Almaty oblysynyń Qarasaı aýdanyndaǵy Shamalǵan aýylynda Qazaqstan respýblıkasynyń Tuńǵysh Prezıdenti – Ult Kóshbasshysynyń «Atameken» tarıhı-mádenı ortalyǵy ashyldy.
Almaty oblysyna qarasty Qarasaı aýdanyndaǵy Shamalǵan aýylynda Qazaqstan Respýblıkasynyń Tuńǵysh Prezıdenti – Ult Kóshbasshysynyń «Atameken» tarıhı-mádenı ortalyǵy ashyldy. Sharanyń saltanatty ashylýynda Tuńǵysh prezıdent qory ortalyqtyń ekponattar qoryna Memleket basshysy paıdalanǵan úkimettik avto kóligin syıǵa tartty. Elbasynyń týǵan jerinde qurylǵan ortalyqtyń maqsaty – qazaqstandyqtar arasynda Elbasynyń shyǵarmashylyq jáne saıası jolyn keńinen taratý, sondaı-aq Prezıdenttiń ómiri men qyzmetiniń aıshyqty úlgileri negizinde jastardyń patrıottyq tárbıesin kúsheıtý.
Shamalǵan – Elbasynyń kindik qany tamǵan aýyl. Álem nazaryndaǵy Qazaqstannyń Tuńǵysh Prezıdenti Úshqońyr taýynyń etegindegi osy bir etek-jeńi jınaqy eldi mekennen túlep ushqan edi. Bul aýylda Memleket basshysynyń taǵylymdy ómir jolyn óskeleń urpaqqa pash etetin tarıhı-ólketaný murajaıy 1998 jyldan beri kelýshilerge qyzmet etip keledi. Al Tuńǵysh Prezıdent kúni merekesine oraı esigin aıqara ashqan «Atameken» tarıhı-mádenı ortalyǵy shamalǵandyqtar ǵana emes, tutas elimizdiń maqtanyshyna aınalatyn rýhanı keshenge aınalmaq.
Merekelik kúnge oraılastyrylǵan saltanatty jıynǵa QR Prezıdenti keńsesiniń basshysy Mahmud Qasymbekov, oblys ákimi Amandyq Batalov, qoǵam qaıratkeri, mesenat Bolat Ábishuly arnaıy kelip, qarasaılyqtardyń qýanyshyn birge bólisti. Alǵashqy quttyqtaý sózinde astanadan kelgen meıman Mahmud Bazarqululy álem tanyǵan eleýli memleket qalyptastyra bilgen Ult kóshbasshysynyń danalyǵy men daralyǵyna toqtalyp, osyndaı tanymal tulǵa ómirge kelgen ólkeniń qadir-qasıetin tilge tıek etip, ortalyqtyń erekshe rýhanı ordaǵa aınalýyna tilektestigin bildirdi. Almaty oblysynyń ákimi Amandyq Ǵabbasuly barshany Tuńǵysh Prezıdent kúnimen quttyqtap, «Týǵan jer» baǵdarlamasy aıasynda esigin aıqara ashyp turǵan bul keshen halyqtyń Elbasyna degen ystyq yqylasynyń aıqyn kórinisi ekenin alǵa tartyp, tileýles, nıettes bolǵan jandardyń barlyǵyna rızashylyǵyn bildirdi. «Barshańyzdy Qazaqstan Respýblıkasynyń Tuńǵysh Prezıdenti kúnimen shyn júrekten quttyqtaımyn!
Búgin osynaý Qazaqstan Respýblıkasynyń Tuńǵysh Prezıdenti – Ult Kóshbasshysynyń týǵan jerinde «Atameken» tarıhı-mádenı ortalyǵynyń saltanatty ashylý rásiminde barshamyz Elbasymyzdyń Táýelsizdik jyldarynda Qazaqstan halqynyń kemeldi keleshegi úshin atqarǵan eren eńbegi úshin alǵysymyzdy bildiremiz. Ortalyqtyń altyn qoryna jınalǵan barlyq eksponattar Elbasynyń balalyq shaǵynan egemen eldiń Kóshbasshysyna aınalǵan osy kúnderge deıingi júrip ótken sara jolynan syr shertedi. Meniń oıymsha, bul ortalyqtyń óskeleń urpaqty otansúıgishtikke tárbıeleýde olardyń sanasyn jańǵyrtýda ózindik eleýli úlesi bolary sózsiz. Búgin tusaýy kesilip otyrǵan osy ortalyqtyń barsha qazaqstandyqtardyń tarapynan sózsiz moıyndalǵan Ult Kóshbasshysymen jaqyndastyratyn ortalyqqa aınalaryna senimdimin», – dedi óńir basshysy A.Batalov. Quttyqtaýynan keıin oblys basshysy búgingi aıtýly sharaǵa muryndyq bolǵan tarıhı-mádenı ortalyqtyń ashylýyna óziniń ólsheýsiz úlesin qosqan barsha azamattarǵa Qurmet gramotalary men Alǵys hattaryn tabystady.
Marapattalǵandar arasynda «Zaman-Tý» JSHS dırektory Shámil Qojahanov, «Qazkommersbank» AQ dırektorlar keńesiniń tóraǵasy Keńes Raqyshev, «Dáýlet Serpin» JSHS dırektorynyń mindetin atqarýshy Jalǵasqan Dálibaev, qurmetti zeınettik demalysqa shyqqan Qarasaı batyrdyń «Shapaǵat» mektep mýzeıiniń meńgerýshisi Rymkesh Shaıkenqyzy men Kúlásh Ámirovalar bar.
«Atameken» tarıhı-mádenı ortalyǵynyń dırektory Jámılá Elgandıevaǵa qyzmettik avtokóliktiń kiltin tabys etti. Óz kezeginde barlyq jetisýlyqtar atynan oblystyq ardagerler uıymynyń tóraǵasy Ermek Kelimseıit óskeleń urpaq úshin mańyzy zor ıgi is úshin jomart jandarǵa alǵysyn aıtsa, jastar atynan ortaǵa shaqyrylǵanÝshınskıı orta mektebiniń oqýshysy Darhan Shavhatov Elbasyna arnaǵan óleńin el aldynda tebirene oqyp berdi.
QR Tuńǵysh Prezıdenti – Elbasy qorynyń atqarýshy dırektory Qanat Jumabaev búgingi ashylyp otyrǵan ortalyqtyń keleshek urpaq úshin tarıhı mán-mańyzǵa ıe ekendigin erekshe atap ótti. Q.Jumabaev erekshe syı retinde ortalyqqa Memleket basshysynyń 2001 jyly mingen qyzmettik avtokóligin tartý etti. Ol óziniń quttyqtaý sózinde: «Biz búgin tarıhı máni bar úlken oqıǵaǵa kýá bolyp otyrmyz. Bul kún barlyq qazaqstandyqtar úshin eleýli kún, óıtkeni Elbasy Nursultan Ábishuly Nazarbaev – qarqyndy áleýmettik-ekonomıkalyq jáne saıası damýy bar memlekettiń biregeı úlgisin jasaǵan zamanymyzdyń tanymal memlekettik jáne saıası qaıratkeri. Elbasy sekildi tarıhı tulǵa – bizdiń jastarymyz teńelýge tyrysyp, ózderi úshin durys baǵdar belgileýiniń, elikteýiniń aıshyqty úlgisi, al onyń ıdeıalary men eńbeginiń jemisi halyq ıgiligine aınalýǵa tıis», – dedi.
Jınalǵan kópshilik ǵımarat ishine enip, mádenı-tarıhı mekendi qyzyǵa aralap kórdi.
Ǵımarattyń saltanatty túrde lentasyn qıý rásimine mártebeli meımandarmen birge Bolat Nazarbaev ta qatysty. Osylaısha, Tuńǵysh Prezıdent – Ult Kóshbasshysynyń «Atameken» tarıhı-mádenı ortalyǵynyń óz jumysyn bastaýyna jol ashyldy. Sharaǵa qatysýshylar men qonaqtar kópshilik nazaryna qoıylǵan biregeı ekopzısıalarmen tanysý múmkindigine ıe boldy.
«Atameken» tarıhı-mádenı ortalyǵynda QR Tuńǵysh Prezıdenti – Elbasynyń qory men kitaphanasy, Tuńǵysh Prezıdenttiń mýzeıi, Prezıdent is basqarmasy, QR Ulttyq kitaphanasy, Shamalǵan aýylynyń mektep-mýzeıi, Qarasaı aýdandyq tarıhı-ólketaný mýzeıi jáne M. Tynyshpaev atyndaǵy Almaty oblystyq tarıhı-ólketaný mýzeıi bergen qujattar, kitaptar, fotomaterıaldar jáne basqa da eksponattar jınalǵan.
Jańa ortalyqta eksponattar N.Á.Nazarbaevtyń ómiri men qyzmetiniń, Qazaqstan Respýblıkasynyń qalyptasýy men damýynyń negizgi kezeńderine sáıkes hronologıalyq retpen ornalastyrylǵan. Ortalyqqa kelýshilerge qazaqstandyq memlekettiliktiń qaıta jańǵyrýy prosesindegi, ekonomıkadaǵy jáne áleýemettik saladaǵy, tarıhı damýdaǵy túbegeıli tereń ózgeristerdi ótkerýdegi jáne Qazaqstannyń HH jáne HHİ ǵasyrlar sheńberinde halyqaralyq bedeliniń nyǵaıýyndaǵy Elbasynyń aýqymdy úlesin, róli men eńbegin kózbe-kóz baǵalaý múmkindigin týdyrady.
Birinshi zalda bolashaq Memleket basshysynyń balalyq jáne jasóspirim jyldaryna, eńbek jolynyń bastalýyna arnalǵan ekspozısıa ornalasqan.
Ekinshi zaldyń eksponattary Elbasynyń odaqtyq respýblıka basshysy qyzmetterin atqarǵan jáne táýelsiz Qazaqstannyń búkil halqy Tuńǵysh Prezıdent etip saılaǵan kezeńderge jatady.
«Atameken» ortalyǵynyń úshinshi zaly Elbasynyń basshylyǵymen iske asyrylǵan aýqymdy qaıta qurýlarǵa, Qazaqstan Respýblıkasy Táýelsizdiginiń shırek ǵasyryndaǵy damý qorytyndylaryna arnalǵan. Sondaı-aq munda N.Á.Nazarbaevtyń týǵan aýyly Shamalǵanǵa ár jyldary barǵan sátteri týraly fotomaterıaldar da bar.
Tórtinshi zalda Elbasynyń syrtqy saıasattyq qyzmeti – Astanada ótkizilgen samıtter jáne EKSPO-2017 kórmesin qosa alǵandaǵy iri halyqaralyq sharalar, Qazaqtardyń Búkilálemdik quryltaıy, shetelderdiń memleket jáne úkimet basshylarynyń resmı kelgen saparlary týraly materıaldar ornalastyrylǵan.
Elbasyna sheteldik kóshbasshylar tartý etken hattamalyq syılyqtar kelýshilerdiń úlken qyzyǵýshylyǵyn týdyrdy. «Atameken» ortalyǵynda Prezıdent eńbekteriniń, sondaı-aq túrli avtorlar jazǵan Elbasynyń joly týraly kitaptardyń úlken toptamasy jınaqtalǵan.
Esterińizge salar bolsaq, QR Tuńǵysh Prezıdenti – Elbasy N.Á.Nazarbaevtyń «Atameken» tarıhı-mádenı ortalyǵy Almaty oblysynyń ákimdigi jáne QR Tuńǵysh Prezıdenti – Elbasy qorynyń qoldaýymen ashyldy. Jalpy kólemi 35000 sharshy metrdi alyp turǵan aýmaqtaǵy sáleti men dáýleti kelisken záýlim ǵımarat jergilikti jurtshylyqtyń suranysymen el azamattarynyń demeýshiligimen salynǵan.
