Qazaq astyǵy Mysyr arqyly Parsy shyǵanaǵy men Afrıka elderine jetkiziledi. Bul týraly búgin Aqordada QR Prezıdenti Nursultan Nazarbaevqa senim gramotasyn tapsyrý rásiminen keıingi brıfıgte Qazaqstandaǵy Mysyr Arab Respýblıkasynyń Tótenshe Ókiletti Elshisi Haısam Salah Kamel Ibragım málim etti.
«Qazirgi kezeń ekijaqty qatynastardyń joǵary deńgeıge kóterilýimen erekshelenedi. Buǵan dálel retinde osy jylǵy qazandaǵy Mysyrdyń Ekonomıka jáne saýda mınıstriniń Astana qalasyna resmı saparyn atap ótken oryndy. Mysyrdyń Dýmát qalasynda astyq saqtaý jáne satýǵa arnalǵan halyqaralyq logıstıkalyq ortalyqtyń qurylýy da osy sapardyń ózekti nátıjeleriniń biri. Bul ortalyq Taıaý shyǵys, Parsy shyǵanaǵy, Afrıka elderin astyqpen qamtamasyz etetin ortalyq bolady. Sonymen qatar bul ortalyq Qazaqstan astyǵynyń jańa naryqtarǵa shyǵýyna sheksiz múmkindik beredi», - dedi Elshi.
Onyń atap ótýinshe, buǵan deıin Qazaqstan astyǵyn atalǵan elderdiń naryǵyna shyǵarýda kólik shyǵyndary joǵary ári ara qashyqtyq shalǵaı bolǵan edi. Al endigi ýaqytta Mysyrda halyqaralyq logıstıkalyq ortalyqtyń ashylýy eki el arasyndaǵy ekonomıkalyq yntymaqtastyqtyń damýyndaǵy áleýetti jańa sala bolmaq.
«3 mln. 100 sharshy metr aýmaqqa salynatyn, quny 2,5 mlrd. dollardy quraıtyn Mysyr ulttyq jobasy jańa qoımalar salýǵa arnalǵan. Onyń bastapqy kezeńdegi múmkindigi jylyna 7,5 mln. tonna astyqty saqtaýǵa arnalǵan. Al bolashaqta onyń syıymdylyǵy jylyna 65 mln. tonna astyq pen basqa da azyq-túlik taýarlaryn saqtaýǵa arnalatyn bolady», - Haısam Salah Kamel Ibragım.
"QazAqparat"
