Qazaqstan Prezıdenti Nursultan Nazarbaev "Nur" sózin óz esimimen baılanystyrmaýdy eskertti jáne "Nurly jol" baǵdarlamasynyń mánin túsindirdi, - dep habarlaıdy Tengrinews.kz tilshisi. 

"Jýyrda men bir hat aldym. Onda ne bolsa, soǵan "nur" degen sózdi qosyp qoıatyny aıtyldy, "sony nege toqtatpaısyz, bul jeke basqa tabynýǵa ákelip soǵady ǵoı dep. Men eshkimge sózdiń aldyna “nur” dep qoıyńdar degen joqpyn. “Nur” degenniń bárin meniń atymmen baılanystyrady. Joq, olaı emes. Myna bizdiń jańa ekonomıkalyq saıasatymyz da “Nurly jol” dep atalady. “Nurly” degen sáýleli, jarqyn, ashyq, aq jol degen sóz. Eger olaı bolsa, "nur" degendi qospaıtyn bolaıyq", - dedi Qazaqstan Prezıdenti jalpyulttyq telekópir barysynda. 

Buǵan qosa, Memleket basshysy óńirlerdiń kireberisterinde ilinip turatyn óz portretterin eńbekpen qamtý kórsetkishteri týraly kestelermen almastyrýdy talap etken bolatyn. 

Sýret: Tengrinews.kz