Almatyda kólik reformasyn jáne qoǵamdyq kólik júıesin turaqtandyrý aıasynda jyljymaly sostavty jańalaý jáne baǵyttar jelisin ulǵaıtý jumystary júrýde. Bul týraly Almaty qalasy ákimdiginiń baspasóz qyzmet habarlady, dep jazady Qamshy.kz aqparat agenttigi.
Almaty ákimi Baýyrjan Baıbek jumys sapary barysynda №12 baǵyty boıynsha «Qazaqstan» qonaq úıinen «Medeý» bıik muz aıdynyna deıin baratyn jańa avtobýstardy kórdi.
Almatyda bıylǵy kólik reformasy aıasynda syıymdylyǵy ártúrli 388 avtobýs alyndy, olardyń 195–i baǵyttar boıynsha qyzmet kórsetýde, taǵy 200 jańa avtobýs qalaǵa keldi jáne olar kezeńder boıynsha jolǵa shyǵady. Óz kezeginde jeke tasymaldaýshylar da 254 jańa avtobýs aldy,olardyń 91–i qala joldarynda.
Jalpy qalanyń avtobýs parkiniń 30%-ǵa jańarýy jáne baǵyt jelisiniń ulǵaıýy jolaýshylar legin 20,6% arttyrdy. Eger 2016 jyly 174,6 mln. tranzaksıalansa, 2017 jyly 220,1 mln. tranzaksıalandy. Tasymaldaýshy josparly shyǵýdy qamtamasye ete almasa, ınterval men jyljymaly sostavty jańartý «Almatyelektrotransqa» beriledi. Mysaly, №70 baǵytta avtobýstar jańardy, ınterval qysqardy, sonyń arqasynda jolaýshylar legi 12 ese ósti, ıaǵnı táýligine 395 adamnan 4,6 myń adamǵa deıin jetti. Jaqynda 18 metrli avtobýs- garmoshkalar №201 baǵyty boıynsha júre bastady, ol kúnine 11,6 myń adamdy tasymaldaýda, boljamdaǵy jolaýshylar legi – 25 myń adam.
№12 baǵyty boıynsha jolǵa shyqqan 12-metrli tómen edendi avtobýstar Evro-5 ekologıalyq synypqa saı, syıymdylyǵy 100 adamnan joǵary, kondısıonerlermen, vıdeobaqylaý kameralarymen,pandýstarmen jáne basqalarmen tolyq jabdyqtalǵan. Atalǵan baǵytty «Almatyelektrotrans» JSHS uıymdastyrǵan, jaı kúnderi avtobýstar arasyndaǵy ınterval alty mınýtqa qysqarǵan, al demalys kúnderi eki mınýtqa azaıǵan. Bosaǵan avtobýstardy «Green Bus company» JSHS №120 baǵytty kúsheıtý úshin paıdalanady, keıin bul baǵyt aınalmaly bolady.
Eske salsaq, buryndary Almatyda kólikti reformalaý aıasynda №22, 70, 86, 65, 103, 50, 126, 112 baǵyttary boıynsha jańa avtobýstar jolǵa shyǵyp, №77 baǵyt qaıta ashylyp, kólikter №201 magıstraldy baǵyty boıynsha júre bastaǵan edi. Kórshi oblystan qalaǵa qosylǵan eldi mekenderge tolyq kólik qyzmetin kórsetý masqatynda segiz baǵyt ashylǵan bolatyn.
