27-qarasha kúni Qazaq onkologıa jáne radıologıa ǵylymı-zertteý ınstıtýty men «Qazaqstannyń onkologtar jáne radıologtary» qoǵamdyq birlestigi birigip, «Ardagerlerge arnalǵan skrınıngtik tekserý» sharasyn ótkizdi. Tegin tekserilýge 50-den astam qart qatysyp, densaýlyǵynyń jaı-kúıin bilip qaıtty.
2015 jyly Uly Jeńistiń 70 jyldyǵy kele jatyr. Búgingi beıbit ári tynysh ómirimiz úshin soǵys ardagerleri men tyl eńbekkerleriniń aldynda qaryzdarmyz. Sondyqtan, olardyń erligin umytpaý – bizdiń basty paryzymyz. Alaıda, qazir Ardagerler úıinde, odan qaldy, Qarttar úıinde ómir súrip jatqandar az emes. Biri taǵdyrdyń tálkegine túsip, jalǵyz qalsa, endi birin baýyr eti balalary tastap ketken. Olar basy aýyryp, baltyry syzdasa, óz aıaǵymen emhanaǵa baryp, qajetti em-dom ala almaýy múmkin. Tipti kópshiligi aýrýyn aıta almaı-aq, ómirden ótedi. Dál osyny eskergen Qazaq onkologıa jáne radıologıa ǵylymı-zertteý ınstıtýtynyń mamandary kómekke zárý jandarǵa qol ushyn sozýdy maqsat etti.
«Onkologıalyq kómekti arttyrý» baǵdarlamasy aıasynda mundaı tegin skrınıngtik tekserýler ótkizip turamyz. Al dál qarttar úıindegi jandardy alyp kelip, tolyǵymen tekserý sharasy birinshi ret bolyp otyr. Buıyrtsa, aldaǵy ýaqytta da jalǵasyn tabatyn bolady» deıdi medısına ǵylymdarynyń doktory, profesor Ǵalym Ádilbaev.
Negizi elimizde 58-60 jasqa deıingiler arasynda qaterli isiktiń aldyn alý maqsatynda skrınıngtik tekserý ótkiziledi. Buryn tirkelmegender arasynda kolorektaldyq qaterli isikti anyqtaý úshin 70 jasqa deıin, al erler arasynda kezdesetin qýyq beziniń qaterli isigine qarsy 66 jasqa deıin skrınıng jasalady. Alaıda, bul jastan ótip ketken jandarǵa, ókinishke qaraı, arnaıy tekserý jasalmaıdy. Al búgin soǵys ardagerleri men tyl eńbekkerleri bilikti mamandarǵa qaralyp, ýrolog, gınekolog, rentgenolog, mammolog jáne hırýrgtardyń baqylaýynan ótti. Dárigerler qajet em-sharany da jazyp berdi.
Búgin tekserilýge kelgen tyl eńbekkeri Qańtarbaev Jaısańbaı: «Ózimizdiń Ardagerler úıinde de dárigerler kúndelikti qaraıdy. Biraq mundaı skrınıngtik tekserýge birinshi ret ákelip otyr. Bizdiń densaýlyǵymyzǵa alańdap, aýrýdyń aldyn alý úshin jasalyp jatqan jaqsylyq qoı bul. Qamqorlyqtaryna raqmet» dep rızashylyǵyn bildirdi.
QR Prezıdenti Nursultan Nazarbaev 2012 jyly 27-qańtardaǵy halyqqa Joldaýynda 2011-2015 jyldarǵa arnalǵan «Salamatty Qazaqstan» baǵdarlamasy boıynsha memlekettik densaýlyq saqtaý salasyn damytýdy tapsyrǵan edi. Al bul baǵdarlama otandyq onkologıa qyzmetin damytýǵa baǵyttalǵan.
Skrınıngtik tekserýler arqyly qaterli isikti birinshi satysynda anyqtaý jyl sanap jaqsy nátıje kórsetip keledi. Onkologıalyq aýrýlardy alǵashqy satysynda anyqtaý – naýqastyń jartylaı aıyǵýymen teń. Bul kezde oǵan kómek kórsetýge bar múmkindik bar. Al Qazaqstan – dál osyndaı skrınıngtik tekserýlerdi belsendi ótkizetin sanaýly elderdiń biri.
