Qazaqstan men Qyrǵyz Respýblıkasy shekarasyndaǵy qyrǵyz tarapynyń kedendegi kemshilikterdi retke keltirý boıynsha usynysqa áli de resmı túrde jaýap kelip túsken joq. 

Bul týraly QR Qarjy mınıstrligi Memlekettik kirister komıteti tóraǵasynyń orynbasary Ǵosman Ámrın málim etti, dep habarlaıdy «QazAqparat» HAA.

«Bul másele búgin ǵana paıda bolǵan joq. Ótken jyldary da qyrǵyz tarapymen birneshe ret talqylanǵan. Eýrazıalyq ekonomıkalyq komısıaǵa erekshe tapsyrma berilip, olardyń baıandaýy boıynsha qyrǵyz tarapynyń keden salasyna qatysty kemshilikteri men buzýshylyqtary dáleldengen. Ol anyq. Demek,bul Qazaqstannyń ózdiginen shyǵaryp alǵan sheshimi emes. Endigi kezekte muny sheshýdiń qandaı joly bar? Ol - Qyrǵyz Respýblıkasynyń keden qyzmetimen birlesejumys atqarý», - deıdi komıtet tóraǵasynyń orynbasary.

Ǵosman Ámrınniń aıtýyna qaraǵanda Qazaqstan tarapynan Qyrǵyz Respýblıkasyna birneshe usynys joldanǵan.

«Ótken jyly óz basym Úkimettiń tapsyrmasymen Qyrǵyzstanǵa baryp, baýyrlas halyq bolǵasyn naqty qandaı másele baryn aıtqan edik.Ekinshiden, osy jyly qaıtadan bul máseleni kóterip otyrmyz. Jaǵdaı ózgergen joq. Bárin de kedendik erejeler men talaptardy jipke tizgendeı aıtyp, kórip otyrmyz desek te, nátıje oń bolǵan joq. Jalpy olar (qyrǵyz tarapy - avt.) «ıá, qaraıyq, jumysty kúsheıteıik. Kontrabandaǵa jol bermeıik» dep aıtqan. Oǵan bári kelisedi. Endigi kezekte de jumys boıynsha kelisip, birge bárin retteıik dep otyrmyz. Iaǵnı jaýap kútip otyrmyz», - deıdi ol.

Onyń aıtýynsha, atalǵan máseleni sheshýdiń úsh joly bar.

«Birinshiden, eki jaqqa da taýardyń quny birdeı bolýy kerek. Salyqtarymyz birdeı bolýy tıis. Kedende olar taýardy 1, biz 10 dollarmen alsaq, olaı bolmaıdy. Ekinshiden, erteń sóz bolmasyn, basqasha kózqaraspen qarap otyr degen túsinikti taratpaýyn, ıaǵnı keden boıynsha barlyq tarapqa birdeı qarap otyrǵanymyzdy bildirdik. Búginge deıin usynysymyz jalǵyz - kedende birlese jumys atqarý. Úshinshiden, bir-birimizge qandaı taýarlar, qashan keldi, salystyrý úshin qandaı baǵamen keldi degen syńaıda aqparat almasyp otyraıyq degen usynysty joldadyq. Taǵy da aıtarym, baýyrlas el bolǵandyqtan, bul máseleni birlese sheshýge tyrysýymyz kerek. Kelispeıtin bolsa, biz  baqylaý jumysyn kúsheıte beremiz», - deıdi Ǵosman Ámrın.

Memlekettik kirister komıteti tóraǵasynyń orynbasarynyń sózine súıensek, kontrabanda máselesi bárine belgili bolyp otyr.

«Qyrǵyz depýtattary óz elderinde bul máseleni kótergen. Búgin paıda bolǵan dúnıe emes. Bárimiz de qandaı jaǵdaı bolǵanyn bilemiz. Qyrǵyz tarapy kelisemiz dep otyr. Biraq, resmı túrde jaýap áli kelip túsken joq», - dep túıdi Ǵosman Ámrın.