Zańger Abzal Quspan óziniń Facebook paraqshasyna Túrkıa azamaty Oǵyz Doǵan men "Eır-Astana" áýe kompanıasy qyzmetkeri arasyndaǵy tilge qatysty kıkiljińge zań turǵysynan túsinikteme berdi dep jazady Qamshy.kz aqparat agenttigi. Abzal Quspannyń aıtýynsha, túrkıalyq jýrnalıs atalmysh kompanıany sotqa berer bolsa, jeńiske jetedi. Oǵan ózi kepil bolyp otyr. 

"Kez kelgen salada olardyń qyzmetin rettep otyratyn óziniń salalyq, ıaǵnı profıldi zańdary bolady. Áýe salasyna qatysty zań, ol – «Qazaqstan Respýblıkasynyń áýe keńistigin paıdalaný jáne avıasıa qyzmeti týraly» Qazaqstan Respýblıkasynyń 2010 jylǵy 15 shildedegi №339-IV Zańy bolyp tabylady. Atalǵan Zańnyń 56-baby, 6-bóliginde bylaı dep kórsetilgen (sózbe-sóz) «Qazaqstan Respýblıkasynyń azamattyq áýe kemesiniń kabına ekıpajynyń músheleri jolaýshylarǵa qyzmet kórsetýde qazaq tilin erkin meńgerýge mindetti». 
Odan bólek, Oǵyz Doǵan «Eır Astana» kompanıasynyń qyzmetin tutynýshy, al kompanıa qyzmet kórsetýshi retinde, ekeýara qarym-qatynasy «Tutynýshylardyń quqyǵyn qorǵaý týraly» Qazaqstan Respýblıkasynyń 2010 jylǵy 4 mamyrdaǵy №274-IV Zańynyń 24, 25, 26-baptarynda qyzmet kórsetýshiniń tutynýshyǵa aqparattardy qazaq jáne orys tilinde jetkizý mindeti taıǵa tańba basqandaı anyq kórsetilgen!" – dep jazdy Abzal Quspan. 
Sonymen qatar, zańger til máselesin tek bılikke ysyryp qoımaı, oǵan qatysty zańdardy jumys jasatý halyqtyń qolynda ekenin aıtady. 
"Eger biz, óz quqyǵymyzdy talap etýden qoryqsaq, bir bet aryz jazýǵa erinsek, memlekettik organdar qaıtip iske aralaspaq? Sizdiń quqyǵyńyzdyń buzylyp jatqanyn olar pal ashyp bilmek pe? 
Uzyn sózdiń qysqasy, áýede júrseńiz de, jerde júrseńiz de óz ana tilińizde, memlekettik tilde qyzmet kórsetilýin talap etińiz, eger ol talabyńyz oryndalmasa, tıisti memlekettik organǵa nemese sotqa aryz, talap qoıýdy jappaı qolǵa alaıyq. Ana tilimizdiń abyroıyn asqaqtatýǵa sózben emes, ispen úles qosaıyq!" – dep sózin túıindedi zańger. 

Abzal Quspan ózi de "Eır-Astana" áýe kompanıasynyń prezıdenti Pıter Fosterge shaǵym túsirgen. Onda atalǵan kompanıa ushaǵymen ushqanda qazaq tilinde qyzmet kórsetilmegendigin jazyp, shaǵymdanǵan. 

Aıta keteıik, osydan eki kún buryn "Eır-Astana" kompanıasy ushaǵymen ushqan túrkıalyq jýrnalıs Oǵyz Doǵan jolserikten qazaq tilinde qyzmet kórsetýin talap etken. Alaıda talaby oryndalmady.