Bakýda Qazaqstan Respýblıkasy men Ázerbaıjan Respýblıkasy arasyndaǵy Ekonomıkalyq yntymaqtastyq jónindegi úkimetaralyq komısıasynyń kezekti 14-otyrysy ótti dep habarlaıdy Qamshy.kz aqparat agenttigi.

Otyrysqa Komısıanyń teń tóraǵalary – Qazaqstannyń Energetıka mınıstri Qanat Bozymbaev jáne Ázerbaıjannyń Energetıka mınıstri Párvız Shahbazov, Komısıa músheleri, sondaı-aq eki eldiń sarapshylary qatysty.

İs-shara sheńberinde taraptar Ekonomıkalyq yntymaqtastyq jónindegi úkimetaralyq komısıasynyń 13-otyrysynda qabyldanǵan sheshimderdiń júzege asý barysyn qarastyryp, ekijaqty yntymaqtastyqtyń saýda-ekonomıkalyq, otyn-energetıkalyq, aýyl sharýashylyq, tranzıttik- kóliktik, mádenı-gýmanıtarlyq jáne taǵy basqa salalaryndaǵy máselelerin talqylady.

P.Shahbazov otyrysty ashý kezinde ótken jyldan bastap eki eldiń saýda-ekonomıkalyq yntymaqtastyǵy oń serpin kórsetkenin atap ótti. Sondaı-aq, Qazaqstan Prezıdenti N.Á.Nazarbaevtyń aǵymdaǵy jylǵy sáýir aıynda Bakýǵa jasaǵan sapary aıasynda eki el basshylary saýda-ekonomıkalyq yntymaqtastyqty damytý men ony ári qaraı ilgeriletý boıynsha tıisti «jol kartasyn» ázirleý týraly tapsyrma bergenin atap ótti.

Óz kezeginde Q.Bozýmbaev Qazaqstan men Ázerbaıjannyń saýda-ekonomıkalyq baılanystary eki el qarym-qatynastarynyń negizin qalaıtynyn jáne osy qatynastardy odan ári ulǵaıtý úshin tranzıt, kólik, energetıka,  aýyl sharýashylyǵy, temir jol kólik jasaý, týrızm jáne sport salalarynda úlken áleýeti bar ekenin atap ótti. Sonymen birge, Qazaqstan delegasıasynyń basshysy ǵylymı-tehnıkalyq jáne mádenı-gýmanıtarlyq salalardaǵy áriptestik te jaqsy deńgeıge jetkenine erekshe kóńil aýdardy.

Buǵan qosa, 2017 jyldyń sáýir aıynda QR Prezıdenti N.Á.Nazarbaevtyń  Ázerbaıjanǵa jasaǵan resmı saparynyń qorytyndysy boıynsha eki eldiń memleket basshylary qol jetkizgen ýaǵdalastyqtardy iske asyrý maqsatynda taraptar 2020 jylǵa deıin ózara saýda aınalymyn eki esege kóterý máselesin, sonyń ishinde ekijaqty naryqqa eksporttalatyn taýarlar nomenklatýrasyn ulǵaıtý úshin qajetti sharalardy atap ótti.

İs-sharanyń nátıjesinde Otyrystyń qorytyndy hattamasyna qol qoıyldy jáne eki el arasyndaǵy Saýda-ekonomıkalyq yntymaqtastyqty keńeıtý boıynsha «Jol kartasy» ázirlenip, qabyldandy. Sonymen qatar, taraptar  Úkimetaralyq komısıasynyń kezekti 15-otyrysyn 2018 jyly Astana qalasynda ótkizýge kelisti.

Sonymen qatar, 8 jeltoqsanda Bakýda Qazaqstan Respýblıkasynyń Energetıka mınıstri Q.Bozymbaev Ázerbaıjan Respýblıkasynyń Ekonomıka mınıstri Shahın Mýstafaevpen kezdesti.

Onyń barysynda taraptar eksporttyq-ımporttyq qımadaǵy ekijaqty saýda-ekonomıkalyq máselelerdi, tranzıttik-kóliktik yntymaqtastyǵy jaıly pikir almasyp, Qazaqstan men Ázerbaıjan arasyndaǵy Ekonomıkalyq yntymaqtastyǵy jónindegi úkimetaralyq komısıasynyń ótken 14-otyrysynyń qorytyndylaryn talqylady.

Budan basqa, Ázerbaıjan Mınıstri «Aqtaý teńiz porty» erkin ekonomıkalyq aımaǵyndaǵy Aýyl sharýashylyq ónimderdi qabyldaý, saqtaý jáne qaıta óndeý boıynsha logıstıkalyq ortalyǵyn birlese basqarý múmkindigin qarastyrýdy usyndy.

Sonymen qatar, taraptar munaı kólik jasaý salasyndaǵy ózara múmkindikterdi qarastyrýdy ýaǵdalasty.