Jańa jyl merekesi qarsańynda Almaty qalasynyń turǵyny Maısarova Medınaǵa elbasynyń atynan merekelik syı tabystaldy dep habarlaıdy Qamshy.kz aqparat agenttigi Almaty.tv-ǵa silteme berip. Osydan týra 1 aı buryn 5-shi synyp oqýshysy prezıdentke hat jazyp, kúshik suraǵan eken. Memleket basshysy búldirshinniń armanyn aıaqsyz qaldyrmady. Elbasynyń atynan asyl tuqymdy kúshikti týra jańa jyl qarsańynda Medınanyń ózine medeý aýdanynyń ákimdigi tartý etti.
«1 aı buryn men Prezıdentke hat jazdym. Ózimniń kúshigim bolsa eken dep burynnan armandaıtynmyn. Al anam únemi qarsy bolatyn. Maǵan súp-súıkimdi kúshikti syılaǵan kezde, qýanyshymda shek bolmady. Bastapqyda tań qaldym, osyndaı da bolady eken dep. Ózim sıaqty balalarǵa aıtarym, úmitteriń úzilmesin, armandar oryndalady eken», - dedi Medına Maısarova.
