Esim han 1645 jyly dúnıe salǵan soń (1628 jyly dúnıe saldy degen de derek bar), Qazaq handyǵynyń taǵyna Jáńgir han (1645-1652) otyrdy. Halyq ony el úshin eńirep týǵan erligine bola «Salqam Jáńgir» dep ataǵan. Taqqa otyrmaı turyp-aq onyń ǵajaıyp erligi jalpaq qazaq arasy bylaı tursyn, kórshi elderge ańyz bolyp taraǵan.
Bul oraıda, Jáńgir hannyń 1644 jyly 600 jankeshti sarbazdarymen jońǵardyń 50 myń áskerine qarsy turyp, jeńiske jetýi jalpy soǵys tarıhynda sırek kezdesetin oqıǵa ekenin aıta ketken jón. Jer jaǵdaıyn urymtal paıdalanyp, Úısin Alataýynyń bel kezeńine urymtal bekingen Jáńgirdiń sanaýly-aq sarbazy jońǵardyń 50 myń áskerine qasqaıyp qarsy turady. Az qoldy taptap ótpek bolyp, qıyn qıaǵa umtylǵan dushpan áskeri 10 myńdaı adamyn shyǵyndaıdy. Osy kezde, joryqqa attanarda, jaýshy arqyly habar salǵan Jáńgirdiń sálemine qulaq asyp, ile atqa qonǵan alshyn Jalańtós batyr 20 myń áskerimen jońǵar jaýyngerleriniń tý syrtynan tıedi. Bul soǵysta kúıreı jeńilgen jońǵarlar kópke deıin úlken qaırat kórsete almady.
Qazaq pen jońǵar arasyndaǵy jaǵdaıdy qapysyz baqylap otyrǵan Reseı patshalyǵy kóshpeli eki eldiń arasyndaǵy óshpendilik otyn osy kezde úrleı túsip, jońǵarlarǵa Sibir arqyly otty qarý sata bastaıdy. Otty qarýmen jaraqtanǵan jońǵarlar 1652 jyly qazaqtardy oısyrata jeńedi. Osy soǵysta Jáńgir han qaza tapty.
(Aqseleý Seıdimbekten)
