Almatyda aýa raıynyń qolaısyzdyǵynan ótken táýlikte 97 jol apaty oryn alǵan. Bul týraly QazAqparat tilshisine qalalyq İİD baspasóz qyzmetiniń jetekshisi Saltanat Ázirbek habarlady.
«Kesheden beri ońtústik astanada qalyń qar jaýyp, kóktaıǵaq boldy. Osy ýaqyt aralyǵynda 97 jol apaty oryn alǵan. 16 adam japa shekti, qaza bolǵandar joq. Qalypty jaǵdaıda kúnine 30-40 jol apaty oryn alatynyn aıta ketý kerek»,- dedi S.Ázirbek.
İİD ókili qalalyq júrgizýshilerge qysqy qaýipsizdik sharalaryn saqtaýǵa, atap aıtqanda, der kezinde jazǵy dóńgelekterin qysqyǵa aýystyrýǵa, jyldamdyqty arttyrmaýǵa keńes berdi.
«Kazgıdromet» RMK aýa raıy boljamyna sáıkes Almatyda kelesi aptanyń basynda kún kúrt sýytyp, túnde aýa temperatýrasy -20 gradýsqa deıin tómendeıdi. Burqasyn turyp, kúshti jel soǵady dep kútilýde.
