Kúz bastalyp, kún sýyta bastaǵan  epıdemıologıalyq maýsymda Batys Qazaqstan óńirindegi 27531 turǵyn  jedel respıratorly vırýstyq ınfeksıamen naýqastanýda.

Bul  100 myń halyqqa shaqqanda 4334,7 qurap otyr. Al 14 jasqa deıingi aýyrǵan balalar 69,4% quraýda.  Qoǵamdyq densaýlyq saqtaý departamentiniń ınfeksıalyq jáne parazıttik aýrýlardy epıdqadaǵalaý bóliminiń bas mamany S. Nasyrovanyń aıtýynsha,  zerthanalyq ádistermen rastalǵan tumaýdyń 61,7 % tumaýdyń A túri jáne 38,3% V túri tumaýǵa qarsy ekpe almaǵan turǵyndar arasynda anyqtalǵan.  Mamannyń málimetinshe, tumaýdyń aldyn alý sharasy – vaksınasıa eken.

Aldaǵy 2017-2018 jyldardaǵy epıdkezeńge jergilikti búdjetten qaýipti topqa jáne epıdemıologıalyq kórsetkishter boıynsha tumaýǵa qarsy ekpe júrgizýge 52,2 mln. teńgeni quraıtyn 60 myń doza vaksına alynǵan. Tumaýǵa qarsy aqyly ekpeni «Talap» AAQ, «Medıker» JSHS, «Intertıch» jáne ortalyq aýdandyq aýrýhanalarynyń ekpe kabınetterinde júrgizedi. Vaksınasıadan basqa  tumaýdan qorǵanýdyń taǵy bir tásili ol – arnamaly emes profılaktıka eken. Arnamaly emes profılaktıka organızmniń óziniń qorǵanysh kúshterin nyǵaıtýǵa baǵyttalǵan jáne vaksınasıalaýmen bir ýaqytta júrgizýge bolady. Arnamaly emes profılaktıka retinde ımýndyq túzetýshi preparattar ıaǵnı anaferon, ınterferon, vıferon jáne oksalın, antıvır  sekildi  vırýsqa qarsy jaqpamaılar qoldanylady.

Sala mamany halyq kóp jınalatyn jerlerde, sondaı-aq naýqasqa kútim jasaǵan kezde naýqas adam da, deni saý adam da betperde kıýi qajettigin aıtady. Respıratorly vırýs profılaktıkasynyń mańyzdy ádisteriniń biri aýyrǵan kezde nemese naýqasqa kútim jasaǵanda qoldy sabynmen nemese dezınfeksıalyq sýlyqtardy paıdalanyp, jıi jýý bolyp tabylady.

JRVI óziniń  asqynýlarymen qaýipti, sondyqtan respıratorlyq aýrýlardyń birinshi belgileri paıda bolǵan kezde ózin-ózi emdeýmen aınalyspaı, tez arada dárigerge barǵan jón.

Gúlim AQAP,

Batys Qazaqstan oblysy