Qazaqstandyq boksshy Bekman Soılybaev ekinshi jeńil salmaq dárejesindegi WBC International chempıondyq ataǵyn qorǵaý úshin Las-Vegasqa keldi.
Oıyn-saýyqtyń ǵana emes, kásipqoı bokstyń da ordasy sanalatyn Las-Vegasta Astana ýaqytymen jeksenbi kúni tańerteń Golden Boy Promotion kompanıasynyń uıymdastyrýymen ǵajaıyp jekpe-jek keshi ótedi. Sonyń birinde sharshy alańǵa jerlesimiz Bekman Soılybaev shyǵyp, meksıkalyq Fernando Vargasqa qarsy aıqasta ekinshi jeńil salmaq dárejesindegi WBC International chempıondyq ataǵyn qorǵaıdy. Jekpe-jek 10 raýndqa josparlanyp otyr, dep jazady vesti.kz.

Eki aı Los-Andjeleste oqý-jattyǵý jıynyn ótkizgen Bekman Soılybaev búgin bapkeri Erık Braýn jáne kómekshisi Baýyrjan İztileýovpen birge Las-Vegasqa keldi.

«Sharshy alańǵa shyǵýǵa tolyq daıynmyn. Eki aıǵa sozylǵan oqý-jattyǵýym óte paıdaly boldy. Erık Braýn men Teılor Ramsdelden úırengenim kóp. Sparrıngtik judyryqtasýlar da az bolǵan joq. Dál qazir kimmen bolsa da judyryqtasýdan qashpaımyn. WBC International chempıondyq belbeýimdi sátti qorǵasam, osy reıtıńte birinshi orynda turǵan boksshylarǵa qarsy sharshy alańǵa shyqqym keledi», – deıdi Bekman Soılybaev.

Esterińizge sala keteıik, Bekman Soılybaev pen meksıkalyq Fernando Vargas arasyndaǵy jekpe-jekti ESPN telearnasy arqyly álemniń 200 eli tamashalaıdy. Al Qazaqstanda atalmysh aıqasty «Habar» telearnasy kórsetedi. Bul jerlesimizdiń kásipqoı bokstaǵy 12-shi jekpe-jegi bolmaq. Buǵan deıingilerdiń barlyǵynda jeńiske jetip, onyń tórteýinde qarsylasyn nokaýtqa túsirgen bolatyn.