Kirpigińdi kirshiksiz shylap muńmen,
Kún-túnińdi ótkizdiń jylap-kúlgen.
Múmkin... «Álsizdigiń» dep kinálarsyń,
Seniń jalǵyzdyǵyńdy unattym men. 

Unattym men...
Qulazyp, kóp kúrsinip,
Keıde qanat bitkendeı kókke umsynyp.
Jalǵyzdyqtan janyńdy qutqara almaı,
Tuńǵıyqqa ózim de kettim sińip...

Daýa bolmaı dertińe dańǵaza tún,
Aýyr muńnan arylyp tańǵa jaqyn,
Aıdaı sulý keıpińde kóz ilýshi eń.
Jyrǵa aınalyp bir sátte men jazatyn.

Sen álemdi umytyp, álem – seni,
Kóńilińniń tarqaıtyn áreń sheri.
Terezeńdi tún qaqsa, beımaza muń,
Únsizdikpen basatyn taǵy eńseni.

Kúzdeı bolyp kúńirenip, jazyń júdep, 
Kinálama, aıttyń dep, nazyńdy kóp.
Meniń jalǵyzdyǵymnyń jalǵyz ǵana, 
Jubanyshy – sendegi názik júrek!..

Keterdeı-aq qurdymǵa qulap múldem,
Túsedi eske keı kúnder jylap-kúlgen.
Meniń álsizdigim be, kim biledi?!
Seniń jalǵyzdyǵyńdy unattym men...

Qalqaman Sarın