Jaqynda «Barys-Arena» aldynda astanalyq komandanyń ótinishimen qoı soıylǵan edi. Bul týraly aqparat sheteldik BAQ-qa tarap, halyqtar arasynda túsinispeýshilik týdyrǵan.
«Barys» HK-nyń baspasóz-hatshysy Evgenıı Akmanov bul jaǵdaıdy sáttilik úshin jasalǵanyn túsindirgen. Ol úshin arenaǵa ımam men áýlıe ákeı de kelgen.
«Aldymen ımam duǵa oqyp, qoı soıyldy. Qazaqstanda «qurbandyq shalý» degen salt bar jáne oǵan syılastyq tanytqandaryńyz jón. Ol jerde legıonerler de boldy, bári kórdi. Alaıda eshkim esinen tanyp, qulap qalǵan joq. Onyń ústine olar dinı qyzmetkerdiń aıtqan sózderin aýdaryp berýdi ótingen. Túsinistik tanytyp, qurmetpen qaraǵan. «Barys» kóp ultty komanda bolǵandyqtan ımamdy ǵana emes, áýlıe ákeıdi de shaqyrýdy uıǵardyq. Ol duǵa oqyp, jigitterge qasıetti sý septi. Sondaı-aq Henrık Karlsson men Kevın Dallmenniń ótinishimen dop taıaqtarǵa, sporttyq kıimderge, kıinetin bólmege de qasıetti sý sebildi», - degen edi Akmanov.
Alaıda mundaı jaǵdaılar buryn da qaıtalanǵan. Máselen, 2013 jyly qaraǵandylyq «Shahter» shotlandyq «Seltıkom» komandasymen alǵashqy oıyny barysynda qara qoı soıǵan.
Reseılik «Amkar» da oıyn aldynda qoı soıdyrdy.
Osy ýaqytqa deıin sheteldikterdi tań qaldyryp qana qoımaı, boılaryna qorqynysh uıalatqan qazaqtyń salt-dástúrleri qandaı? Kóz júgirtip ótsek...
«Orel ı reshka» jáne qazaqtyń ulttyq taǵamy
2013 jyly reseılik «Orel ı reshka» baǵdarlamasy Qazaqstanǵa kelgen. Júrgizýshileri Andreı men Anastasıa Almatyda bolyp, qalanyń kórikti jerlerin aralady, qazaq asqanasymen tanysty, jergilikti mentalıtetti kórdi. Alaıda baǵdarlamany kórgen qazaqstandyqtar narazylyqtaryn jetkizgen.
Oǵan sebep – baǵdarlama júrgizýshisi Andreı Bednákov almatylyq meıramhanadan ulttyq taǵamdardan dám tatyp kórýdi ótindi. Alaıda aldyna kelgen asty jaqtyrmaǵan túr tanytty, jaǵymsyz ıis shyǵyp turǵanyn aıtty. Sońynda Qazaqstanǵa kelgen týrıserdiń ash qalýy múmkin ekenin jetkizdi.
Qazaqtyń ulttyq mádenıetine qurmetsizdik tanytqan reseılik júrgizýshiniń áreketi Qzaaqstan turǵyndarynyń narazylyǵyn týǵyzdy.
Muny eskergen baǵdarlama 2017 jyldyń jazynda «EKSPO-2017» ýaqytynda Astanaǵa keldi. Bul jolǵy baǵdarlama da qazaqstandyqtardyń kóńilinen shyqpady. Jańa júrgizýshi Natalá meıramhanada qoıdyń basy men et taǵamdaryna tapsyrys berdi.
«Myna tiri aǵzanyń basyna qarap, meniń tábetim joǵalyp ketti. Masqara...», - dedi ulttyq taǵamdy jaqtyrmaǵan Natalá Ivleva.
Amerıkalyq BAQ jáne qyz alyp qashý
2014 jyly amerıkalyq The New York Post basylymy «Borat» stılinde qalyńdyqty alyp qashý týraly maqala jazdy. Onda Qazaqstanda nekeniń 60 paıyzy alyp qashý ádisi arqyly qıylatyny jazylǵan. Sondaı-aq qyzdyń qarsylyǵyna qaramastan jigittiń týystarynyń kúshpen qaldyrýǵa tyrysatyn áreketin synaǵan.
Qyz alyp qashý týraly Central European News basylymy pikir bildirdi. «Ulttyq neke qıý rásimi bylaı ótedi: qazaq ánderi, arnaıy toı kilemi jáne qalyńdyq pen kúıeý jigitke shashylǵan táttiler».
Nıkolas Keıdj jáne shapan
2017 jyldyń maýsymynda «Eýrazıa» kınofestıvali barysynda elge Nıkolas Keıdj kelgen. Oǵan qurmet kórsetken qazaqtar salt-dástúrge saı ústine shapan japty.
Bul jaǵdaı álemdik deńgeıde mazaq astyna qaldy. Sóz shapanǵa ǵana emes, qazaqtyń ulttyq sýsyny qymyzǵa da kelip tıdi. Bar álemniń jeli qoldanýshylary tanymal akterdiń ár sýretine túrli fotoshop jasap, kúlkige aınaldyrdy.
Sheteldik jeli qoldanýshylary XXI ǵasyrdyń ózinde osyndaı dástúrlerdiń áli de saqtalǵanyn aıtyp kúlisti, maqsatyn túsinbeı dal boldy. Tipti qazaqstandyqtardyń pikiri eki bólingen edi.
