2015 jyly Qazaqstanda teńgeniń aıyrbas baǵamynyń shuǵyl aýytqýlaryna jol berilmeıtin bolady, - dep habarlaıdy Tengrinews.kz tilshisi. Qazaqstan Úkimeti men Ulttyq banktiń ekonomıkalyq saıasattyń 2015 jylǵa arnalǵan negizgi baǵyttary týraly tıisti málimdemesi primeminister.kz saıtynda jarıalandy.
"Valútalyq saıasat kazaqstandyq ekonomıkanyń ishki jáne syrtqy básekege qabilettiligi arasyndaǵy tepe-teńdikti qamtamasyz etýge baǵyttalady. Sonymen birge, teńgeniń aıyrbas baǵamynyń shuǵyl aýytqýlaryna jol berilmeıdi. Valúta naryǵynda alypsatarlyqty shekteý boıynsha sharalar qabyldanady. 2015 jyly Ulttyq bank Úkimetpen birlesip, qolma-qol sheteldik valúta naryǵynda aıyrbas pýnktteriniń qyzmetine qoıylatyn talaptardy arttyrý bóliginde zańnamaǵa ózgerister engizedi", - delingen málimdemede.
Ulttyq valútanyń ekonomıkadaǵy rólin arttyrý maqsatynda mynadaı sharalar qabyldanatyn bolady: teńgedegi jınaqtardy yntalandyrý maqsatynda "Qazaqstandyq depozıtterge kepildik berý qory" AQ-nyń teńgedegi depozıtter boıynsha tóleıtin salymshylar úshin kepildikti somasy kapıtaldandyrýdy ulǵaıta otyryp, 5 mıllıon teńgeden 10 mıllıon teńgege deıin ulǵaıtylady jáne halyqtyń dollardaǵy kepildik beriletin depozıtteri boıynsha usynym beriletin syıaqy mólsherlemesiniń eń joǵary mólsheri jyldyq 4 %-dan 3%-ǵa deıin tómendetiledi.
Sonymen birge, taýarlar men kórsetiletin qyzmetterdiń baǵalaryn shartty birliktermen belgileýge tyıym salynady.
