Qazaq áýelden-aq jetimin jylatpaǵan el. Bul sózdi Qoshqarbaı aýylynyń (Aqmola oblys) turǵyndary dáleldedi. TengriMIX portaly sol aýyldyń meıirimdi turǵyndary jaıynda oqıǵamen bólisti, dep jazady Qamshy.kz aqparat agenttigi.
90 jyldardyń sońynda jergilikti kásipker «Shoqqaraǵaı» sharýa qojalyǵynyń basshysy Qaıyrken Hasenovtyń bastamasymen Qoshqarbaıda mektepke arnalǵan jańa ǵımarat salyndy. Bul oqý ǵımaraty aýyl ómiriniń qoǵamdyq jáne mádenı ortalyǵyna aınaldy.
Alaıda birneshe jyl buryn oqýshylardyń azdyǵynyń kesirinen ortalyqtyń jabylyp qalý qaýpi órship turdy. Qoshqarbaıda týǵan balalar er jetip, aýyldan ketti. 200 turǵyny bar aýyl eskire bastady. Muny baıqaǵan Hasenovtyń áıeli, oqý ortalyǵyn 20 jyl basqarǵan Mýslıma Qasymqyzy jaǵdaıdy óz qolyna aldy. Aýyldastardy shaqyryp, ujymdy jınap balalar úıine barýdy usyndy, jetim balalarmen tanysyp, úılerine alyp ketýdi uıǵardy.
«Mektepti de saqtap qalamyz, saýapty is jasaımyz. Jaqynda zeınetkerlikke shyǵamyn, balalardy ósirip, jylýlyǵym men meıirimimdi tógýge ýaqytym da jetkilikti bolady. Aralaryńyzda da ata-ana qamqorlyǵynan ada qalǵan balalarǵa qamqor bolamyn degender bar bolar?! Jaqsylyq jasaý - bárimizdiń qolymyzdan keledi», - degen edi Mýslıma apaı sol ýaqytta.
Qoshqarbaılyqtar bul oıdy quptap, Aqkól balalar úıine attanǵan. Tárbıelenýshilermen tanysyp, sóılesip, 11 balany aýylǵa alyp ketedi. Árıne, ózge balany alyp ketip, meıirimińdi tógý ońaı emes, turǵyndar qobaljydy, júrekterinde úreı de bolǵan. Onyń ústine, týǵan balalary buǵan qalaı qaraıtyny taǵy bar. Qazirgi ýaqytta aýyl turǵyndary istegen isterine ókinbeıdi.
«Úsh balamyz ár túrli qalada jumys jasaıdy, óz shańyraqtaryn qurdy. Úlken otbasyǵa arnalyp salynǵan úıde kúıeýim ekeýmiz jalǵyz qaldyq. Úsh jyl buryn Talǵat paıda bolǵanda ómirimiz jańa arnaǵa aýysty, túbegeıli ózgerdi. Ol bizge úırenisip, biz oǵan baýyr basyp qaldyq. Endi, mine, kenjemiz úıde de, baqsha da bizdiń kómekshimizge aınaldy. Kúıeýim keı kezderi ony óriske alyp ketip, tehnıka meńgerýdi úıretedi. Bizdiń týǵan uldarymyzben de jaqsy aralasady, birge demalady. Ákesi shahmat oınaýdy da úıretti, endi shahmat oınaý Talǵattyń súıikti isine aınaldy. Onyń ústine sportpen shuǵyldanǵandy da jany súıedi», - dedi Mýslıma Qasymqyzy.
Talǵat ózin asyrap alǵan ákesine qatty uqsaıdy eken.
Baǵlan men Gúlnar Baımahanovtar da bir balany qamqorlyqtaryna almaq bolady. Alaıda aǵaıyndy Andreı men Sergeı Kekınderdi kórgende, «bular – bizdiń balalarymyz» dep oılaǵan. Keıinirek olardyń týǵan qaryndasy Galány da asyrap aldy. Balalar bir-birimen tatý turady, anasyna úı sharýasyna, ákesine baqshada kómektesedi. Qazaq tilinde sóıleýdi úırenip, jańa baýyrlarymen de tez til tabysyp ketti.
Al Nurǵazınder otbasy birden 4 balamen tolyqty. Olar Sasha, Masha, Kolá Chýrıkov jáne Sasha Slobodándy óz qamqorlyqtaryna aldy.
«Bala bolǵan soń shýlaıdy, erkeleıdi. Eń bastysy balalar úshin úıimiz jaıly. Biz soǵan qýanamyz. Árqaısysy ártúrli bolǵanymen, olardyń endigi otbasy bir», - dedi olardyń anasy Kúnaraı Nurǵazına.
Ardaq-Jamıba Jumabaevalar, Erkesh-Bıbigúl Tókenovalar, Barhat-Ǵalıa Baımahanovalar da balalar úıinen kelgen jetimderdiń basynan sıpap, meıirimderin tógip keledi.
