Kemeńger jigitterge aqyl aıtýdan men aýlaq, biraq oıdaǵy nárse halyq isi bolǵan soń jazǵanym edi.
Bizdiń keıbir ájeptáýir adamsynǵan jigitterimiz baspa betinde, kóptiń aldynda: «Biz qarańǵy, jabaıy, nadan, sorly edik...
Bizdiń babalarymyzdyń kózi ashylmaǵan soqyr, paıymsyz, jaryq dúnıeni tanymaǵan, dalany jaılaǵan aıýan qatary halyq edik», taǵy osy sıaqty birneshe jala, ótirik, ósek, qıanat «jalpanyshty» sózder aıtyp, el eńsesin selge salyp, jer etip júrgenderi az emes, ondaı jigitterdiń el soryna bitkeni sózsiz emes pe?
Bizdiń babamyz kimnen kem, kimnen sorly edi? Myń jyl jasaǵan qazaqtyń ishinen aqyldy, paıymdy adamdar búgingi tańda ǵana shyǵyp pa? Kemeńgerlik, danyshpandyq, el qasıetin, babamyzdyń arýaǵyn tepken tentekterdiń aýzyna qashan tyıym salynady?
Babamyzdyń adamgershiligi, erligi, aqyly, sıpat, saltanaty kóp aldynda ádil baǵa alyp, nemere-shóberelerine qashan maqtanysh, tymsal, mysal bolyp, jurt aldynda eńsemizdi qashan kóteredi. Basqalar babalarynyń arýaǵyna syıynyp bas urǵanda, ondaı mindetti boryshymyzdy basymyzdan atqarýǵa bizdiń uıalýymyzǵa jol bolsyn?
Basqalar babalarynyń minez-qulqyna, ósıet, aqylyna, ádet; ádep-ǵurpyna jańa óspirim balalardy tárbıelegende, biz halyq qasıetin, tarıhyn, mádenıetin, ádebıetin elden jasyryp, arhıv pen fılıalǵa tyǵyp, súri etkenimizdiń jóni qaıdan shyqqan ádepsizdik?
Uıalmaı-qyzarmaı konservırovat etý — jastarǵa qara perde emes pe?
Taǵy osy qalypta 10-20 jyl ómir súrsek, qazaqty — qazaq tarıhy, ádebıeti, taǵy basqa jaqsy halyq qasıetterine túsindirý úshin tilmash, perevodshikter kerek bolyp, barlyq til baılyǵynan aıyrylyp, jap-jalańash bop shyǵa kelmeımiz be degen oıǵa ne sebepti osy ýaqytqa deıin túspeıdi?

Máskeý, 1943 jyl
(Baýyrjan Momyshulynyń Esmaǵanbetke jazǵan hatynan úzindi)