Ózgege jasaǵan jaqsylyǵyń ózińe mindetti túrde qaıtady. Erte me, kesh pe, mańyzdy emes, alaıda jaqsylyqtyń qaıtarymy mol ekenine taǵy bir kózimiz jetti. Amerıkada bolǵan oqıǵa kópshiliktiń kókeıine oı salar.

Amerıkalyq Fıladelfıa shtatynda kóshe kezip, qaıyr tilep júrgen Djonnı Bobbıt álemdegi eń baı qaıyrshy ataǵyna ıe boldy. New York Post basylymynyń málimetinshe, áleýmettik jeli qoldanýshylarynyń kómegimen jınalǵan 400 myń dollarǵa jýyq qarjyǵa Djonnı úı aldy. Endigi kezekte ózi talaı jyldan beri armandaǵan Ford Ranger kóligin satyp almaqshy.

Qomaqty somany qaıyrshyǵa eshqandaı qatysy joq amerıkalyq turǵyn Keıt Makklúr jınaǵan. Oqıǵa qyzdyń Djonnımen qalaı tanysqany týraly áleýmettik jelidegi paraqshasyna jazǵan postynan keıin bastalǵan.

Qarashanyń sońynda Keıt kóligimen serýendep júrgen ýaqytta janarmaıy taýsylyp, jol ortasynda qalyp qoıady. Sonda Keıtke kómektesken jalǵyz adam kóshe kezip júrgen qaıyrshy edi. Sol qaıyrshy búginde jeke úıi men qomaqty qarjysy bar Djonnı boldy. Óziniń jeıtin tamaǵyn áreń taýyp júrgen úısiz adam sońǵy aqshasyna janarmaı alyp, Keıtke bergen. Qatty tolqyǵan qyz aqshany mindetti túrde qaıtarýǵa ýáde beredi. Jáne osy oqıǵa jaıynda óz paraqshasyna jazady. Nátıjesinde jeli qoldanýshylary er adamdy qoldap, kómektesýge daıyn ekenderin jetkizgen.

Bobbıttiń endigi jospary – qujattaryn túgendep, jumysqa ornalasý. Sondaı-aq ózi sekildi kómekke muqtaj jandarǵa qol ushyn sozýdy qalaıdy.