Búgin Aqmola oblysyna jumys sapary aıasynda QR Premer-Mınıstri Baqytjan Saǵyntaev aımaqtaǵy Kásipkerler palatasynyń Óńirlik keńesiniń múshelerimen kezdesip, shaǵyn jáne orta bıznesti qoldaý men damytý máselelerin talqylady dep habarlaıdy Qamshy.kz aqparat agenttigi.  

Kezdesý barysynda qatysýshylar týrısik salany damytýǵa bólingen qosymsha qarajattyń bólinýin, saýda naryqtaryn jańǵyrtýdy, «BJK-2020» baǵdarlamasy aıasynda paıyzdyq mólsherlemeni sýbsıdıalaýǵa búdjetti arttyrýdy, iri aýyl sharýashylyǵy óndirýshileri kooperatıvterin qarjylandyrýdy, eldi mekenderdiń bas josparyn túzetýdi, sonymen qatar Qazaqstanda shaǵyn ındýstrıalyq aımaqtardy damytý máselelerin talqylady.

Keńeste Óńirlik keńes tóraǵasy, «Esil» JSHS bas dırektory Qazbek Eskendirov,«Eńbek» JSHS basshysy Qýanysh Raqyshev, «Torgovyı dom» JSHS bas dırektory Alekseı Smagın, «Novyı Kokshetaý» JSHS basshysy Rýstam Djangýnakov, «Gormolzavod» JSHS dırektory Ásen Jaqsylyqov, A. Myrzahmetov atyndaǵy Kókshetaý ýnıversıtetiniń prezıdenti Mádı Elýbaev, sonymen qatar «Trend+» JSHS quryltaıshysy Erjan Qýanǵan sóz sóıledi.

Kóterilgen taqyryptarǵa oraı QR ulttyq ekonomıka mınıstri Tımýr Súleımenov, QR ınvestısıalar jáne damý birinshi vıse-mınıstri Alık Aıdarbaev jáne QR aýyl sharýashylyǵy birinshi vıse-mınıstri Qaırat Aıtýǵanov túsinik berdi. 

Sóılegen sóziniń barysynda Baqytjan Saǵyntaev kásipkerlikti damytý Úkimet jumysynyń basty basymdyqtarynyń biri bolyp tabylatynyn atap ótti. Bul baǵytta bıznes úshin qolaıly jaǵdaılar týdyrý boıynsha sharalar júzege asyrylyp jatyr, onyń ishinde bıznes shyǵyndaryn azaıtý, tekserýlerdi qysqartý, nesıelik qoldaýdy qaıta retteý men keńeıtý bar. Sonymen qatar, qazirgi kezde jańa eki memlekettik baǵdarlama iske asyrylýda: AÓK damytý men ónimdi jumyspen qamtý jáne jappaı kásipkerlik, bul baǵdarlamalarda da bıznesti qoldaý tásilderi qarastyrylǵan. 

Budan ózge, Baqytjan Saǵyntaev aımaqtaǵy bıznes salasyn damytýda oblys ekonomıkasynyń perspektıvaly salalarynyń biri retinde týrızmge erekshe kóńil bólý qajettigin atap ótti. Bul oraıda týrısik jáne kólik-logıstıkalyq ınfraqurylymdy odan ári damytý, sonymen qatar memlekettik-jekeshelik áriptestik jobalaryn júzege asyrý qajet.