ASTANA-ALMATY. Memleket basshysy Nursultan Nazarbaev pen Fransıa Prezıdenti Fransýa Olland Abaı atyndaǵy Qazaq ulttyq pedagogıkalyq ýnıversıtetiniń bazasynda qurylǵan «Sorbonna-Qazaqstan» ınstıtýtynyń saltanatty ashylý rásimine qatysty, dep habarlady Aqordanyń baspasóz qyzmeti.
Memleket basshysy bul sharaǵa fransýz kóshbasshysynyń qatysýy bilim berý salasyndaǵy osy birlesken jobanyń eki el úshin de mańyzy joǵary ekenin bildiretinin aıtty.
Nursultan Nazarbaev Qazaqstan álemdik bilim berý keńistigine kirikpeıinshe, ınovasıalar men bilimge negizdelgen jańa ekonomıka qura almaıtynyn da atap ótti.
- Bizdiń elimizde bilim damýdyń basymdyǵy bar sharty bolyp sanalady. Qazaqstan ony álemdik ozyq standarttarǵa jaqyndatýdy kózdeıdi. Biz jastarymyzdyń bolashaqqa batyl qaraýyna múmkin beretin barlyq bilim men mashyqty óz elinde ıgere alatyndaı bolýyn maqsat etip otyrmyz. Álemge aty tanymal ýnıversıtetterdiń elimizge kelýi bizdiń tańdaǵan baǵytymyzdyń durystyǵyn kórsetedi, - dedi Qazaqstan Prezıdenti.
Óz kezeginde Fransýa Olland mádenıet jáne bilim berý salasyndaǵy qazaq-fransýz yntymaqtastyǵy budan ári de keńeıe beretindigine toqtaldy. Sondaı-aq jańa JOO túlekteri Qazaqstannyń ınovasıalyq damýyna eleýli úles qosa alatyndyǵyna senim bildirdi.
«Sorbonna - Qazaqstan» ınstıtýty «Parıj qalasynyń Sorbonnasy» (PRES Sorbonne Paris Cité) Joǵary bilim ǵylymı ortalyǵynyń álemdegi ekinshi jáne Ortalyq Azıadaǵy birden-bir fılıaly bolyp otyr. Ondaǵy bilim berý úderisi Bolon konvensıasyna sáıkes júrgiziledi. Qazaqstan men Fransıanyń profesorlary sabaq beredi.
Birlesken ınstıtýttyń ashylýy otandyq bilim berýdi eldiń joǵary bilikti mamandarǵa degen suranysyn qamtamasyz etýge baǵyttaýdaǵy mańyzdy qadamdardyń biri bolyp sanalady.
"Qazaqparat"
