Uıyqtap júrip óńindegi sekildi júretinder bar. Alaıda bul somnambýlızmniń jalǵyz túri emes.

Bı-bı-sı korespondenti Sallı Abrams túsinde ne istep ne qoıǵanyn bilmeıtin adamnyń bastan ótkergen oqıǵasyn baıandaıdy.

Sara Tomdy ortaq dostarynyń úıinde kezdestirdi. Ekeýi bir-birin bir kórgennen unatyp qaldy. Sara men Tom kezdesip júrdi. Barlyǵy jaqsy edi. Tek bir jaǵdaı ony eseńgiretip jiberdi.

Túnde Tom Sarany jynystyq qatynasqa májbúrlemekshi bolǵan. Abyroı bolǵanda, Sara sytylyp shyǵyp kete aldy.

Ol túndegi jaǵdaı týraly umytyp ketti. Biraq birneshe aıdan keıin jaǵdaı qaıta qaıtalandy.

Tań erteń Sara aıyrylysatynyn aıtyp, túndegi jaǵdaıdy Tomnyń esine salǵanda Tom ne istegeninen habarsyz bolyp shyqty.

Sara ne oılaryn da bilmedi. Tom ómirde múlde basqa adam edi. Meıirimdi, qamqor. Al túnde quddy bir oǵan basqa adamnyń jany kirip ketkendeı boldy. Sara kóp oılana kele Tommen tanystyqtarynyń basynda ol kóp jyl buryn burynǵy súıiktisi Karendi zorlaǵany úshin 7 jyl túrmege otyryp shyqqanyn aıtqany esine tústi.  

Sara Tomnyń basqa da túsiniksiz qylyqtaryn esine túsirdi. Tom túnniń ortasynda jartylaı ǵana kıinip belgisiz baǵytqa qaraı ketip qalatyn. Tań erteń túnde bolǵan jaǵdaı esinde bolmaıtyn.

Seksomnıa

Sara Tomdy dárigerge kórinýge kóndirdi. Dáriger Tomdy klınıkalyq tekserýge jiberdi. Ol túni boıy basyna ornatylǵan túrli qurylǵylarmen uıyqtady.

Tekserý nátıjesi boıynsha, Tomnyń bir ýaqytta uıyqtap jáne oıaý júretini anyqtaldy. Tom óte sırek kezdesetin seksomanıaǵa shaldyqqany belgili boldy.

«Onyń ensefalogrammasynan qysqy ýaqyttarda uıqy kezeńin bildiretin tolqyndarda yrǵaqty syzyqtardy baıqaýǵa bolady. Bul degenimiz sol syzyqtar kezdesetin kezeńde ol oıaý júredi» dep túsindirdi neırolog dáriger Gaı Leshzıner.

Iel ýnıversıtetiniń profesory Meır Krıger Tomnyń dertin lýnatızmniń bir túri ekenin aıtady. Bul dertke shaldyqqan adam mıynyń este saqtaý, sheshim qabyldaý jáne  durys oılaý qabiletine jaýap beretin bóligi uıyqtap jatady. Al kórý, qımyl, qozǵalys jáne emosıaǵa jaýap beretin bóligi oıaý bolady. Sondyqtan adam júredi, sóıleıdi, tipti as ázirleı alady. Biraq bul ýaqytta ózine esep bere almaıdy.

Atalmysh aýrý Tomdy aqtap shyǵa ala ma? Ázirshe belgisiz. Biraq Tom ózine taǵylǵan aıyptan aqtalyp shyǵamyn dep úmittenedi. Ol osy ýaqytqa deıin ádiletsiz túrmege otyrdym dep oılaǵan.

«Zorlaý áreketi bolǵan keshte Tomnyń basyna elektrodtar ornatylyp tekserilmegendikten tolyq senimmen seksomanıanyń saldarynan qyzdy zorlady ma joq basqa nıeti bolǵan bolmaǵanyn naqty aıta almaımyz. Sot ony kináli dep tapty ǵoı» deıdi dáriger Leshzıner.

Degenmen úmit bar. Sońǵy jyldary uıyqtap jatyp qylmys jasaǵandardy aqtap shyqqan jaǵdaılar bolǵan. Máselen, Torontoda er adam uıyqtap jatyp, kólikke otyryp, enesiniń úıine baryp, ony óltirgen. Sot qylmys jasaǵan adamdy aqtap shyqty.

Oǵan uqsas jaǵdaı Arızonada da boldy. Birneshe jyl buryn er adam óz áıelin óltirgen. Ol muny ádeıi emes, uıyqtap jatyp jasaǵanyn aıtqan. Alaıda sot ony kináli dep tapty.

Seksomanıadan emdelýge bola ma?

Tomǵa qoıylǵan dıagnoz Saranyń eseńgiretip jiberdi. Sebebi ol osy ýaqytqa deıin Tomdy kináli emes ekenine senimdi bolǵan.

«Túnde qylmys jasap, tań erteń eshteńe esińde qalmaǵany qıyn ekeni anyq. Ol túnde ne istegenin múlde bilmeıdi ǵoı» deıdi Sara.

Ókinishke qaraı, atalmysh aýrýdy emdeıtin eshqandaı ádis ázirshe joq. Alaıda onyń aldyn alýǵa bolady.

Dárigerler seksomanıaǵa shaldyqqandarǵa ózge adamnyń denesin sezbeýi úshin kıimmen uıyqtaýǵa keńes beredi. Kúızelis, ishimdik jáne durys uıyqtamaý da aýrýdyń ýshyǵýyna ákeledi.

Tom psıhologıalyq saýlyǵy úshin atalǵandardyń barlyǵynan basyn aýlaq ustaýǵa tyrysady. Tomnyń aıtýynsha, buryn ondaı jaǵdaılar aıyna bir márte bolsa, qazir birneshe jylda bir márte bolady.