Qazaq kásipqoı boksshysy Qanat "Qazaq" Islam Búkilálemdik boks qaýymdastyǵynyń (WBA) reıtıńinde kósh bastap keledi, dep jazady Qamshy.kz aqparat agenttigi vesti.kz málimetine súıenip. 

WBA barlyq salmaq dárejeleri boıynsha reıtıńti jańartty. Birinshi orta salmaqta judyryqtasatyn Qanat kósh tizginin saqtap qaldy.

WBO NABO jáne WBA Inter-Continental chempıondyq ataǵyna ıe otandasymyz 2017 jyldyń qazan aıynan bastap birinshi orynda keledi. "Qazaq" baq synaıtyn salmaqta WBA cýperchempıondyq ataǵy kýbalyq Erıslandı Laraǵa, al turaqty chempıondyq ataq argentınalyq Karlos Braıan Kastano enshisinde. Al úzdik reıtıń úshtiginde Qanattan keıin amerıkalyq Djon Vera men fransýz Mıchel Soro ornalasqan.

Aıta keteıik, qarasha aıynyń sońynda Búkilálemdik boks qaýymdastyǵy (WBA) Qanat Islam men osy salmaqta reıtıńte ekinshi turǵan amerıkalyq Djon Vera arasyndaǵy kezdesýdiń ótýin mindettegen edi. Bul kezdesýde jeńiske jetken boksshy chempıonnnyń mindetti qarsylasy bolady.

Qanat Islam sońǵy kezdesýin 9 qyrkúıek kúni elordamyz Astana qalasynda ótkizip, kanadalyq Brendon Kýkty (18-1, 11 KO) toǵyzynshy raýndta tehnıkalyq nokaýtpen jeńdi. Osylaısha otandasymyz WBO NABO jáne WBA Inter-Continental belbeýlerin saqtap qalǵan-dy.

Jańarǵan WBA reıtıńinde birinshi aýyr salmaqta Isa Aqberbaev 10-orynda tur. Jartylaı orta salmaqta Janqosh Turarov 12-orynda bolsa, jeńilirek salmaqta Janat Jaqıanov 5-orynda keledi.