23 qazan kúni Almaty qalasynda aqyn Talapbek Tynysbekulynyń  «Arǵy jaǵy Ertistiń bergi jaǵy» atty shyǵarmashylyq keshi ótti, dep Qamshy.kz aqparat agenttigi habarlaıdy.

Halyq bıi «Qara jorǵanyń»  atajurtqa qaıta oralýy jaıly áńgime bolsa-aq,  kóziqaraqty zıalylar men oqyrmandar osy Talapbek Tynysbekulyn aýyzǵa alady. Olaı bolatyny,  ózi qurǵan  «Jezbuıda»  jastar qoǵamdyq birlestigi arqyly arǵy-bergi bettegi aǵaıynnyń rýhanı jalǵastyǵyna úlken dáneker bolyp,  el men jurttyń etene qabysýy jolynda jas basymen az bolmaǵan ıgi sharalardy uıystyryp kele jatqan aqyn Talapbek ondaǵan jyldardyń aldynda  «Qara jorǵa»  óner ujymyn quryp,  Qytaıdaǵy ónerpazdardy alǵash ret Almatyǵa shaqyryp, «Qara jorǵa» bıin bıletken edi. Mine, osylaısha elimizdiń ulanǵaıyr dalasyna osy bir dástúrli bıimiz keń taralǵan.

Kesh barysynda búgingi tańda jas patrıottarǵa úlgi bolyp úlgergen ardaqty azamat rýhty,  órshil jyrlaryn jatqa oqydy. Sondaı-aq ol sózin jazǵan, birneshe retki respýblıkalyq patrıottyq ánder báıgesiniń bas júldesin enshilegen ánder kerimsal keshtiń kórigin qyzdyrdy. Kesh tizginin belgili aqyn, jazýshy Beıbit Sarybaı júrgizdi.

Keshte aqynnyń  «Arǵy jaǵy, Ertistiń bergi jaǵy» atty tuńǵysh jınaǵynyń tusaýy kesildi. Almas Ahmetbekuly,  Dáýletbek Baıtursynuly,  Murat Shaımaranuly,  Qaırat Qulmuhammet qatarly tanymal aqyndar jınaqtyń tusaýyn kesti. Arshyn Kásimbaıuly,  Bıbıgúl Qılymqanqyzy,  Nurlan men Shába,  Sáýlejan Taǵzıauly qatarly ónerpazdar Talapbektiń sózine jazylǵan jańa ánderdi tyńdarmandarǵa syılady. Janarbek Áshimjan,  Baqyt Bádelhan,  Dáýletkereı Kápuly,  Ádilet Ahmetuly qatarly aqyndar jyrdan shashý shashty. Aqynnyń dostary men izin basyp kele jatqan ini- qaryndastary at mingizip,  shapan syılady. Oqýshylar men órender otty óleńderin jatqa oqydy.  

Aqynnyń óleńder jınaǵy men jaryq kórý aldynda turǵan prozalyq shyǵarmalar jınaǵy  «Maqsat med»  medısınalyq ortalyǵynyń dırektory Maqsat Ábdiqadyruly men jeke kásipker Aısa Orazqanulynyń demeýshiligimen «Úsh qıan»  baspasynan shyqty. 

Altaıda týyp,  Alataýda qanatyn qataıtyp,  endi Arqa tórindegi Astanaǵa qonys aýdarǵaly júrgen Talapbek Tynysbekuly alys-jýyqtaǵy aǵaıynǵa aq dastarqan jaıyp,  alǵysyn aıtyp,  batasyn aldy.