2016 jyly Reuters agenttiginiń jýrnalısi Braıan Groý AQSH-ta adam aǵzalaryn satyp alý qanshalyqty múmkin ekenin anyqtady. Ol bıologıalyq materıaldardy satýmen aınalysatyn Restore Life uıymynyń elektrondy poshtasyna moıyn omyrtqanyń zertteý jobasy úshin qajet ekenin, sol úshin onyń baǵasyn bilgisi keletinin jazyp jiberdi.

Bir saǵattan keıin Restore Life prezıdenti Djeıms Bırdanyń atynan hat keldi. Ol Braıannyń uıym týraly qaıdan bilgenin suraǵan eken. Jýrnalıs jumys istep júrgen salasyndaǵy tanystarynan bilgenin jazǵan.  Osyndaı jaýaptan keıin Djeıms Bırdan eshqandaı qujat suramaı-aq moıyn omyrtqasynyń baǵasyn jazyp jiberedi. Belgili bolǵandaı, adamnyń moıyn omyrtqasy $300 turady, al ony jetkizip bergenin qalasańyz qosymsha $150 tóleýińiz qajet.   

Bir aı ótkennen keıin FedEx shabarmany qorapshaǵa salynǵan adam aǵzasyn ákeledi. Moıyn omyrtqasy 24 jastaǵy erkekke tıesili eken.

Qabir tonaýshylar

Eki ǵasyr buryn eýropalyq medıkter jańa kómilgen máıitterdi qabirden qazyp zertteý júrgizgen. Mundaı jaǵdaı jıi qaıtalanǵandyqtan qabirlerdi temir tormen qorshaıtyn bolǵan.

1832 jyly Brıtanıa bıligi máseleni sheshý maqsatynda máıithana men aýrýhanadaǵy izdeýshisi joq qaıtys bolǵandarǵa zertteý júrgizýge ruqsat berdi. Osydan keıin qabirdegi máıitti qazyp alý toqtaǵan.

Ólgen qalyńdyq

2016 jyly Qytaıdyń jol polısıasy qaıtys bolǵan áıeldiń máıitin alyp kele jatqan kólikti toqtatty. Onda úsh erkek otyrǵan. Er adamdardyń biri áıeldiń óz mahabbatyn keziktire almaı júrgenin jáne ol oǵan kómektesýge ýáde bergenin aıtady. Er adam áıelge ý bergen. Odan keıin máıitti kólikke salyp Shansı eldi mekenine apara jatqan. Onda áıeldi rasymen de kúıeý jigit kútip otyrǵan. Onyń týystary ólgen qalyńdyq úshin 35 myń ıýán berýge ýáde bergen.

Qytaıda ádette erkekterdi áıeliniń janyna kómedi. Sebebi qytaılardyń kóbi qabirde adamdy jalǵyzdyqtan osylaısha saqtap qalýǵa bolady dep oılaıdy. Eger onyń áıeli bolmasa qaıtys bolǵan adamnyń týystary ólgennen keıin de toı jasaı beredi. Bul óte ejelden kele jatqan ǵuryp. Ol týraly Qytaıdyń ataqty romanynda da  jazylǵan. Romanda áskerı qolbasshy Sao Sao qaıtys bolǵan balasyn 13 jastaǵy qaıtys bolǵan qyzǵa úılendiredi.

1949 jyly Qytaı bıligi mundaı toılarǵa tyıym saldy. Sebebi atalmysh ǵurypty ótkizý úshin adamdar qabirden jas áıelderdiń denesin urlap satatyn bolǵan.

Memlekettik «Sınhýa» agenttiginiń málimetine sáıkes, 2013 jyly Shansı molasynan 27-ge jýyq adamnyń denesin urlap áketken. 2015 jyly tek bir aýyldyń ózinen 14 máıitti qazyp alyp ketkeni anyqtalǵan.

Súıek urlaıtyndar

2009 jyly Chhapra qalasynda avtobýs jolaýshylary oryndyqtyń astyndaǵy sómkeden adam qańqasyna uqsas súıektiń shyǵyp turǵanyn baıqaǵan. Adamdar sómke ıesin polısıa bólimshesine apardy. Sómkeden  67 adam qańqasy shyqqan. Er adam olardy Balıa qalasynda $14 satyp alǵanyn aıtqan. Tekserý nátıjesinde er adamnyń 10 jyl boıy qańqalardy satýmen aınalysyp júrgeni anyqtaldy. Er adam súıekterdi  Qytaıǵa jiberip otyrǵan. Onda qańqadan adamnyń oılaý qabiletin arttyratyn dáriler jasap Eýropa men Amerıkaǵa satqan.

Qańqa saýdasymen aınalysatyndar máıitti órteıtin oryndarda týystarynyń ketýin kútip otyrady eken. Ketken boıda birden deneni alyp ketedi. Sonymen qatar, jerleý rásimine aqshasy joqtar máıitti sýǵa aǵyzyp jiberip otyrady.  Sol denelerdi alyp, torǵa orap ózenge eki aptaǵa qoıady. Ol ýaqytta balyqtar etin jeıdi. Qaldyqtardy sýǵa qaınatyp, kúnge bir apta keptiredi. Súıek aǵarǵannan keıin ony tuz qyshqylyna salyp alady.

Úndistanda 2017 jyldyń naýryz aıynda polıseıler 365 adamnyń súıegin tasymaldaǵandardy ustady.