«Sandyq» dáýirdiń balalaryna arnalǵan, ana tili – qazaq tilinde sóılep júrgen nemese bılıngvıst balalarǵa qazaq tiliniń qoldaný ereksheligin kórsetip, odan ári damytýyna múmkindik beretin platformalar az. Bar bolǵan jaǵdaıda sapasy men mazmuny syn kótermeıdi. Osy rette qazirgi tehnologıa men qazaq tilin oqyp, damytýdy ushtastyrý arqyly bilim berýshi men bilim alýshyǵa (balaǵa) tıimdi elektrondyq kómekshi qural jasaý máselesi óziniń ózektiligin tanytyp keledi.
«balatili.kz» saıty balalarǵa qazaq tilin úıretýge arnalǵan ınteraktıvti onlaın platforma. Qazaq tilin oqyp, damytqysy keletin 5 jastan joǵary jasóspirimderge, sonymen qatar bala tárbıesi men oqytýdy júzege asyrýshy tárbıeshiler men muǵalimderge, ata-analarǵa arnalady. Saıt ıntýıtıvti izdeý júıesi men yńǵaıly klassıfıkasıalaý júıesi bar onlaın platforma negizinde jumys isteıdi.
«balatili.kz» saıtynda dybys pen árip, sóz, sóz tirkesi, sóılem, mátin, turaqty sóz tirkesterine qatysty dıdaktıkalyq oqý materıaldary, sonymen birge balalardyń tildik, jazý jáne durys jazý, oqý daǵdylaryn qalyptastyrý maqsatyndaǵy oqytý materıaldary qamtylady.
Oqytý men oıynnyń negizinde qurylatyn qazaq tilin oqytýǵa baǵyttalǵan keńistik jeke nemese toppen, bilim berý mekemesinde nemese úıde qoldanýǵa bolatyn bilim berýshi ınteraktıvti mýltımedıaly mazmundy quraıdy.
Balanyń jeke ózindik jumys isteýine arnalǵan jumys paraqtary, uctazdar men tárbıeshilerge, ata-analarǵa ádisteme paraǵy usynylady.
Lıngvodıdaktıkalyq maqsattaryna sáıkes oqytý materıaldary mazmuny men nysanyna baılanysty birneshe topqa toptastyrylady. Olar: «Árip», «Dybys», «Sóz», «Sóılem», «Sóz tirkesteri», «Mátin», «Sanamaq», «Shyǵarmashylyq jumys», «Ádistemelik burysh».
Qazaq áripteriniń jazylýynan bastap qazaq tiliniń gramatıkasy men orfografıasyn meńgerýge qatysty materıaldar, sonyń ishinde ınteraktıvti álippe, jas erekshelikterine sáıkes aýdıodıktanttar, ınteraktıvti oıyndar, tapsyrmalar, kallıgrafıalyq daǵdylardy damytýǵa arnalǵan bastyrmalar toptastyrylady.
Qazaq tiline ǵana tán erekshe ataýlar men sóz tirkesterine qatysty semantıkalyq túsindirmeleri beriledi. Turaqty sóz tirkesteriniń mazmunyna nazar aýdarylyp, olardy qoldaný erekshelikterine qatysty ınteraktıvti oıyndar usynylady.
Balalardyń jas erekshelikterine sáıkes oqýǵa arnalǵan kórkem mátinder, sonyń ishinde qyzyqty áńgimeler, taqyryptyq óleńder, ınteraktıvke negizdelip jasalǵan jańyltpashtar, jumbaqtar men maqal-mátelder toptastyrylady.
Sonymen qatar usynylatyn mátinniń mazmunyn túsinip, mazmundaýdy, mazmundamany jazýdy, tirek sózder arqyly áńgime qurastyryp, óz oıyn qalyptastyrýǵa kómektesetin arnaıy tapsyrmalar ázirlenedi. Balalardyń sózdik qoryn baıytý arqyly qazaq tiliniń qazynaly baı tildik álemine jeteleý, oqý daǵdysyn damytý, sózdik qoryn molaıtý sıaqty daǵdylardy qalyptastyrý negizgi maqsatty quraıdy.
Shyǵarma, esse, mátin túzý, mátinge taqyryp qoıý, jazý ádisteri usynylady. Balalardyń jas erekshelikterin eskere otyryp, basyp shyǵaryp alýǵa bolatyn boıaýǵa arnalǵan sýretter, sýret salýdy úıretýge arnalǵan materıaldar toptastyrylady. Olardyń mazmuny ulttyq sıpatta bolady. Qazaqtyń ulttyq kıimderi, úı jabdyqtary, etnografıalyq ataýlar men uǵymdar, ulttyq oıyn túrleri, etnıkalyq sıpattaǵy onomastıkalyq ataýlar, t.b. taqyryptaryn qamtıdy.
Jalpy lıngvısıkalyq máselelerge qatysty, balalardyń oı- órisi men sóz baılyǵynyń damýyna, azamat retinde qalyptasýyna, tárbıege qatysty arnaıy mamandardyń maqalalary, ǵylymı eńbekteri, sonymen qatar balabaqsha men bastaýysh synybynyń muǵalimderine kómekshi quraldar, sabaq josparlary jarıalanyp otyrady.
