Tanymal bloger QR Aqparat jáne komýnıkasıalar mınıstri Dáýren Abaevqa erekshe usynys tastady, dep habarlaıdy Qamshy.kz aqparat agenttigi "Nur Otan" partıasynyń jelidegi paraqshasyna silteme jasap.

Óz ótinishin bloger ári zańger Aıgúl Orynbek vıdeobaılanys arqyly jetkizdi. "Nur Otan" partıasynyń respýblıkalyq qoǵamdyq qabyldaý bólmesine kelgen mınıstr birqatar azamatty qabyldap, vıdeobaılanys arqyly el turǵyndarynyń ótinishterin tyńdaǵan. Shymkentten baılanysqa shyqqan zańger "Eýrazıa" telearnasyndaǵy "Qalaýlym" baǵdarlamasyn jabý máselesin qozǵady.

Onyń aıtýynsha, baǵdarlama reseılik atyshýly «Dom-2» realıtı-shoýyna uqsaıdy.

"Qalaýlym" baǵdarlamasy boıynsha áleýmettik jelide de jazǵan bolatynbyz. Bul baǵdarlamaǵa qatysty zertteý de júrgizip kórdim. Túrkıa elinen eken. Túrkıanyń vıse-premeri bul baǵdarlamaǵa qarsy bolyp, jabylǵan. Iaǵnı, jastardyń beıádep sózderi, tóbelesi baǵdarlamada beleń alyp ketkennen keıin "ulttyq mádenıetimizge qarsy" dep japqan. Endi ózge elde qańsyq dúnıe bizge tańsyq bolýda. Jastarymyzdyń buzylýyna túrtki bolyp otyrǵan bul baǵdarlama nege bizde kórsetiledi?", - dedi Aıgúl Orynbek.

Dáýren Abaev baǵdarlamaǵa qatysty saraptama júrgizetinin, arnaıy shaǵym jasalǵandyqtan mindetti túrde tekseriletinin aıtty. Sondaı-aq buqaralyq aqparat quraldarynyń birinshi kezekte elimizdiń azamattarynyń sanasyn jańǵyrtyp, tárbıeleýi  kerektigin jetkizdi.