Búgin QR Parlamenti Májilisiniń jalpy otyrysynda «Balalardy densaýlyǵy men damýyna zardabyn tıgizetin aqparattan qorǵaý týraly» QR zań jobasy birinshi oqylymda talqylanýda, dep habarlaıdy dep habarlaıdy Qamshy.kz aqparat agenttigi QazAqparatqa silteme jasap.
Atalǵan zań jobasyn tanystyrǵan Májilis depýtaty Bekbolat Tileýhannyń aıtýynsha, qujat buqaralyq aqparat quraldary jáne basqa da quraldar arqyly taralatyn zalaldy aqparattan balalardy qorǵaýǵa arnalǵan.
«Álem elderiniń bir-birine ashyqtyǵy, telekomýnıkasıalyq jelilerdiń damýy, aqparat almasýdaǵy múmkinshilikterdiń molaıýy, jalpy dáýir dıdarynyń ózgerýi osy rýhanı keńistiktiń tazalyǵy týraly oılanýǵa jetkizdi. Zań jobasynda osy saladaǵy álemdik tájirıbe Qazaqstandaǵy aqparattyq ahýalǵa sáıkestendirilgen jáne eldegi zań aınalymynda joq keıbir uǵymdar engizilip otyr», - dedi ol.
Depýtattyń aıtýynsha, eń aldymen belgili bir jas toptaryndaǵy balalar arasynda qandaı aqparattyq ónimdi taratýǵa tyıym salynatyndyǵy jáne shek qoıylatyndyǵy aıqyndalǵan. Ol úshin balalarǵa arnalǵan aqparattyq ónimniń jas synyptamasy jáne jas sanaty deıtin uǵymdar engizilip otyr.
«Joba boıynsha mundaı aqparattyq ónimniń tómendegideı jas sanattary belgilengen. 6 jasqa deıin, 6 jastan asqan, 12 jastaǵy, 14 jastaǵy, 16 jastaǵy balalardyń jetilý jáne dúnıetaný múmkindigine sáıkes jiktelgen. Jalpy alǵanda zań jobasy boıynsha qatigezdik pen zorlyq-zombylyqqa qurylǵan, balalardyń ómirine qater tóndiretin is-áreketke, sondaı-aq sýısıdke ıtermeleıtin, pornografıalyq jáne arnaıy seksýaldy-erotıkalyq kórinisterdi qamtıtyn aqparattyq ónimderge tyıym salý qarastyrylýda. Munymen birge otbasy ınstıtýtyn joqqa shyǵaratyn jáne ulttyq dástúrlerge qarsy úgitteıtin aqparattar da balalarǵa zıandy dep tabylǵan. Telearnalar osy talapqa sáıkes keletin aqparattyq ónimdi jáne oǵan sáıestendirilgen tańbamen belgilep qana efırge taratýy tıis. Kerisinshe jaǵdaıda olarǵa zańmen shara qoldanylady», - dedi Bekbolat Tileýhan.
Sonymen qatar onyń sózine qaraǵanda, memlekettik basqarý jáne quqyq qorǵaý organdarynyń qyzmetin jeńildetý úshin alǵash ret balalarǵa arnalǵan aqparattyq ónimge anyqtama berilip otyr.
Mundaı aqparattyq ónim baǵyty, taqyryby, mazmuny, bezendirilýi boıynsha balaǵa tikeleı arnalǵan ónim bolyp tabylady.
