"Bizdiń qazaq «aqyrzaman» dep alańdamasa da bolady".

Kórshi qarıa meni osylaı dep jubatty.  Jaryqtyq, Elbasymyz Nursultan Ábishulyna qulaı berilgen. Shyn senedi, shyn qadirleıdi. Keıde oılaısyń, myna qazaqtyń bári osy qarıadaı bolsa, Nurekeń múmkin qazaqtyń aıyn ońynan, kúnin solynan týǵyzar ma edi?! Qart aıtady: «Eger aqyrzaman bolyp jatsa, basqa jurtty bilmeımin bizdiń Elbasy eshqashan qazaq elin topan sýdyń astynda qaldyrmaıdy. Tym qurysa úlken keme jasatyp, Alashtyń urpaǵyn aman saqtap qalady». Durys-aq!

Múmkin bul keme «Nur kemesi» dep atalatyn bolar, múmkin ol Qazyǵurttyń basynda qalqaıyp turyp, qazaǵyn aman saqtap qalar. Áı, biraq Elbasyna ońaı tımeıdi-aý! 130 ulttan er-áıelin juptap, eki adamnan alatyn bolsa, 260 adam. Bul endi kemege aýyrlyq ákeletini sózsiz. Nede bolsa óz qazaǵymnan alaıyn dep Aqordanyń tórinen Alash balasyna kóz qyryn salatyn shyǵar. Sondada qıyn...

«Uly júz, orta júz, kishi júz. 14 oblys.  Orystildi qazaq, qazaqtildi qazaq. Baı qazaq, kedeı qazaq. Oralman qazaq, jergilikti qazaq. Oralmannyń ishinde Qytaıdan kelgenin alamyn ba, Mońǵolıadan kelgenin alamyn ba, joq, álde Ózbekstannan kelgenderin, álde Túrkmenstan, álde Reseı... Qaısysy durys?

Musylman qazaqty alamyn ba, kápir qazaqty ma? Kápirden alsam, hrıstıany durys pa, álde, krıshnaıtter durys pa? Qaısysyn alǵanym durys? Nede bolsa musylmany durys-aý! O dúnıege barǵanda Alla Taǵalanyń aldynda betimiz jaryq bolatyn shyǵar... Al onda musylman qazaqtyń ishinen kimdi alamyn? Ýahabbıst pe, Quranıtter me, Sopylar ma? Bulardyń qaısysy Islamdy taza ustanyp júr eken, á...»

Bul suraqtardyń ózi kózi ashyq, kókiregi oıaý adamǵa «aqyrzamannan» kem soqpaıtyn suraqtar.

Elbasyna qıyn boldy-aý! «Nur kemesin» jasatpaýǵa taǵy bolmaıdy. Sheraǵańnyń, Sherhan Murtazanyń: «Elbasy Nursultan Nazarbaev adamzatty topan sýdan aman alyp shyqqan Nuh paıǵambarǵa uqsap, Qazaqstandy sonaý 90-jyldary Táýelsizdik jolynda bastalǵan kúreste aman alyp shyǵyp, el qyldy...» degen sózi bar.   «...Men Nursultandy ózim azamat tarıhyndaǵy eń uly adam dep baǵalaıtyn Musylman jurtynyń ardaqty perzenti Muhammed paıǵambarǵa uqsatamyn" dedi emes pe Farıza Ońǵarsynova.

Qaıtpek kerek? Kedendik odaqtas Reseıdiń ózi «Nur kemesin» jasatýǵa aǵash berýden bas tartýy da múmkin. Qazaq qutqarylyp ketse qıyn ǵoı... Álde, Belorýssıa men Reseımen birigip jasaımyz ba? Jo, joq. Olar der shaǵynda Alashty aıdalada qaldyrýy ǵajap emes.

Elbasy bolýda qıyn eken ǵoı... Áıteýir joǵarydaǵy abyz qarıa aıtqandaı, bizdiń qazaq «aqyrzaman» dep alańdamasa da bolady eken. Qaıtken kúndede «Nur kemesi» qazaqtyń jerinde jasalatyn shyǵar...

Haziret Ábdilda

Sýret ǵalamtordan alyndy