«Jol muraty – jetý». Sońǵy kezderi jolǵa shyǵarda úıge aman-esen jetýdi oılaımyz. Onyń sebebi de bar. Áleýmettik jeli arqyly taraǵan aqparattardyń ishinde «adam joǵalypty», «iz-tússiz joǵaldy» syndy jańalyqtar qaptap júr. Sony kóresiń de, qorqasyń. Kólikke mingennen keıin eshkim kórmedi, estimedi, bilmeıdi... Jol jónekeı ustaǵan taksıdiń qaýipti ekeni el arasynda aıtylyp júr. Rasynda da, avtokólik ishinde sizdiń qaýipsizdigińizge eshkim kepildik bermeıdi. Al bir jaǵynan avtokólik júrgizýshisine baǵany ózińiz usynyp, saýdalasa da alasyz. Baǵasy da arnaıy baǵdarlama arqyly shaqyrylǵan kólikten arzan bolady. Al ár adam óz ómiri úshin qorqatyn bul kezeńde qaı taksı qaýipsiz?
Qoǵamdyq kólikke minip alyp, qalaǵan jerińe deıin jetýge qalada barlyq jaǵdaı jasalǵan. Bir avtobýstan ekinshisine aýysyp júrý de qaltańdy juqartady demeseń, qaýipsiz ekeni belgili. Al avtobýs toqtap qalǵan ýaqytta nemese barar jerińe asyǵys bolǵanda mindetti túrde jeńil kólik, ıaǵnı taksı kerek bolady. Búginde uıaly telefonǵa júktep, kez kelgen ýaqytta taksı shaqyrtýǵa múmkindikter jeterlik. Ol úshin arnaıy taksı shaqyratyn programmalar da barshylyq. Mysaly, Iandeks taksı, InDriver, Uber, jáne t,b. Qoǵamda atalǵan osy úsh programma kóp qoldanysqa ıe. Endeshe taldaý jasap kóreıik.
Iandeks taksı
Iandeks taksı qoldanýshylary 3 jolmen tólem jasaı alady:
-Qolma-qol;
-Online bank kartasy arqyly;
Onlaın- tólem barysynda eshqandaı karta qajet emes. Júrgizýshi chekke qol qoıýdy da talap etpeıdi. Onlaın tólem jasaý úshin jolaýshy óz kartasyn uıaly telefondaǵy Iandeks.Taksı baǵdarlamasyndaǵy akkaýntpen baılanysytyryp qoıý jetkilikti. Jol júrý aqysyn júrgizýshi «Sapar aıaqtalǵan» kezde ǵana naqty aıta alady. Alaıda qalanyń jaqsy biletin júrgizýshiler tapsyrys túsken kezde jobalap baǵany da aıtyp jatady.
-Promokod/jeńildikter;
Iandeks.Taksı ózine qoldanýshylardyń sanyn arttyrý maqsatynda kınoteatrlar men dúken, kafe jáne meıramhanalarmen birlesip túrli aksıalar ótkizip otyrady. Al kelýshilerge taksıdi qoldaný kezinde birinshi tapsyrysqa jeńildik jasalady.
Almaty qalasy turǵyndary arasynda Iandeks taksıdiń baǵasy qymbat degen pikirler de bar.
InDriver
InDriver taksı shaqyrýdyń bir artyqshylyǵy júrgizýshige baǵany óziń usynasyń. Sonymen qatar saýdalasýǵa da bolady. Baǵasy basqa taksı shaqyrý baǵdarlamalarymen salystyrmaly túrde arzanyraq. Jáne sapar sońynda júrgizýshi men kólikke baılanysty óz pikirińizdi, shaǵymyńyzdy jazyp qaldyrýǵa bolady. Alaıda shaǵymnyń qaralyp, qaralmasyna eshkim kepildik bermeıdi.
InDriver júrgizýshileri kólik ishinde jolaýshy baryna qaramastan, joldan taǵy da birneshe adamdy alýǵa quqyqtary bar ekenin jıi aıtady.
Uber taxi
Dittegen jerińizge jetý barysynda sizge avtokóliktiń syıymdylyǵy men baǵasy usynylady. Artynsha sizge júrgizýshiniń nómir men avtokólik nómiri jiberiledi. Qalaǵan jerińizge jetken soń júrgizýshini baǵalaı alasyzdar.
Taksıdegi oqıǵa
Ásem esimdi boıjetkenniń aıtýynsha, ol únemi InDriver taksı shaqyrý qyzmetin qoldanady.
Ásem Túrkisib aýdany Gete Alǵabas kósheleriniń qıylysynan Altyn Ordanyń bazaryna deıin 1600 teńge usynǵanyn aıtty. Júrgizýshi sol sátte habarlasyp, 2000 teńge berseńiz baramyn dep shart qoıǵan. Jol júrýine az ǵana ýaqy qalǵandyqtan, amalsyz keliskenin aıtady. Artynsha baraholka tusynan taǵy 2 adamdy otyrǵyzyp, olarmen 1000 teńgege kelisedi. Artynan mingen eki jolaýshyny úıiniń tusyna deıin jetkizip, «asyǵyspyn» degen sózine nazar aýdarmaǵanyn da tilge tıek etti. Birinshiden, usynǵan baǵadan kóp aqsha surady jáne meni jolymnan qaldyra jazdady dep óz renishin bildirdi.
Budan da ózge biz bilip, bilmeıtin oqıǵalar qanshama...Sondyqtan arnaıy baǵdarlama arqyly shaqyrylǵan taksı bolsyn, jol jónekeı mingen avtokólik bolsyn týystar men dostaryńyzǵa avtokóliktiń memlekettik nómirin, shamamen keletin ýaqyty men júrgizýshi týraly jeke málimetti habarlaǵanyńyz jón.
Múmkindigińiz bolsa qalanyń kartasyn qosyp, kóliktiń jyljý barysyn baqylap otyrý kerek. Jeke bas qaýipsizdigińizge nemquraıly qarap, baǵaly zattaryńyz ben aqshańyzdan aıyrylyp qalmaýdyń birden-bir joly – osy.
Esińizde bolsyn, taksı júrgizýshisi sizdiń qaýipsizdigińiz úshin jaýapty ári múddeli!
Aıgerim Taýbaı
