Jeltoqsannyń 2-ine qaraǵan túni ótken jekpe-jekte Qanat Islam kezdesýdiń altynshy raýndy aıaqtalmaı jatyp, aıqyn basymdylyqpen jeńiske jetken. 

 Boxrec portalynyń deregine súıensek, kolýmbıalyq boksshy Reınaldo Eskýıvıa 35 jasta. Sharshy alańda barlyǵy 19 kezdesý ótkizip, toǵyzynda jeńiske jetken.

 Al Qanat Islam múshe Nelsons proýmoýterlik kompanıasynyń saıtynda, bul qazaq boksshysynyń jetinshi taza jeńisi ekeni jazylǵan.

 28 jastaǵy qazaq boksshysy 69 kılogramǵa deıingi jartylaı orta salmaqta bokstasyp júr. Qanat Islam qazir Dúnıejúzilik boks keńesiniń (WBC) erejesi boıynsha álem chempıony ataǵyna talasýǵa múmkindigi bar. WBC erejesine sáıkes Qanatqa reıtıńi joǵary 40 boksshydan ozý úshin barlyq jekpe-jekterinde jeńiske jetý kerek.

 Úzdik 15-tiń sapyna kirgen jaǵdaıda jartylaı orta salmaqtaǵy qazirgi álem chempıony «jeńilmeıtin qabylan» degen laqap aty bar AQSH boksshysy Floıd Meıýezermen (43 jekpe-jek, 43 jeńis) kezdesýi múmkin. WBO reıtıńine ilinip, úzdik 15-tiń qataryna ilinbese, Meıýezer onyń jekpe-jekke shyǵý týraly usynysyn qabyldamaıdy. Al AQSH boksshysyn  jeńse, kásipqoı bokstyń erejesi boıynsha Qanat Islam álem chempıony atanady.

 Qazaq boksshysy osyǵan deıin Domınıkan Respýblıkasynyń bes boksshysymen kezdesip, barlyǵyn nokaýtpen jeńgen.

 Aldymen, La-Ramano qalasynda Danıed Veatony (28 qyrkúıek), odan keıin Aneıdı Matresti (2 qazan) jeńdi.

 Qazannyń 18-i Santo-Domıngo qalasyndaǵy kezdesýde Modesto Felıksti, 29 qazanda Nelsıdo Mıgýeldi nokaýtpen utty. Al qarashanyń 10-y kúni Hose Antonıo Rodrıgespen ótken kezdesý úshinshi raýndta toqtatylyp, Qanat Islamǵa taza jeńis berildi.

 Boksshy qarashanyń 24-i kúni Kolýmbıa astanasy Bogotoda jergilikti boksshy Segýnda Herrerany ekinshi raýndta nokaýtqa jibergen edi.

 Qanat Islamnyń Qazaqstanda bapkeri bolǵan Tursynǵalı Edilov Azattyq tilshisine: "Qanat Islam London olımpıadasyna qatysa almaıtynyn bilgen soń kásipqoı boksqa ketti. Qazir Nelson Lopes degen AQSH-taǵy ataqty menedjerdiń kompanıasymen kelisim-shartqa otyrdy. Bul kompanıada 150 boksshy bar. Kóbi – AQSH, Domınıkan jáne Pýerto-Rıko boksshylary. Qanat qazir kásipqoı boksqa birjola bet burdy. Maqsaty – orta salmaqta álem chempıony ataný... Álem chempıony bolý úshin úsh jyldyń ishinde jıyrma-otyz kezdesý ótkizip, barlyǵynda jeńiske jetý kerek" degen edi.

 Qytaıda týǵan etnıkalyq qazaq Qanat Islam osy eldiń atynan Pekın olımpıadasyna qatysyp qola júldeger atanǵan edi. Kóp uzamaı Qazaqstanǵa qonys aýdarǵan boksshy London olımpıadasyna atajurtynyń atynan qatysýyna baılanysty azamattyq-quqyqtyq daý týǵan soń kásipqoı boksqa bet burǵan.

Rýslan Medelbek

Azattyq.org saıtynan alyndy

Áýelgi taqyryby: Qanat Islam jetinshi joly kolýmbıalyqty jeńdi