Qystyń kózi qyraýda. Qazgıdromettiń málimetinshe jaqynda qar jaýady. Buǵan deıin halyq jylytý maýsymyna qamdanyp kómir satyp alý qajet. Alaıda kómir tapshylyǵy men onyń qymbattaýy halyqty biraz ábigerge salyp otyr.

Budan biraz ýaqyt buryn-aq QR Energetıka mınıstri Qanat Bozymbaev Qazaqstannyń barlyq óńirlerinde kómir tapshylyǵy joq ekenin aıtqan. Alaıda kómirdiń qymbattaýy men tapshylyǵy Almaty óńirinde aıqyn bilinip otyr.

Qamshy.kz aqparat agenttigi tilshisi kómir jaǵdaıyn bilý úshin Almatydaǵy kómir jetkizetin basty oryndardyń biri  «Karazhyra Komir»-ge baryp mán-jaıdy anyqtap kórdi.

Mekeme ǵımaratynyń aldynda kómir kútip, kezekte turǵan aýyr júk kóliginen kóz tunady. Keıbiri tipti túngi birden bastap tur. «Karazhyra Komir»-de kómir alýǵa kelgenderdi kúzetshi ótkizip jatqan joq. Qara altyn ótinish bildirgen kúnnen bastap bir aptadan keıin ǵana jetkiziledi eken.

Kómirdiń baǵasy da kóńil kónshitpeıdi. Shubarkól – 12 500 teńge bolsa, erekshe suranysqa ıe Qarajyra kómiri — 14 500 teńge.

Mundaı jaǵdaı elimizdiń basqa óńirlerinde de boldy. Máselen, Astanada kómir tapshylyǵy aıqyn bilindi.

Qazaqstannyń bas qalalary Astana men Almatynyń ózinde halyq kómirdi aptalap kútip, kezekke túnnen bastap tursa, basqa oblystardaǵy jaǵdaı qandaı ekenin elestetýdiń ózi qıyn.

Kún sýytyp, qys jaqyndaǵanda halyqty kómirmen qamtamasyz etý máselesiniń týyndaǵany mınıstrlikke syn. Sebebi, jylytý maýsymy kelgende halyqtyń kómir izdep sharq uryp, ony tapqan kúnniń ózinde qaltasyna aýyr tıip otyr.

QR Energetıka mınıstrliginiń usynǵan málimetine sáıkes, sońǵy 9 aıda ishki naryqqa 55,8 mln. tonna kómir jetkizildi. Onyń shamamen 78%-y energıa óndirýshi kásiporyndarǵa jetkizilgen. Al halyqqa jáne komýnaldyq-turmystyq qajettilikke bólingen kómir mólsheri – 8 mln. tonna.

QR Energetıka mınıstri Qanat Bozymbaev kómir baǵasy turaqty, qara altyn tapshylyǵy múlde joq ekenin aıtqan. Sonymen qatar, ótken jylmen salystyrǵanda bıyl kómir óndirisi 13,2%-ǵa kóp ekenin de atap ótken.

«2017 jyldyń 9 aıynda 75,3 mln. tonna kómir óndirildi. Bul 2016 jyldyń sáıkes kezeńimen salystyrǵanda paıyzǵa artyq. İshki naryqqa 54,7 mln. tonna kómir jetkizildi. Onyń 41,1 mln.tonnasy energıa óndirýshi káisiporyndarǵa jóneltildi. Eksport 21,1 mln. tonnany qurady. Bul ótken jyldyń sáıkes kezeńimen salystyrǵanda 16,6%-ǵa kóp. Dál osy kezeńde komýnaldyq-turmystyq qajettilikke jáne halyqqa 1 mıllıonnan astam kómir jetkizildi. Bul ótken jyldyń sáıkesinshe kezeńdegi deńgeıden 26,8%-ǵa kóp», - dedi mınıstr.

Sıfrlar osylaı sóılegenimen is júzinde halyq áli de kómir tapshylyǵyn sezip, kómir baǵasynyń qymbattaǵanyn baıqap otyr. Jylytý maýsymynda halyq mundaı qıyndyq kórmeýi tıis edi.