tehnologıalardy tıimdi paıdalaný úkimettik deńgeıde qolǵa alynsa, bizdiń dástúrli energıa kózderine táýeldiligimizdi aıtarlyqtaı tómendetýge múmkindik týar edi. Sonda biz qorshaǵan ortany zıandy qaldyqtardan qorǵap qana qoımaı, kóptegen jumys ornyn quryp, satyp alý qabilettiligin arttyra alamyz. Sondyqtan da bizdiń Táýelsiz jas memleketimiz úshin EXPO-2017 kórmesin ótkizýdiń mańyzy óte zor.Bul sharany kemshiliksiz, óz deńgeıinde ótkizý úshin kóp kúsh - jiger jumsaýymyz kerek. Ereń eńbektiń, jalyndy jigerdiń, temirdeı tártiptiń, asa zor aqyldyń arqasynda ıyqtaǵy bul júkti de artqa tastaımyz degen úmittemiz. Qazaqstan – Bolashaqtyń Energıasy!