Qazaqstan Respýblıkasynyń 2015-2025 jyldarǵa Sybaılas jemqorlyqqa qarsy strategıasy boıynsha baǵdarlamalardy júzege asyrý jumystary qarqyndy júrip jatyr, dep habarlaıdy Qamshy.kz aqparat agenttigi.
Strategıanyń basty maqsaty sybaılas jemqorlyqtyń kez kelgen kórinisine atymen tózbeýshilik ahýalyn qalyptastyra otyryp, búkil qoǵamdy sybaılas jemqorlyqqa qarsy qozǵalysqa tartý. Osyǵan baılanysty Qazaqstanda jastar arasynda túrli sharalar uıymdastyrylyp, jumystar júrgizildi.
«Jastar arasynda sybaılas jemqorlyqqa qarsy mádenıet qalyptastyrý» taqyrybynda Astana qalasynyń jastar saıasaty máseleleri basqarmasy «Álem» volonterlyq ortalyǵymen birige otyryp elimizdiń birqatar joǵarǵy oqý oryndarynda stýdenttermen kezdesý ótkizdi. Kezdesý uıymdastyrylǵan JOO-dary qatarynda S.Seıfýllın atyndaǵy Qazaq agrotehnıkalyq ýnıversıteti, Qazaq tehnologıa jáne bıznes ýnıversıteti, Qazaq ekonomıka, qarjy jáne halyqaralyq saýda ýnıversıteti, Astana medısınalyq ýnıversıteti bar. Sonymen qatar, áskerı boryshyn ótep jatqan boryshkerler arasynda da úgit-nasıhat sharalary ótti.
Kezdesý barysynda Qazaqstandaǵy sybaılas jemqorlyq boıynsha jalpy máseleler talqylandy. Arnaıy shaqyrylǵan spıkerler stýdenttermen sybaılas jemqorlyqtyń memleket pen qoǵamnyń damýyna teris áserlerin baıandady. Sonymen qatar sybaılas jemqorlyqpen kúresý boıynsha júzege asyp jatqan ádister men sybaılas jemqorlyqqa tótep berýge baǵyttalǵan josparlar aıtyldy.
Stýdentterge jemqorlyqtyń qaıǵyly saldaryn kórsetetin arnaıy daıyndalǵan áleýmettik rolıkter kórsetildi, sonymen qatar sybaılas jemqorlyqqa qarsy áreketti árkim birinshi kezekte ózinen bastaý kerektigi, al jemqorlyqqa ıtermeleıtin jaǵdaılar oryn alǵanda quzyretti organdarǵa birden habarlaý qajettigi túsindirildi.
Kezdesý qyzyqty, ári nátıjeli bolýy úshin aýdıtorıa bılik jáne ómir súrý sharttaryna narazy halyq bolyp ekige bólinip, debattar ótkizdi. Bul elimizdegi mańyzdy máselelerdi, sybaılas jemqorlyqqa ıtermeleıtin jaǵdaılardy anyqtaýǵa, ony sheshý joldaryn talqylaýǵa múmkindik berdi. Debat jeńimpazdary kýboktar jáne gramotalarmen marapattaldy. Sybaılas jemqorlyqqa qarsy strategıa aıasynda sharalar kesheni áli de jalǵasyp keledi. Elimizdiń túkpir-túkpirindegi jastar arasynda atalmysh taqyrypty keńinen taratý josparly túrde iske asyp jatyr.
