«Qytaı tyńdap tur» (中国正在听) jobasyndaǵy úzdik 8 konkýrsant osy joly (05.12.2014) «meniń juldyzym» degen taqyryppen ózderine tulǵa tutqan adamǵa arnap án shyrqady.

Araı ózi oryndaıtyn ánin bylaı tanystyrdy: «Men úshin juldyz bolǵan adam osy kúni tyńdarmandarynan umyt qalǵan tulǵa. Esimi – Baqytjan (Qajymuqanov). 90-jyldardyń basqy kezinde «Azıa daýsy» degen halyqaralyq konkýrc bolǵan. Baqytjan sol jobanyń birinde júldeger atandy. Men 7-8 jasymda onyń bir ánin tyńdaǵanmyn. Sol kezde ol jazǵan ánder basqa kompozıtor týyndylarynan ózgeshe bolyp seziletin. Al 8 jasymda ánge degen qyzyǵýshylyǵym tereńdep, ózindik kózqarasym paıda bola bastady. Osydan keıin ol kisiniń rasymen de óte myqty sazger ekenine kózim jetti. Búgingi tańda tanymaldyq dárejege ıe bolǵan mýzykanyń keıbir stılderin ol kisi osydan 20 jyl buryn aq óz shyǵarmashylyǵynda qalyptastyryp úlgergen eken. Ol kisini taýyp, jolyǵýǵa qatty qushtar boldym. Sodan beri byltyr ǵana Qazaqstanǵa baryp telebaǵdarlamaǵa qatysýdyń oraıy týdy. Sóıtip ol kisimen kezdesetin bolyp kútip otyrdym. Osy kúni ónerdegi eń jarqyn tulǵaǵa aınalǵan bolar degen tebirenis te joq emes. Biraq... Ol kisini kórgende múldem basqa bir adamdy kórgendeı áserde boldym... Sóıtsem, Baqytjan aǵa alys joldar kóliginiń júrgizýshisi bolyp júr eken... Baqytjan aǵa meniń sonaý alys jerden arnaıy izdep kelgenime alǵashynda senbedi. Qolyma gıtaramdy alyp óziniń ánin oryndap bergenimde, sál ǵana jymıyp, «uzaq jyldan beri oryndalmaǵan ánimniń bir notasyn buzbaı oryndap berdiń» dep kózine jas aldy. Sóıtip bir kún dıdarlas boldyq. Kóz jasy men ketkenshe tıylmady... Ol kisi kólik júrgizýshisi bolǵanymen, áli de án jazýyn toqtatpaǵan. Sol kezdesýde «Tek júregim soǵysyn toqtatpasyn. Men ónerdi súıip ótemin» degen edi. Osy sóz qulaǵymnan ketpeıdi... Onyń ónerine degen mahabbatym tereńdeı tústi! Men búgin kezdesýde ózine oryndap bergen «Tańǵy jas» ánin aıtamyn. Án qazaqsha bolǵanymen, mýzykada til bolmaıdy. Bul án seni de tebirentedi dep senemin!»

4 sarapshy pikiri: 哈林 (Halın): Sen halyq (qytaı) tanymaıtyn áýenmen qytaı jurty buryn-sońdy esip kórmegen ándi oryndadyń. Bul seniń jobadaǵy taǵdyryń úshin óte qaýipti edi. Birde-bir sózi túsiniksiz, halyq janyna jat ándi óziń tańdadyń ba, álde jetekshiler keńesimen aıttyń ba? Araı: Ándi júrek qalaýymmen oryndadym. Ras, ándi tańdar kezde onyń osy sahnada maǵan ákeler qaterin de oıladym. Biraq óz tańdaýymdy joba jetekshilerine aıtqanymda olar maquldady. Qatty qýandym. Bul ándi oryndaý men úshin bir mindet bolǵandyqtan, basqa eshteńeni oılamadym. Men qatty qurmetteıtin adamnyń ózim súıip tyńdaıtyn ánin oryndaýǵa múmkindik bergen osy sahnaǵa aıtar alǵysym mol. 春春 (chun chun): Araı oryndaǵan ánniń bir sózin de uqpadym. Onyń ústine azdaǵan daýys aýytqýshylyqtar da (falsh) boldy. Biraq án tilin áýenmen túsindire alatynyn dáleldedi. 李建 (lijian): Jaqsy án adamdy ósiredi. Osyndaı tanymy, tájirıbesi bar Araıdyń keleshekte kásibı sheberligi óte myqty ánshi bolatynyna senemin. Quttyqtaımyn! Nátıjesinde Araı 73 paıyzdyq baǵalaýǵa (onyń ishinde 4 sarapshynyń qoldaýy bar) ıe bolyp úzdik 7-diń biri boldy. Bul kezeńde 31 paıyzdyq kórsetkishpen bir konkýrsant jobamen qoshtasty. Araıǵa sáttilik tileıik!

Yertay Nussipzhanov, Facebook paraqshasynan