«Bulaq kórseń, kózin ash...» deıdi dana halqymyz. Dál osy danaly sózdi maqsat etken «Zerdeli» aqyl oı damytý ortalyǵynyń dırektory Yrysbek Máýitulynyń bastamasymen ótetin árbir shara mektep oqýshylarynyń bilimge degen qushtarlyǵyn arttyrýǵa baǵyttalǵan.

18 qarasha kúni jyl saıyn dástúrge aınalǵan «Altyn saqa» matematıkalyq olımpıadasynyń marapattaý rásimi ótti. «Astana daryny» óńirlik ǵylymı-praktıkalyq ortalyǵynyń qoldaýymen, qabileti joǵary jas daryndarǵa qoldaý kórsetý maqsatynda uıymdastyrylǵan olımpıadaǵa Astana qalasy bilim berý mekemeleriniń 5-6 synyp oqýshylary qatysty. Saıystyń İ kezeńi mektep bazasynda ótkizilip, qatysýshy 1500-den astam oqýshynyń ishinen joǵary upaı jınaǵan 300-ge jýyq oqýshy İİ kezeńge jiberilgen bolatyn. Olımpıadanyń qorytyndysy boıynsha júldeli İ, İİ, İİİ oryn ıegerleri anyqtalyp, jeńimpazdar arnaıy syılyqtarǵa ıe boldy. Dúbirli dodada top jaryp, İ oryn ıelegen 4 oqýshyǵa 50 000 teńge syılyq sertıfıkaty, İİ oryn alǵan 15 oqýshyǵa 10 000 teńge kóleminde syılyq sertıfıkaty, İİİ oryn alǵan 25 oqýshyǵa 5000 teńgeden syılyq sertıfıkaty tabystaldy.

Bir aıta keterligi – birinshi oryn ıelengen tórt oqýshyǵa berilgen qarjylaı syılyqty ultjandy azamat Omar Jýsanbaıuly óz qaltasynan shyǵardy. «Ulttyń erteńi – osy jas balalardyń qolynda. Erteń osy oqýshylardyń arasynan halyqaralyq saıystarda nátıje kórsetip, úzdik nátıjelerge jetse, elimizdiń ǵylymy men mádenıetiniń damýynan úlesterin qossa dep tileımin», – deıdi Omar Jýsanbaıuly.

Deńgeıi joǵary dep tanylǵan 40 oqýshy arnaıy gramotalarmen marapattalyp, «Matematıka olımpıadasyna daıyndyq bastamalary» atty oqý quraly syıǵa tartyldy. Olımpıadaǵa qatysqan mektep oqýshylyrynyń ortasha upaıy jáne oryndar sany boıynsha jaqsy nátıje kórsetken №73 fızıka-tehnıkalyq lıseıine «Altyn saqa» kýbogi tabystaldy.

Mektep oqýshylaryn yntalandyryp, qabiletin arttyrýǵa baǵyttalǵan olımpıadalar men saıystar ortalyqtyń uıymdastyýymen áli de jalǵasyn tabady.