Osydan biraz ýaqyt buryn Ulttyq valúta merekesi ótken bolatyn. Osyǵan qatysty feısbýk jelisinde ulttyq valúta týraly áńgime qyzý talqyǵa tústi, — dep jazady Qamshy.kz aqparat agenttigi.
— Teńgeniń týǵan kúni eken ǵoı, quttyqtap baramyz ba? — dedi dollor.
— Eske alyp qaıtamyz ba? — dedi orystyń rýbli.
— Nege? Ol áli tiri ǵoı.
— Aaa, keshir. Jaraıdy, baraıyq.
Osy kezde ózbektiń somy sózge aralasty.
— Men teńgemen sóıleskem. Týǵan kún toılaıtyndaı jaǵdaıym joq dep jatqan. Hali múshkil kórinedi.
— Sen kimsiń? — dedi eýro ózbektiń somyna.
— Men Ózbekstannyń ulttyq valútasymyn.
— Mmm, aıyp etpe, qazirgi jas valútalardy tanı bermeımin.
Ózbektiń somy shamdanyp qaldy.
— Men jas bala emespin! Senen úlkenmin!
Som rasynda da eýrodan úlken edi.
Bári topyrlap, teńgeniń úıine kirip kelgende, bular sasyp qaldy. Baıǵus teńge qonaq keledi dep oılamapty da.
— Kelińder, tórletińder. Qazir ǵana quran oqyp bitip em, — dedi teńge.
— Quran? Ne úshin? — dedi qonaqtar.
— Baıaǵyda baqılyq bolǵan qaǵaz bir teńgelikten bastap qaǵaz júz teńgelikke deıingi baýyrlarymyzdyń qurmetine... Aıta bersem tizimi kóp. Búgin solardyń týǵan kúni ǵoı. Quran baǵyshtap degendeı...
— Durys...
— Sender Reseıdiń valútasy bolasyńdar ma? — dedi eýro teńgege qarap.
— Joq, nege olaı deısiń?
— Oryssha jazýly tur.
— Eee, — dedi myń teńgelik. — Sen myna betimdi ǵana kórip tur ekensiń ǵoı. Mine, myna betime qara, qazaqsha jazylǵan, — dep ekinshi jaǵyna burylyp jatqan myń teńgelik qaǵaz osy kezde ǵana ózinen kishilerge buıryq berdi. — Áı, neǵyp otyrsyńdar? Turyńdar, qonaq kúteıik. Búgin týǵan kúnimiz.
— Men toılamaımyn, — dep 20 000 teńgelik pen 10 000 teńgelik teris aınaldy.
— Nege?
— Biz 1993 jyly joq edik. Iaǵnı, búgin meniń týǵan kúnim emes.
— Ol kezde men de joq edim, sonda da toılaǵaly jatyrmyn ǵoı, — dedi myń teńgelik.
— Men de joq edim, — dedi 2000 teńgelik.
— Men de joq edim, — dedi 500 teńgelik.
— Men de joq edim, — dedi 200 teńgelik.
Qaǵaz aqshalardan eshkim qalmaı, bári bir shetke ysyrylyp ketti.
— Oıbaı, endi myna qonaqtardy kim kútedi? — dep sary baqyr júz teńgelik shart ete qaldy.
— Sen kútesiń. Sen 1993 jyly bar ediń.
— Joq! Ol kezde qaǵaz júz teńgelik edi! Men sıaqty tıyn emes!
Qazaq banknottarynyń basy birikpeı-aq qoıdy. Shynymen de, 1993 jyly 15 qarashada aınalymǵa shyqqan banknottardan eshqaısysy da qalmapty. Bári qunsyzdanyp, ómirden ótip ketken. Endeshe nesine jetisip týǵan kún toılaıdy?
Teńgeniń týǵan kúni solaısha atalmaı qalypty.
Myqtybek Oraztaıuly
