Sheteldegi qazaq ádebıetiniń kórnekti ókili, aqyn, tanymal jazýshy, qoǵam qaıratkeri Júmádil Mamanuly 71 jasynda Almaty qalasynda  dúnıeden ótti. Marqum 1941 jyly QHR, İle qazaq avtonomıaly oblysy Kúnes aýdanynyń Túrgen aýylynda týylǵan. 1956-1959 jyldar aralyǵynda Shyńjań pedagogıka ınstıtýtynyń ádebıet fakúltetinde bilim alǵan. Júmádil Mamanuly alǵashqy qyzmetin «İle jastary», «İle órenderi» gazetinde jýrnalıs bolyp bastady. Keıinirek «İle gazeti», «İle jastary» jýrnaly, «İle órenderi» gazeti men «İle aıdyny» jýrnalynda tilshi, jaýapty redaktor, bas redaktor qyzmetterin atqardy. Ol 1985 jyldan 2003 jylǵa deıin İle qazaq avtonomıaly oblystyq ádebıet-kórkemónershiler birlestiginiń tóraǵasy, «İle aıdyny»(Qytaı, qazaq tilinde, uıǵyr tilinde jaryq kóretin) jýrnaly mekemesiniń bastyǵy ári bas redaktory boldy.

Alǵashqy ádebı jasampazdyǵyn 1958 jyly jaryq kórgen «Emen syry» atty balladasymen bastaǵan qalamger sodan qazirge deıin myńnan astam óleń, tolǵaý, 20-dan astam dastan, ballada, 100-ge jýyq áńgime, ocherk, estelik, esse, poves jazdy. Aqynnyń «Taý jalyny»(dastan), «Qaraqat»(óleńder jınaǵy), «Aqylbaı ataıdyń áńgimeleri»(poves), «Ákbar-Seıt»(Óleńmen jazylǵan roman), «Júmádil dastandary», «Áke baýyryndaǵy bala»(áńgime, povester jınaǵy), «Tunyq daýys»(Óleń, poemalar jınaǵy), «Aıhan»(Aýdarma kitap), «Án syry – jan syry»(ǵylymı maqala, esseler jınaǵy), «Kúmbezge túsken kún shýaq»(poves, hıkaıattar jınaǵy), «Ashyq esik aldynda»(esseler jınaǵy), «Ákbar batyr» , «Núsiphan polkovnık» (qazaq tarıhyndaǵy áıgili adamdar serıasy), «Adamnyń bulbuly – Áset»(tarıhı esse) syndy kitaptary oqyrmanmen júzdesken.

Júmekeńniń «Aqylbaı ataıdyń áńgimeleri» sıaqty shyǵarmalary qytaı, uıǵyr, qyrǵyz, japon tilderine aýdarylǵan.

Júmádil Mamanuly Qytaı halyq jazýshylar qoǵamynyń, Qytaı az ulttar ádebıetin zertteý qoǵamynyń,Qytaı Manas zertteý qoǵamnyń, Qazaqstan jazýshylar odaǵynyń múshesi, SHUAR ádebıet-kórkemónershiler birlestiginiń turaqty jorasy, Shynjań Tańjaryq zertteý ǵylymı qoǵamynyń orynbasar tóraǵasy, İle qazaq ádebıet-kórkemónershiler birlestiginiń tóraǵasy, Qytaı "memlekettik tańdaýly maman" ataǵynyń jáne Shyńjań qazaq-qyrǵyz "Tulpar" ádebı syılyǵynyń ıegeri. Onyń esimi men eńbekteri «Halyqaralyq áıgili adamdar», «Jońgo jazýshylary», «Jońgo daryndylary», «Jońgo mamandary» qatarly kitaptar men sózdikterge engizilgen.

Marqumynyń jatqan jeri jánnatta, topyraǵy torqa bolsyn!