Elbasy Nursultan Nazarbaev «Bolashaqqa baǵdar: rýhanı jańǵyrý» atty maqalasynda jahandaný dáýirindegi qazaqstandyq mádenıettiń búgini men bolashaǵyna úlken mán beredi. «Biz HHİ ǵasyrdyń jahandyq kartasynda eshkimge uqsamaıtyn, derbes orny bar ult bolamyz desek, «Jahandaǵy zamanaýı qazaqstandyq mádenıet» jobasyn iske asyrýǵa tıispiz. Álem bizdi qara altynmen nemese syrtqy saıasattaǵy iri bastamalarymyzben ǵana emes, mádenı jetistikterimizben de tanýy kerek» delingen maqalada.              

Osy baǵdarlamada kórsetilgen maqsat-mindetterdi iske asyrý aıasynda QR Ulttyq kitaphanasynyń bastamasymen jáne QR Mádenıet jáne sport mınıstri Arystanbek Muhamedıulynyń qoldaýymen Qazaqstan men Kýveıt arasyndaǵy mádenı aralyq baılanystardy nyǵaıtýǵa úlken qadam jasaldy. Ál-Kýveıt qalasynda 11-15 qańtarda jyl saıyn uıymdastyrylatyn Ál-Karın Festıvaline Qazaqstannyń «Astana-Opera» sımfonıalyq orkestri qatysyp, elimizdiń tanymal óner qaıratkerleri Maıra Muhamedqyzy, Medet Shotabaev, Abzal Mýhıtdınov, Aısulý Ábilhanova, Rýslan Baımýrzın jáne t.b.  óner kórsetti. Orkestr Qurmanǵazy Saǵyrbaev, Nurǵısa Tilendıev sıaqty tanymal qazaq kompozıtorlarynyń tańǵajaıyp shyǵarmalaryn oryndap, óner súıer qaýymynyń zor qoshemetine ıe boldy.              

Kýveıt memleketinde ótken ál-Karın festıvali shyn daryndylardyń basyn qosyp, erekshe formatta uıymdastyrylǵan. Al elimizdiń orkestri ultymyzdyń tańǵajaıyp shyǵarmalaryn oryndap, Kýveıt jurtshylyǵynyń tańdaıyn qaqtyrdy.              

– Kýveıtte jyl saıyn 11-15 qańtarda ótkiziletin  ál-Karın Festıvali joǵary dengeıde ótti. Kýveıt óte baı, dáýletti xalyq eken. Ókimettiń ónerge, bilimge bólingen qarajattary men bolashaq urpaǵyna qaldyrǵan murasyn estiseńiz, ǵajaıyp, adam balasy sengisiz sıfrlar! Konsert keremet ótti! Kórermender qımastyqpen zaldan áreń ketti. Aıtpaqshy, Kýveıtte keremet Opera teatry bar eken, maǵan opera aıtýǵa usynys jasady, - deıdi Maıra Muhamedqyzy.               

Sonymen qatar, 14 qańtarda QR Ulttyq kitaphanasy men Halyqaralyq áıelder toby (International Women’s Group) birlesip, Mádenıet jáne sport mınıstrligi jáne Qazaqstannyń Kýveıttegi Elshiliginiń qoldaýymen «Kazakhstan Time» Qazaqstan kúnin uıymdastyrdy.    

Qazaqstan kúni aıasynda Kýveıt Ulttyq kitaphanasymen ekijaqty kezdesýler ótip, kelissózder júrgizildi. Qazaqstandyq delegasıa Kýveıt Ulttyq kitaphanasynyń dırektory Kemal myrzamen kezdesip,  kitapxana jumystarymen tanysty, taraptar áriptestik yntymaqtastyqqa kelisti. QR Ulttyq kitaphanasy men Ál-Baptın Arab poezıasy Ortalyq ǵylymı kitaphanasynda, Mádenıet jáne kitaphana salasyndaǵy yntymaqtastyq týraly memorandýmǵa qol qoıý rásimi ótti.              

– Endi eki kitapxananyń mamandary kóne qoljazbalardy zertteý tájirıbelerimen, mamandarmen, sondaı-aq sırek kitaptar men qoljazbalardyń kóshirmelerimen almasatyn bolady. Bul jetistik biz úshin zor mártebe, - deıdi QR Ulttyq kitaphanasynyń dırektory Janat Seıdýmanov.              

Kýveıt memleketindegi Qazaqstan kúni aıasynda ótken sharalar jergilikti buqaralyq aqparat quraldarynyń nazarynda boldy. Atap aıtqanda, eki el arasyndaǵy qarym-qatynastyń nyǵaıýyna sebep bolǵan mańyzdy sharalar Kýveıt eliniń 11 baspasózi men ulttyq arnalarynan berilip, halyqqa keńinen nasıhattaldy.              

Bıyl Qazaqstan Respýblıkasy men Kýveıt memleketi arasyndaǵy dıplomatıalyq qarym-qatynastyń ornaýyna 25 jyl tolýda. Osy aıtýly mańyzdy oqıǵaǵa oraı endi eki el arasyndaǵy mádenı baılanys nyǵaıyp, ortaq tarıhı tamyr, mádenıet pen dástúrdi biriktirýde.             

QR Ulttyq Kitaphanasy ulttyq qundylyqtarymyz ben rýhanı baılyǵymyzdy shet memleketterge tanystyrý men dáripteýde bar kúsh-jigerin salýdy jalǵastyryp keledi. Onyń ishinde ozyq oıly ult, irgesi berik el, bilimge qushtar jurt ekenimizdi kórsetýde atqarylar sharýalar áli de aldaǵy ýaqyttyń enshisinde.